រាជធានីភ្នំពេញ ៖ យុវជន៦នាក់ជិះម៉ូតូ៣គ្រឿងឌុបគ្នាចេញពីហូបស៊ុប ត្រូវក្មេងទំនើងមួយក្រុមមានគ្នាជាង១០នាក់ ធ្វើសកម្មភាពប្រើខ្សែក្រវ៉ាត់ដេញវាយ ហើយត្រូវកម្លាំងសមត្ថកិច្ចធ្វើការឃាត់ខ្លួនបានប្រុសស្រី៣នា បង្កការភ្ញាក់ផ្អើលតាមដងផ្លូវកាលពីម៉ោង១០និង៣០នាទីយប់ថ្ងៃទី០៨ ធ្នូ ២០១៨ នៅចំណុងកំណាត់ផ្លូវវេងស្រេង ភូមិជ្រៃកោង សង្កាត់ ចោមចៅ ២ខណ្ឌពោធិ៍សែនជ័យ។
ក្មេងទំនើងដែលឃាត់ខ្លួនមានស្ត្រី២នាក់ មិនបានប្រាប់អត្តសញ្ញាណ និងបុរសម្នាក់ឈ្មោះ ឈិន រ៉ូត អាយុ១៨ឆ្នាំ មុខរបរជាងធ្វើកញ្ចុះ ស្នាក់នៅភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ។ ចំណែកបក្សពួកមួយចំនួនទៀតបានគេចខ្លួនមិនស្គាល់ឈ្មោះ។ រីឯជនរងគ្រោះទី១-ឈ្មោះ សុខ ណា អាយុ៣២ឆ្នាំ ស្នាក់ភូមិព្រៃព្រីងខាងជើងសង្កាត់ចោមចៅ៣ ខណ្ឌពោធិ៍សែនជ័យ របួសឆ្អឹងជំនីយ៉ាងដំណំ ចំណែកមិត្តភក្តិ៥នាក់ទៀតមិនមានរងរបួសទេគេចទាន់។
ប្រភពពីជនរងគ្រោះបានឲ្យដឹងថា មុនកើតហេតុ ពួកគាត់ចេញពីហូបស៊ុបនៅផ្លូវវេងស្រេងក្រោយពីហូបហើយជិះម៉ូតូចំនួន៣គ្រឿង ម៉ូតូមួយគ្រឿងជិះ២នាក់ ឌុបគ្នាគោលបំណងត្រឡប់ទៅផ្ទះ ខណៈមកដល់គោលដៅខាងលើ ស្រាប់តែក្មេងទំនើងមួយក្រុមជាង១០នាក់ ជិះម៉ូតូជាច្រើនគ្រឿងមកពីក្រោយ រួចដកខ្សែក្រវ៉ាត់ដេញវាយពួកគាត់ដោយមិនដឹងមូលហេតុ បណ្តាលឱ្យមានរបួសរបួសស្រាល ។ ភ្លាមៗសមត្ថកិច្ចមូលដ្ឋានបានឃាត់ខ្លួនបានជនបង្ក០៣នាក់ ក្នុងស្រី២នាក់ ចំណែកបក្សពួកមួយចំនួនទៀតបានបើកម៉ូតូរត់គេចខ្លួនអស់។
ក្នុងករណីដេញវាយខាងលើនេះ សមត្ថកិច្ចធ្វើការដកហូតម៉ូតូក្មេងទំនើងបានចំនួន២គ្រឿង (ម៉ាកSUZUKI Let’s មួយគ្រឿង និងហុងដាឌ្រីមបិចមួយគ្រឿង)។ ហើយបច្ចុប្បន្នអ្នករបួសត្រូវបានបងប្អូនបញ្ជូនទៅសង្គ្រោះនៅគ្លីនិកក្បែរកន្លែងកើតហេតុ ដោយឡែកជនបង្កប្រុសស្រី៣នាក់ ត្រូវសមត្ថកិច្ចឃាត់ខ្លួនសាកសួរបណ្តោះអាសន្ននៅប៉ុស្តិ៍នគរបាលរដ្ឋបាលចោមចៅ២ ៕
ចែករំលែកព័តមាននេះ