ខេត្តកំពង់ចាម ៖ ច្រាំងទន្លេនៅមុខសណ្ឋាគារមេគង្គ ស្ថិតក្នុងសង្កាត់កំពង់ចាម ក្រុងកំពង់ចាម ដែលបានបាក់ស្រុត មកដល់ពេលនេះឃើញបាក់ស្រុតបន្តទៀតហើយ ព្រោះឃើញរូបសំណាកដំរី ក៏បានផ្អៀងចូលទៅក្នុងទឹកទន្លេដែរ និងមានសភាពខូចកាន់តែធ្ងន់ឡើងៗ…
ខេត្តកំពង់ចាម ៖ ច្រាំងទន្លេនៅមុខសណ្ឋាគារមេគង្គ ស្ថិតក្នុងសង្កាត់កំពង់ចាម ក្រុងកំពង់ចាម ដែលបានបាក់ស្រុត មកដល់ពេលនេះឃើញបាក់ស្រុតបន្តទៀតហើយ ព្រោះឃើញរូបសំណាកដំរី ក៏បានផ្អៀងចូលទៅក្នុងទឹកទន្លេដែរ និងមានសភាពខូចកាន់តែធ្ងន់ឡើងៗ ។ អ្នកធ្វើដំណើរឆ្លងកាត់ទីនោះ មានការសោកស្តាយជាខ្លាំង ចំពោះសមិទ្ធផលច្រាំងទន្លេដែលបានបាក់ស្រុតនេះ ព្រមទាំងបន្ទោសថា អ្នកបច្ចេកទេសមុនៗសង់គ្មានបច្ចេកទេសច្បាស់លាស់ ។
លោក ចាន់ ផល្លី អភិបាលក្រុងកំពង់ចាមមានប្រសាសន៍ថា ទីតាំងច្រាំងទន្លេដែលបាក់ស្រុតបណ្តាលឲ្យខូចខាតនៅមុខសណ្ឋាគារមនោរម្យវីអាយភី រហូតទៅមុខដល់សណ្ឋាគារមេគង្គ បានត្រូវក្រុមបច្ចេកទេសរបស់ក្រសួងធនធានទឹក និងឧតុនិយម និងលោកអភិបាលខេត្ត ទៅពិនិត្យមើលដើម្បីឲ្យដឹងថា នៅពេលទឹកទន្លេលែងស្រកនោះនឹងចុះសិក្សាវាយតម្លៃដើម្បីត្រៀមជួសជុលឡើងវិញ ប៉ុន្តែថវិកាដែលត្រូវចំណាយលើការជួសជុលអស់ប៉ុន្មាននៅមិនទាន់ដឹងច្បាស់ទេ ។
លោកអភិបាលខេត្ត គួច ចំរើន ធ្លាប់មានប្រសាសន៍ថា ក្នុងពេលដែលច្រាំងទន្លេមេគង្គចាប់ផ្តើមបាក់ស្រុតនោះ អាជ្ញាធរខេត្តមានក្តីកង្វល់ ដោយចង់ធ្វើការជួសជុលភ្លាមៗ ដើម្បីកុំឲ្យខូចខាតច្រើន ប៉ុន្តែខ្លាចជួសជុលរួចមិនបានប៉ុន្មានផងក្រែងខូចទៅវិញ ។ ហេតុនេះហើយ ទើបមានការពន្យារពេល ដើម្បីតាមដានមើលពីស្ថានភាពទឹកទន្លេមេគង្គ ពេលណាអស់កម្លាំងលែងស្រកហើយនោះ មន្ត្រីជំនាញនឹងមកធ្វើការសិក្សាផ្ទាល់ដើម្បីជួសជុលឡើងវិញ ។
គួរកត់សម្គាល់ថា កាលមិនទាន់បាក់ស្រុតច្រាំងទន្លេក្រុងកំពង់ចាមផ្តល់នូវទស្សនីយភាពស្រស់ត្រកាលឈរហាត់ប្រាណ យកខ្យល់អាកាសត្រជាក់សែនមនោរម្យ ។ អ្នកក្រុងកំពង់ចាម តែងនាំគ្នាមកកម្សាន្តដោយក្តីរីករាយនូវទេសភាពដ៏ស្រស់ស្អាតនាមាត់ទន្លេ ។ ប៉ុន្តែតាំងតែពីច្រាំងបាក់បន្តបន្ទាប់ចាប់ពីរដូវទឹកឡើងមក ទីនេះបាត់បង់អស់សោភ័ណភាព បាត់អស់អ្នកមកកម្សាន្តដែលម្នាក់ៗសោកស្តាយណាស់រហូតដល់បន្ទោសថាមកពីអ្នកបច្ចេកទេសជំនាន់អភិបាលខេត្តមុនស្ទើរភ្លើងពេកបានជាឆាប់បាក់ស្រុតយ៉ាងនេះ ។
ម្តងនេះ សម័យលោក គួច ចំរើន ប្រាកដជាសង់ថ្មីរឹងមាំយ៉ាងពិតប្រាកដ ។
ចែករំលែកព័តមាននេះ