រាជធានីភ្នំពេញ ៖ ជនសង្ស័យ ជាឃាតករស្រី-ប្រុស២នាក់ ត្រូវបានកម្លាំងនគរបាលខណ្ឌសែនសុខស្រាវជ្រាវ និងឃាត់ខ្លួនបន្ទាប់ពីធ្វើទារុណកម្មលើនារីរកស៊ីផ្លូវភេទម្នាក់រហូតដល់ស្លាប់ ហើយយកសពទៅចោលនៅឈាបនដ្ឋានវត្តទឹកថ្លា កាលពីថ្ងៃទី១៥ ខែវិច្ឆិកា កន្លងមក ។
នៅវេលាម៉ោង១០ព្រឹកថ្ងៃទី១៩ ខែវិច្ឆិកា នគរបាលខណ្ឌសែនសុខ សហការជាមួយនគរបាលបច្ចេកទេសនិងនគរបាលខណ្ឌទួលគោក ក៏បានធ្វើការឆែកឆេរផ្ទះម៉ាស្យាកោសជប់នៅតំបន់ត្រឡោកបែក តាមផ្លូវលេខ៥៩៨ ក្នុងសង្កាត់ទឹកល្អក់ទី១ ខណ្ឌទួលគោក ដើម្បីរកវត្ថុតាង ។ ទោះបីជាយ៉ាងណាក្តីការឃាត់ខ្លួន ជនសង្ស័យ ជាឃាតករនេះនគរបាលពុំបានផ្តល់ព័ត៌មានពីអត្តសញ្ញាណជនសង្ស័យនៅឡើយ ដោយអះអាងថា ទុកស្រាវជ្រាវបន្ត ។
គួរបញ្ជាក់ថា នារីអាយុប្រមាណជាង២០ឆ្នាំ ជាជនជាតិវៀតណាមម្នាក់ ត្រូវបានជនមិនស្គាល់មុខ ដឹកតាមរ៉ឺម៉កម៉ូតូយកទៅទុកតម្កល់នៅឈាបនដ្ឋានវត្តទឹកថ្លា កាលពីវេលារំលងអធ្រាត្រចូលថ្ងៃទី១៥ ខែវិច្ឆិកា ។ បន្ទាប់ពីដឹកទៅដល់វត្ត បុរសម្នាក់ក៏បានប្រាប់ថា ទៅហៅបងប្អូន រួចក៏បានគេចបាត់ទៅដូចដឹកខ្មោចយកទៅចោល ។ លុះស្អែកឡើងអត់ឃើញមានសាច់ញាតិណាមកសួរនាំចាត់ចែងសោះ រហូតដល់រសៀល តាអាចារ្យក៏បានរាយការណ៍ប្រាប់នគរបាលជំនាញចុះទៅត្រួតពិនិត្យ ។
តាមការត្រួតពិនិត្យលើសពនារីម្នាក់នោះបានរកឃើញថា ត្រូវបានគេវាយនិងធ្វើទារុណកម្មយ៉ាងធ្ងន់ធ្ងរ វាយដំស្ទើរសុះសាច់ ទើបបណ្តាលឲ្យរងរបួសជាំពេញខ្លួនរហូតដល់ស្លាប់ ។តាមព័ត៌មានឲ្យដឹងថា ដោយមានការស្រាវជ្រាវពីនគរបាលខណ្ឌសែនសុខ ក៏ឈានទៅឃាត់បានជនសង្ស័យ២នាក់ ប្រុសម្នាក់ស្ត្រីម្នាក់កាលពីវេលាយប់ថ្ងៃទី១៨ ខែវិច្ឆិកា ដោយសង្ស័យពាក់ព័ន្ធក្នុងការធ្វើទារុណកម្មស្រីរូបនោះរហូតដល់ស្លាប់ ។ បុរសម្នាក់ដែលត្រូវបានឃាត់ខ្លួនត្រូវគេដឹងថា ជាជើងកាងផ្ទះបននៅតំបន់ត្រឡោកបែក ។
បន្ទាប់ពីឃាត់ខ្លួននៅព្រឹកថ្ងៃទី១៩ ខែវិច្ឆិកា នគរបាលក៏បានចុះទៅឆែកឆេរផ្ទះបនស្រី ជ្រកក្រោមស្លាកម៉ាស្យាកោសជប់ ដែលជាកន្លែងសង្ស័យធ្វើទារុណកម្មមកលើនារីរកស៊ីផ្លូវភេទ ព្រោះជនសង្ស័យម្នាក់បានឆ្លើយសារភាពហើយ ។
ទោះបីជាយ៉ាងណា មេបនដែលជាមេខ្លោងបានគេចខ្លួនបាត់ ។ ប៉ុន្តែដោយឃើញផ្ទះបិទទ្វារចាក់សោជាប់ សមត្ថកិច្ចក៏ធ្វើតាមច្បាប់ដោយលីកន្រៃ្តយក្សទៅកាត់ទ្វារដែកបើកមើល ព្រោះសង្ស័យថាជាទីតាំងធ្វើទារុណកម្ម រហូតដល់ស្លាប់ស្ត្រីម្នាក់យកទៅចោល ៕
ចែករំលែកព័តមាននេះ