ខេត្តសៀមរាប ៖ នាយប់ថ្ងៃទី២២ ខែវិច្ឆិកា ឆ្នាំ២០១៨ នេះអាជ្ញាធរខេត្តសៀមរាបបានរៀបចំប្រារព្ធពិធីអកអំបុកសំពះព្រះខែ និងបណ្តែតប្រទីប ក្នុងគោលបំណងផ្សព្វផ្សាយវប្បធម៌ជាតិ ឱ្យកូនចៅខ្មែរគ្រប់ជំនាន់បានយល់ចងចាំ និងបណ្តុះឧត្តមគតិមនសិការជាតិជាមួយនឹងការបង្ហាញឱ្យភ្ញៀវទេសចរអន្តរជាតិទទួលស្គាល់នូវភាពសំបូរបែបនៃប្រពៃណីទំនៀមទម្លាប់របស់ខ្មែរ ។
ដែលពិធីនេះបានប្រព្រឹត្តទៅក្រោមអធិបតីភាពលោកបណ្ឌិត ឃឹម ប៊ុនសុង អភិបាលខេត្តសៀមរាប និងលោកជំទាវ និងលោក អ៊ឹង ហឿន ប្រធានក្រុមប្រឹក្សាខេត្តសៀមរាប ដោយមានការចូលរួមពីសំណាក់អស់លោក លោកជំទាវ លោក លោកស្រី ជាសមាជិកព្រឹទ្ធសភា សមាជិកសភាមណ្ឌលសៀមរាប សមាជិកក្រុមប្រឹក្សាខេត្ត គណៈអភិបាលខេត្ត មេបញ្ជាការ មេបញ្ជាការរងយោធភូមិភាគទី៤ តំបន់ប្រតិបត្តិការសឹករងសៀមរាប បញ្ជាការដ្ឋានកងរាជអាវុធហត្ថខេត្តស្នងការ ស្នងការរងនគរបាលខេត្តថ្នាក់ដឹកនាំមន្ទីរ អង្គភាពនានា មន្ត្រីអ្នកមុខអ្នកការក្នុងខេត្ត និងបងប្អូនប្រជាពលរដ្ឋក្នុងខេត្តយ៉ាងច្រើនកុះករ ។
ថ្លែងសុន្ទរកថា បើកការប្រារព្ធពិធីអកអំបុកនេះលោក បណ្ឌិត ឃឹម ប៊ុនសុង អភិបាលខេត្តសៀមរាបបានបញ្ជាក់ថា ពិធីនេះ គឺជាផ្នែកមួយដ៏សំខាន់នៅក្នុងព្រឹត្តិការណ៍វប្បធម៌ប្រពៃណី ប្រចាំឆ្នាំដ៏ធំនេះដូចជា ពិធីអកអំបុក សំពះព្រះខែ និងបណ្តែតប្រទីបជាបវេណីមួយដែលប្រជានុរាស្ត្រខ្មែរតាំងពីបុរាណតែងតែប្រារព្ធរៀបចំឡើង ហើយត្រូវបានប្រជារាស្ត្រខ្មែរទូទាំងប្រទេសអនុវត្តបន្តពីបុព្វការីរបស់ខ្លួន ក្នុងសក្ខីភាពបញ្ជាក់អំពីទឹកចិត្តគោរពស្រឡាញ់ និងការអភិរក្សសម្បត្តិបេតិកភណ្ឌអរូបីយលើកកម្ពស់ប្រពៃណីទំនៀមទម្លាប់ខ្មែរដ៏ល្អផូរផង់ឱ្យបានគង់វង្ស ស្ថិតស្ថិរ សម្រាប់បច្ចុប្បន្ន និងតទៅអនាគត ដើម្បីជាការរំលឹកដឹងគុណដល់ផែនដីដែលបានទ្រទ្រង់ឱ្យជីវិតមនុស្សសត្វ អាចរស់រានបន្តពូជពង្សបង្កលក្ខណៈគ្រប់ភាវរស់អាចសម្របខ្លួន និងរស់នៅរីកធំធាត់តាមប្រភេទលក្ខណៈភូមិសាស្ត្រ និងការវិវត្តន៍នៃសង្គមបរិយាកាសទូទៅរបស់ធម្មជាតិ ។
លោក បណ្ឌិត ឃឹម ប៊ុនសុង បានបញ្ជាក់ទៀតថា ព្រះរាជពិធីបុណ្យអុំទូកបណ្តែត ប្រទីប អកអំបុក និងសំពះព្រះខែ គឺជាព្រឹត្តិការណ៍វប្បធម៌ជាតិដ៏ធំមួយមានលក្ខណៈជាប្រវត្តិសាស្ត្រ ជាបេតិកភណ្ឌជាតិអរូបីយមានតម្លៃសម្រាប់ទ្រទ្រង់ថែរក្សាព្រលឹង និងអត្តសញ្ញាណជាតិ តាមរយៈនៃការលើកកម្ពស់តម្លៃវប្បធម៌សង្គមកម្ពុជា ដែលជារដ្ឋមួយមានចំណាស់ក្នុងប្រវត្តិសាស្ត្រ ធ្លាប់មានអារ្យធម៌ល្បីល្បាញក្នុងតំបន់អាស៊ីអាគ្នេយ៍ ហើយបានប្រព្រឹត្តទៅក្រោមដំបូលនៃសន្តិភាព ឧត្តមភាពនៃវប្បធម៌ និងការផ្សព្វផ្សាយព្រឹត្តការណ៍នេះ និងបង្កើននូវភាពទាក់ទាញថ្មីថែមទៀតដល់ភ្ញៀវទេសជាតិ ភ្ញៀវអន្តរជាតិ ឱ្យមកទស្សនាខេត្តសៀមរាបឱ្យកាន់តែច្រើនឡើងៗ ពីមួយឆ្នាំទៅមួយឆ្នាំ ។
ដូច្នេះការប្រារព្ធពិធីនេះឡើង គឺផ្តើមចេញពីការអភិរក្សឱ្យបានល្អនូវប្រពៃណីទំនៀមទម្លាប់របស់ខ្មែរ រក្សាតម្លៃអត្តសញ្ញាណជាតិឱ្យបានគង់វង្ស ហើយក៏ជាការបង្កើតព្រឹត្តិការណ៍ទេសចរណ៍វប្បធម៌ប្រវត្តិសាស្ត្រ លើទឹកដីអច្ឆរិយៈ បង្កបរិយាកាសសប្បាយរីករាយជូនដល់បងប្អូនប្រជាពលរដ្ឋគ្រប់មជ្ឈដ្ឋាន និងបានស្វែងយល់អំពីរបៀបរៀបចំយល់ដឹងអំពីអត្ថន័យខ្លឹមសារនៃពិធីជំនឿប្រពៃណីសាសនាមរតកដូនតាខ្មែរ ៕
ចែករំលែកព័តមាននេះ