រាជធានីភ្នំពេញ ៖ រថយន្តសេរីទំនើប២គ្រឿង ខណៈអ្នកបើកបរខ្វះការប្រុងប្រយ័ត្ននៅផ្លូវបំបែកជាបួនក៏ជ្រុលទៅបុកគ្នាពេញទំហឹង បណ្តាលឲ្យរថយន្តបង្ករេចង្កូតជ្រុលទៅបុក នឹងកន្លែងលក់បាយធ្វើឲ្យរថយន្តរងការខូចខាតយ៉ាងដំណំ តែសំណាងល្អមិនមានគ្រោះថ្នាក់ដល់មនុស្ស ។
ហេតុការណ៍នេះដែរបានកើតឡើងនៅវេលាម៉ោង១២រំលងអធ្រាត្រឈានចូលថ្ងៃទី១៦ ខែវិច្ឆិកា ឆ្នាំ២០១៨ ចំណុចផ្លូវ១០៥ កែងនឹងផ្លូវ៣៤២ សង្កាត់បឹងត្របែក ខណ្ឌចំការមន ។
តាមប្រភព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ វ័យប្រហែលជាង៤០ឆ្នាំបានបើករថយន្តសេរីទំនើបម៉ាក HUMER ពណ៌ស ពាក់ស្លាកលេខ ភ្នំពេញ 2AC- 8007 ធ្វើដំណើរតាមផ្លូវ៣៤២ ក្នុងទិសដៅពីលិចទៅកើត ខណៈមកដល់ចំណុចកើតហេតុជាផ្លូវបំបែកជាបួនក៏ស្រាប់តែបុរសម្នាក់រួមដំណើរជាមួយនឹងនារីវ័យក្មេង២នាក់ បានបើករថយន្តបង្កម៉ាកកាមរី សេរីឆ្នាំ២០០៧ ពណ៌ស ពាក់ស្លាកលេខ ភ្នំពេញ 2AP- 5139 បានធ្វើដំណើរតាមផ្លូវ១០៥ ក្នុងទិសដៅពីត្បូងទៅជើងបោះពួយយ៉ាងលឿនដោយមិនបន្ថយល្បឿននោះទេធ្វើឲ្យរថយន្តជ្រុលទៅបុកនឹងរថយន្តម៉ាក HUMER ចំពីមុខចំហៀងខាងស្តាំពេញទំហឹង បណ្តាលឲ្យរថយន្តទាំងពីរគ្រឿងរេចង្កូតជ្រុលទៅបុកនឹងកន្លែងលក់បាយផ្ទប់ទៅនិងបង្កាន់ដៃលូទឹកស្អុយ ធ្វើឲ្យរថយន្តរងការខូចខាតខ្ទេចផ្នែកខាងមុខយ៉ាងដំណំទាំងពីរគ្រឿង និងម្ហូបអាហារខ្ទាតរប៉ាត់រប៉ាយពាសពេញផ្លូវតែម្តង ហើយនៅក្នុងហេតុការណ៍នេះដែរ មិនមានអ្នករងរបួសធ្ងន់ធ្ងរនោះទេ គ្រាន់តែមានអ្នកខ្លះត្រូវដៃត្រូវជើងបន្តិចបន្តួចតែប៉ុណ្ណោះ។
ក្រោយពេលកើតហេតុភាគីទាំងសង្ខាងបានសម្របសម្រួលដោយមិនរំខានដល់សមត្ថកិច្ចនោះទេ គឺខាងរថយន្តបង្កកាមរីសេរីឆ្នាំ២០០៧ ដឹងខ្លួនខុសសុខចិត្តសង់ថ្លៃម្ហូបអាហារដែលរងការខូចខាត និងយករថយន្តរងគ្រោះ HUMER ទៅជួសជុលឲ្យវិញ ដើម្បីបញ្ចប់រឿង ៕
ចែករំលែកព័តមាននេះ