ខេត្តកំពង់ឆ្នាំង ៖ រហូតមកដល់ពេលនេះ ក្រុមហ៊ុន រឿន ថាវរិទ្ធ ដែលធ្វើអាជីវកម្មបូមខ្សាច់ក្រោមលេសស្តារបាតអាង និងជួសជុលទំនប់កុមារ ស្ថិតនៅក្នុងភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច នៅមិនទាន់មានច្បាប់ធ្វើអាជីវកម្មបូមខ្សាច់ពីមន្ទីរ ក្រសួងពាក់ព័ន្ធនៅឡើយទេ ខណៈដែលក្រុមហ៊ុនមួយនេះកំពុងធ្វើសកម្មភាពបូមខ្សាច់និងដឹកជញ្ជូនចេញជារៀងរាល់ថ្ងៃ ។
សូមរំឭកថា ក្រុមហ៊ុន រឿន ថាវរិទ្ធ បានដាក់គ្រឿងចក្រមកបូមខ្សាច់នៅទំនប់កុមារ ក្រោមហេតុផល ជួសជុលទំនប់ទ្វារទឹក និងស្តារបាតអាង តាមការស្នើសុំរបស់សហគមន៍ដែលមានលោក ស៊ិន សារ៉ាត់ ដែលតាំងខ្លួនជាប្រធានសហគមន៍ (ក្នុងពាក្យស្នើសុំដាក់ជាប្រធានសហគមន៍) តែក្រោយមកថា ជាតំណាងប្រជាពលរដ្ឋ ប៉ុន្តែសហគមន៍នេះមិនទាន់ត្រូវបានទទួលស្គាល់ពីក្រសួងមហាផ្ទៃនៅឡើយទេ ។ ប៉ុន្តែបន្ទាប់ពីបានអាជ្ញាប័ណ្ណជួសជុលទំនប់ ស្ដារបាតអាង និងទ្វារទឹកនៅចំណុចខាងលើរួចមក ក្រុមហ៊ុន រឿន ថាវរិទ្ធ បែរជាដាក់គ្រឿងចក្របូមខ្សាច់ធ្វើអាជីវកម្ម ទៅវិញ គឺខុសនឹងច្បាប់ស្ដីពីរ៉ែនិងថាមពល ។
ពាក់ព័ន្ធនឹងបញ្ហានេះ កាលពីពេលកន្លងទៅ លោក អ៊ុក រស់ ប្រធានមន្ទីររ៉ែនិងថាមពលខេត្ត បានប្រាប់អ្នកសារព័ត៌មានថា រឿងជួសជុលទំនប់ ស្ដារបាតអាងនៅទំនប់កុមារ គឺគេមានច្បាប់វាជារឿងត្រឹមត្រូវ ប៉ុន្តែរឿងបូមខ្សាច់ធ្វើអាជីវកម្មគឺខុសនឹងច្បាប់ស្ដីពីការគ្រប់គ្រងរ៉ែ និងថាមពល ។ ហេតុនេះ ក្រុមហ៊ុនត្រូវតែធ្វើច្បាប់សុំពីមន្ទីររ៉ែនិងថាមពល ដើម្បីបង់សួយសារអាករឱ្យបានត្រឹមត្រូវ ។
កាលណោះ លោក អ៊ុក រស់ ក្រោយពីចុះពិនិត្យទីតាំងបូមខ្សាច់ខាងលើ ក៏បានប្រាប់ថា បើមានច្បាប់ស្តាបរាតអាងគឺអាចបូមបាន តែហាមធ្វើអាជីវកម្ម មានន័យថា បូមបានតែហាមដឹកខ្សាច់ចេញយកទៅលក់ធ្វើអាជីវកម្ម! ចំណុចសំខាន់គឺនៅត្រង់ហ្នឹង ។ ប៉ុន្តែមកដល់ពេលនេះក្រុមហ៊ុននៅតែបូមខ្សាច់ដឹកចេញទៅលក់ដោយរលូនជារៀងរាល់ថ្ងៃ ទាំងមិនទាន់មានច្បាប់ត្រឹមត្រូវនៅឡើយ ។ ជុំវិញបញ្ហានេះ នៅរសៀលថ្ងៃទី ៥ខែធ្នូ ឆ្នាំ២០១៨ លោក អ៊ុករស់ បានប្រាប់តាមទូរស័ព្ទថា ក្រុមហ៊ុន រឿន ថាវរិទ្ធ ពិតជាមិនទាន់មានច្បាប់នៅឡើយទេ និងកំពុងតែរត់ច្បាប់ (sic) ។ ទោះជាយ៉ាងនេះក្តី មកដល់ពេលនេះមានរយៈពេលជាង១ខែហើយនៅមិនទាន់បានច្បាប់នៅឡើយ ហើយបើបែបនេះមែនគឺប្រៀបបាននឹងអត្ថន័យថា ក្រុមហុ៊នខាងលើនេះកំពុងកាត់ក្បាលតម្រូវមួក គឺមិនមែនកាត់មួកតម្រូវក្បាលនោះទេ ។
ជុំវិញបញ្ហានេះ ប្រជាពលរដ្ឋភាគច្រើននៅភូមិអ្នកតាហាង សុំឲ្យអាជ្ញាធរខេត្តពិសេសក្រសួងពាក់ព័ន្ធខាងលើ ជួយពិនិត្យលើច្បាប់របស់ក្រុមហ៊ុនរឿន ថាវរិទ្ធ នេះឡើងវិញផង ។ ម្យ៉ាងវិញទៀត តាមប្រភពព័ត៌មានក្រៅផ្លូវការ បានឱ្យដឹងថា ប្រជាពលរដ្ឋនិងសហគមន៍នេសាទ ដែលមានច្បាប់ត្រឹមត្រូវ កំពុងមានការព្រួយបារម្ភចំពោះដីព្រៃលិចទឹកនៅតំបន់អាងទំនប់ទឹកកុមារ ព្រោះមានពាក្យលេចឮមកខាងក្រៅថា សហគមន៍គ្មានច្បាប់ខាងលើបានចាត់ចែងលក់ដីអាងជាប្រភេទព្រៃលិចទឹក នៅចំណុចខាងលើប្រមាណ២២ហិកតា ដោយក្នុងមួយហិកតាមានតម្លៃពី១២.០០០ដុល្លារ ទៅ១៥.០០០ដុល្លារ ។
ជុំវិញព័ត៌មាននេះ យើងមិនអាចសុំការបំភ្លឺពីលោក ស៊ិន សារ៉ាត់ ដែលអះអាងថាជាតំណាងប្រជាពលរដ្ឋនៅឡើយទេ បើមានការឆ្លើយតបណាមួយយើងនឹងបន្តផ្សាយជូននៅពេលក្រោយ ៕
ចែករំលែកព័តមាននេះ