រាជធានីភ្នំពេញ ៖ វិស័យកាត់ដេរសម្លៀកបំពាក់ និងស្បែកជើង នៅតែឈរលំដាប់កំពូល ក្នុងការជំរុញកំណើនសេដ្ឋកិច្ចកម្ពុជា ឬអាចហៅបានថា ជាឆ្អឹងខ្នងសំខាន់ក្នុងវិស័យសេដ្ឋកិច្ច ហើយក្នុងវិស័យនេះក៏បានស្រូបទាញកម្លាំងពលកម្មប្រមាណជិត១លាននាក់ផងដែរ ដោយក្នុង១ខែ ត្រូវចំណាយប្រមាណ២០០លានដុល្លារអាមេរិក សម្រាប់បើកជូនកម្មករកម្មការិនី ។ នេះបើតាមការបញ្ជាក់ពីប្រធានសមាគមរោងចក្រកាត់ដេរសម្លៀកបំពាក់ និងស្បែកជើងកម្ពុជា ហៅកាត់ថា (GMAC) ។
យោងតាមប្រសាសន៍លោកឧកញ៉ា វ៉ាន់ សូអៀង ប្រធានសមាគមនេះបានឲ្យដឹង បច្ចុប្បន្ននេះ កម្មករ កម្មការិនីដែលកំពុងបំរើការនៅក្នុងវិស័យកាត់ដេរនៅតាមរោងចក្រដែលជាសមាជិករបស់មាគម ទាំងអ្នកបម្រើការពេញម៉ោង និងក្រៅម៉ោងសរុបទាំងអស់ប្រមាណ៩០ម៉ឺននាក់ ហើយក្នុង១ខែៗ ត្រូវចំណាយប្រាក់ប្រមាណ ២០០លានដុល្លារអាមេរិកសម្រាប់បើកជូនពួកគាត់ ព្រោះថា ប្រាក់ខែគោលពួកគាត់ក៏បានកើនឡើងជាបន្តបន្ទាប់ ហើយក្នុង១ខែៗ ពួកគាត់ក៏ទទួលបានប្រាក់ថែមម៉ោង និងប្រាក់លើកទឹកចិត្តផ្សេងៗ ។
លោកឧកញ៉ាបញ្ជាក់ថា ៖« ប្រាក់ខែកម្មករ កម្មការិនី បានកើនឡើងជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ។ ជាក់ស្ដែងកាលពីឆ្នាំ២០១៧ ប្រាក់ខែគោលរបស់ពួកគាត់មានចំនួន១៥៣ដុល្លារអាមេរិក ហើយរហូតមកដល់ឆ្នាំ២០១៨នេះ ប្រាក់ខែគោលបានកើនឡើងដល់១៧០ដុល្លារ និងត្រៀមឡើងដល់១៨២ដុល្លារអាមេរិក នៅឆ្នាំ២០១៩ខាងមុខនេះ ដូចនេះឃើញថាបានកើនឡើងជាបន្ត
បន្ទាប់ »។
លោកបញ្ជាក់បន្ថែមថា ទន្ទឹមនឹងប្រាក់ខែគោលកម្មករ កម្មការិនី បានកើនឡើងជាបន្តបន្ទាប់បែបនេះ ខាងរោងចក្រក៏បានបង្វែរពីការផលិតសម្ភារដែលមានតម្លៃទាប ទៅផលិតសម្ភារដែលមានតម្លៃខ្ពស់ ហើយបច្ចុប្បន្ននេះ ខាងថៅកែរោងចក្រមួយចំនួន បានចាប់ផ្ដើមផលិតនូវសម្ភារធ្វើដំណើរដូចជាវ៉ាលីស និងកាបូបស្ពាយ សម្រាប់នាំចេញទៅកាន់សហរដ្ឋអាមេរិក ជាដើម ។
លោក ខេន លូ អគ្គលេខាធិការសមាគមរោងចក្រកាត់ដេរសម្លៀកបំពាក់ និងស្បែកជើងកម្ពុជា បានឲ្យដឹងថា បើប្រៀបប្រាក់ខែគោលរវាងកម្មករ កម្មការិនីរោងចក្រកាត់ដេរ ទៅនឹងប្រទេសមួយចំនួនក្នុងតំបន់ កម្ពុជាចង់ខ្ពស់ជាងគេបន្តិចហើយ ប៉ុន្តែការចំណាយដូចជាអគ្គិសនីជាដើមនោះ នៅមានកម្រិតខ្ពស់ជាងគេទៅវិញ។ ដូចនេះ បើសិនជារាជរដ្ឋាភិបាលអាចមានលទ្ធភាពបញ្ចុះតម្លៃអគ្គិសនីឲ្យទាបជាងនេះបន្តិច ក៏កាន់តែល្អ ហើយថៅកែរោងចក្រ នឹងកាន់តែមានលទ្ធភាពសម្រាប់បន្តឡើងប្រាក់ខែជូនកម្មករដែរ ។ លោកថា ៖« វានឹងពិបាកណាស់សម្រាប់ថៅកែរោងចក្រ បើសិនជាប្រាក់ខែកម្មករនៅតែបន្តកើនឡើង ហើយបើគ្មានការសម្របសម្រួលណាមួយសមរម្យសម្រាប់ឲ្យថៅកែរោងចក្រទទួលបានផលចំណេញមកវិញនោះទេ វានឹងអាចប្រឈមនឹងការបិទរោងចក្រកាត់តែច្រើនផងដែរ » ។ លោកបញ្ជាក់ថា ៖« បច្ចុប្បន្ននេះ រោងចក្រនៅកម្ពុជា មានបើកមានបិទ ហើយការបើកបិទ នេះ នៅមានភាពស៊ីចង្វាក់គ្នានៅឡើយ មានន័យថាបិទនិងបើកគឺប្រហាក់ប្រហែលគ្នា ឬអាចបើកច្រើនជាងបិទបន្តបន្តួច »។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងកន្លងមកថា វិស័យកាត់ដេរកម្ពុជានៅតែមានភាពរឹងមាំ ហើយវិស័យនេះនៅតែជាចន្ទល់យ៉ាងសំខាន់សម្រាប់ទ្រទ្រង់កំណើនសេដ្ឋកិច្ចជាតិ ដែលត្រូវការយកចិត្តទុកដាក់ចំពោះសុខុមាលភាពរបស់វិស័យនេះ ។ លោកបន្តថា ៖« ការធ្វើពិពិធកម្មរបស់វិស័យនេះ បានធ្វើឲ្យកម្ពុជាទទួលបានតម្លៃបន្ថែមកាន់តែច្រើន ហើយនៅពេលរោងចក្រកាត់ដេរមានកាន់តែច្រើនធ្វើការផលិតទំនិញដែលមានតម្លៃខ្ពស់ នឹងធ្វើឲ្យចំណូលពីវិស័យនេះមានកំណើនខ្ពស់ »។
យោងតាមរបាយការណ៍របស់ក្រសួងពាណិជ្ជកម្មកម្ពុជា បានបង្ហាញថា ក្នុងរយៈពេល៧ខែដើមឆ្នាំ២០១៨ កម្ពុជានាំចេញសម្លៀកបំពាក់ទៅកាន់ទីផ្សារអន្តរជាតិមានទំហំទឹកប្រាក់៤.៤២៥លានដុល្លារអាមេរិក ក្នុងនោះ ទីផ្សារអឺរ៉ុប និងសហរដ្ឋអាមេរិក ជាទីផ្សារធំ និងសំខាន់សម្រាប់ផលិតផលវាយនភ័ណ្ឌរបស់កម្ពុជា ៕
ចែករំលែកព័តមាននេះ