ខេត្តបាត់ដំបង ៖ អាជ្ញាធរនិងសមត្ថកិច្ចខេត្តបាត់ដំបង ហាក់មិនទាន់បានអនុវត្តឱ្យមានប្រសិទ្ធភាពនៅឡើយទេ ចំពោះអនុសាសន៍សម្ដេចក្រឡាហោម ស ខេង ដែលសម្ដេចបានចេញសេចក្ដីណែនាំ ឬបទបញ្ជាដដែលៗ ឲ្យមានវិធានការទប់ស្កាត់…
ខេត្តបាត់ដំបង ៖ អាជ្ញាធរនិងសមត្ថកិច្ចខេត្តបាត់ដំបង ហាក់មិនទាន់បានអនុវត្តឱ្យមានប្រសិទ្ធភាពនៅឡើយទេ ចំពោះអនុសាសន៍សម្ដេចក្រឡាហោម ស ខេង ដែលសម្ដេចបានចេញសេចក្ដីណែនាំ ឬបទបញ្ជាដដែលៗ ឲ្យមានវិធានការទប់ស្កាត់ ឬបង្ក្រាបបនល្បែងស៊ីសងគ្រប់ប្រភេទ ដែលគ្មានច្បាប់ទម្លាប់ ។ ផ្ទុយទៅវិញ បនល្បែងកាន់តែកើនឡើង ហាក់ផ្គើននឹងអនុសាសន៍សម្ដេច ហើយអ្នកបើកបនល្បែង និងអ្នកលេងល្បែងមួយចំនួន ក៏ជាមន្ត្រីនគរបាលផងដែរ រីឯលោកស្នងការខេត្ត ហាក់ធ្វើព្រងើយកន្តើយគ្មានចំណាត់ការសោះ ចំពោះសកម្មភាពមន្ត្រីខិលខូចនៅក្នុងអង្គភាពនេះ ។
ជាក់ស្ដែង មន្ត្រីនគរបាលនៅការិយាល័យប្រឆាំងគ្រឿងញៀនម្នាក់ ឈ្មោះនូ រដ្ឋា បានបើកសង្វៀនបញ្ជល់មាន់ ដោយចំហនៅចំណុចវាលស្រែមួយកន្លែង ស្ថិតក្នុងភូមិដំណាក់ហ្លូង សង្កាត់វត្តគរ ក្រុងបាត់ដំបង ថែមទាំង មានមន្ត្រីនគរបាលមួយចំនួន ក៏បានចូលរួមប្រព្រឹត្តល្បែងនេះយ៉ាងវក់វីផងដែរ ។ ប្រភពពីអ្នកភ្នាល់ល្បែងនេះបានឲ្យដឹងថា កាលពីព្រឹកថ្ងៃទី២៥ វិច្ឆិកា គេឃើញកម្លាំងនគរបាលការិយាល័យព្រហ្មទណ្ឌកំរិតស្រាល មួយក្រុមបានចុះទៅកាន់ទីតាំងសង្វៀនមាន់របស់មន្ត្រីឈ្មោះនូ រដ្ឋា ធ្វើឲ្យអ្នកលេងប្រមាណពី៣០ទៅ៤០នាក់ ផ្អើលរត់ពេញស្រែ។ អ្នកលេងបានប្រាប់ថា អ្នកបើកល្បែងជាមន្ត្រីនគរបាល រីឯអ្នកលេងពី៥ទៅ៦នាក់ នៅក្នុងចំណោមនោះក៏ជាមន្ត្រីនគរបាលនៅស្នងការខេត្តដែរ។
ប្រភពដដែលបញ្ជាក់ថា សមត្ថកិច្ចប៉ុន្មាននាក់នោះ មិនបានរំខានដល់ដំណើរការល្បែងនេះយូរទេ ។ ពួកគេបានដកថយវិញភ្លាមៗ បន្ទាប់ពីចចារត្រូវរូវគ្នាជាមួយមន្ត្រីឈ្មោះរដ្ឋា រីឯដំណើរការបញ្ជល់មាន់ក៏ចាប់ផ្ដើមវិញដែរ ដែលចាត់ចែងដោយផ្ទាល់របស់មន្ត្រីឈ្មោះនូ រដ្ឋា តែម្ដង ។ តាមការស្រង់សំដីថា កម្លាំងសមត្ថកិច្ចដែលចុះដល់សង្វៀនមាន់នេះ គឺជាកូនចៅរបស់លោកសោម គោវិត នាយរងការិយាល័យព្រហ្មទណ្ឌកំរិតស្រាល។ ប្រភពក៏បានស្រង់សំដីម្ចាស់សង្វៀនឈ្មោះនូ រដ្ឋា ដែរ ដោយមន្ត្រីរូបនេះបាននិយាយថា មុនពេលបើកសង្វៀនមាន់នេះ ខ្លួនបានទាក់ទងប្រាប់លោកសោម គោវិត រួចហើយ តែមិនដឹងយ៉ាងម៉េចបានជាបញ្ជាឲ្យកម្លាំងចុះមកកន្លែងខ្លួនទៀត… ឬក៏ច្រឡំកន្លែងទេដឹង?។
លោកសោម គោវិត នាយរងការិយាល័យព្រហ្មទណ្ឌកំរិតស្រាល មិនអាចទាក់ទងសុំការបំភ្លឺបានទេ នៅព្រឹកថ្ងៃទី២៦វិច្ឆិកា ជុំវិញកិច្ចប្រតិបត្តិការចុះពិនិត្យទីតាំងសង្វៀនមាន់របស់មន្ត្រីឈ្មោះនូ រដ្ឋា ខាងលើនេះ។ ដោយឡែកលោកឧត្តមសេនីយត្រី ជេត វណ្ណនី ស្នងការរងខេត្តបានបំភ្លឺអំពីករណីនេះដែរថា លោកសោម គោវិត នាយរងការិយាល័យព្រហ្មទណ្ឌកំរិតស្រាល បានរាយការណ៏ប្រាប់លោកដែរអំពីការចុះទៅកាន់ទីទាំងសង្វៀនមាន់ខាងលើនេះ តែរហូតដល់ពេលនេះ មិនឃើញមានលទ្ធផលអ្វីទេ។ លោកស្នងការរងក៏បានបញ្ជាក់ដែរថា លោកនឹងសួរនាំមន្ត្រីដែលបើកល្បែងនេះ ព្រោះខ្លួនជាសមត្ថកិច្ចមិនគួរពាក់ព័ន្ធនឹងបនល្បែងដូច្នេះឡើយ។
គួរកត់សម្គាល់ដែរថា ល្បែងស៊ីសងគ្រប់ប្រភេទហាក់កំពុងកើតមានស្ទើរគ្រប់តាមបណ្ដាស្រុក និងក្រុង ក្នុងខេត្តបាត់ដំបង ដែលទីតាំងល្បែងខ្លះត្រូវគេសង្ស័យថា ការពារដោយមន្ត្រីខិលខូចមួយចំនួនយ៉ាងពេញទំហឹងតែម្ដង។ ឧទាហរណ៍ ដូចជាសង្វៀនបញ្ជល់មាន់ អាប៉ោង បៀរ និងហ្គេមបាញ់ត្រី ដែលកំពុងបើកដំណើរយ៉ាងគគ្លើន ជ្រោកក្រោមកន្ទុយស្លាកកាស៊ីណូ និងក្រោមក្លៀកសមត្ថកិច្ចស្រុកសំពៅលូន ជាដើម ដែលគ្មានការបង្ក្រាបឡើយ។
ជុំវិញបទល្មើសល្បែងស៊ីសងគ្មានច្បាប់ដែលកំពុងជ្រោកក្រោមក្លៀកសមត្ថកិច្ចខិលខូចមួយចំនួន ដែលមន្ត្រីថ្នាក់ក្រោមព្យាយាមបិតបាំងទាំងនេះ លោកឧត្តមសេនីយទោ អ៊ុច សុខុន ស្នងការខេត្ត ធ្លាប់លើកទឹកចិត្តដល់អ្នកសារព័ត៌មាននានា តាមរយៈកោះសន្តិភាពឱ្យជួយផ្ដល់ព័ត៌មាន ឬរាយការណ៍អំពីទីតាំងបទល្មើសផ្សេងៗភាពអសកម្មរបស់សមត្ថកិច្ច មន្ត្រីទាំងឡាយណា ដែលនៅពីក្រោយនៃបនល្បែងស៊ីសង ដល់រូបលោកឲ្យបានដឹងផង ព្រោះលោកមិនអាចមើលសព្វគ្រប់ទេ ។
លោកអ៊ុច សុខុន បានមានប្រសាសន៍បែបនេះ ក្រោយពេលលោកទើបចូលកាន់ដំណែងស្នងការខេត្តបាត់ដំបង ទើបបានប៉ុន្មានខែប៉ុណ្ណោះ។ កាលនោះ លោកស្នងការខេត្តបានបញ្ជាក់ថា នៅខេត្តបាត់ដំបងនេះលោក គ្មានសាច់ញាតិ គ្មានបក្សពួកគេ គឺមកតែ២នាក់តៃកុងឡានរបស់លោកតែប៉ុណ្ណោះ។ លោកស្គាល់ឬដឹងមិនសព្វទេ ដូច្នេះលោកសុំឲ្យអ្នកសារព័ត៏មានជួយផ្ដល់ព័ត៏មានឬរាយការណ៏ឲ្យលោកបានដឹងផង ប្រសិនបើដឹងអំពីបទល្មើសអ្វីមួយ ដែលមន្ត្រីរបស់លោកលាក់បាំងមិនរាយការណ៍។ ប៉ុន្តែយ៉ាងនេះក្ដី ជុំវិញបទល្មើសល្បែងស៊ីសងគ្មានច្បាប់ទម្លាប់នេះ បច្ចុប្បន្នគេឃើញមានការផ្សព្វផ្សាយជាហូរហែរតាមបណ្ដាអង្គភាពសារព័ត៏មានផង ទាំងនៅតាមបណ្ដាញសង្គមនានា ប៉ុន្តែហាក់ដូចជាមិនបានជ្រាបដល់លោកស្នងការខេត្តឡើយ។ ផ្ទុយទៅវិញបនល្បែងកាន់រីកធំធាត់ រហូតអ្នកប្រព្រឹត្តមួយចំនួនមានសមាសភាពជាមន្ត្រីរបស់លោកស្នងការទៀតផង។
គេរងចាំមើលថា តើលោកស្នងការខេត្តនឹងមានវិធានការបែបណាឲ្យមានប្រសិទ្ធភាព ចំពោះបញ្ហាល្បែងស៊ីសងដែលកំពុងដើរទន្ទឹមគ្នាជាមួយនឹងបទល្មើស«អំពើចោរកម្ម» ស្ទើរគ្រប់ទីកន្លែងនេះ ? មតិនានាបានលើកឡើងថា បនល្បែងគ្រប់ទីកន្លែងដែលកំពុងដំណើរសព្វថ្ងៃ បើគ្មានមន្ត្រីខិលខូចមួយចំនួននៅកាងពីក្រោយទេ គ្មានកន្លែងណាមួយអាចដំណើរការបានឡើង។ ចំពោះផែនការលុបបំបាត់ល្បែងស៊ីសង ដែលសម្ដេចក្រឡាហោមស ខេង តែងក្រើនរំលឹកជារឿយៗ ដល់លោកអភិបាលខេត្ត ឬ សមត្ថកិច្ចគ្រប់ស្ថាប័នក្នុងខេត្ត ឲ្យមានវិធានការទប់ស្កាត់ឬបង្ក្រាបឲ្យខាងតែបាននោះ ទំនងមិនអាចទៅរួចឡើយ ដោយសារតែថ្នាក់ក្រោមមិនស្ដាប់និងគ្មានឆន្ទៈក្នុងការអនុវត្ត៕
ចែករំលែកព័តមាននេះ