រាជធានីភ្នំពេញ ៖ ពលរដ្ឋខ្មែរ៤នាក់ បានរងរបួស(៣នាក់ស្រាល និងធ្ងន់ម្នាក់) ក្នុងចំណោមអ្នករងគ្រោះ ចំនួន១៤នាក់ ដោយសារជនភេរវករម្នាក់បានបើករថយន្តមួយគ្រឿងចូលទៅស្នាក់ការ អង្គការសហប្រជាជាតិ នៅនៅហ្គាវ ប្រទេសម៉ាលី កាលពីថ្ងៃទី១៣ ខែវិច្ឆិកា ២០១៨។ នេះបើតាមសេចក្តីប្រកាសព័ត៌មានរបស់ ក្រសួងការពារជាតិចេញនៅផ្សាយនៅថ្ងៃទី១៥ ខែវិច្ឆិកា ២០១៨។
ក្រសួងការពារជាតិបានលើកឡើងថា នៅវេម៉ោង៧ និង១២យប់ ថ្ងៃទី១២ ខែវិច្ឆិកា ឆ្នាំ២០១៨ (ម៉ោងនៅប្រទេសម៉ាលី) ត្រូវនឹងព្រឹកថ្ងៃទី១៣ ខែវិច្ឆិកា ឆ្នាំ២០១៨ (ម៉ោងនៅកម្ពុជា) មានករណីបំផ្ទុះគ្រាប់បែក អត្តឃាតមួយបង្កឡើងដោយក្រុមភេរវករបើករថយន្តចូលទៅបំផ្ទុះនៅក្នុង ទីតាំងនៅស្នាក់ការរបស់អង្គការសហប្រជាជាតិនៅប្រទេសម៉ាលី។
ក្រសួងការពារបានអះអាងថា ហេតុការណ៍នេះបណ្តាលឲ្យភេរវករមា្នក់ដែលបានធ្វើការបំផ្ទុះនោះគ្រាប់បែកបានស្លាប់នៅនឹងកន្លែង និងបាត់បង់ជនជាតិម៉ាលី២នាក់ ព្រមទាំងមានអ្នករងរបួស១៤នាក់ ដែលក្នុងនោះមានពលរដ្ឋខ្មែរ ធ្វើការងារជាមួយអង្គការសហប្រជាតិចំនួន៤នាក់ផងដែរ(ម្នាក់ធ្ងន់ និង៣នាក់ស្រាល)។ ចំណែកកម្លាំងរក្សាសន្តិភាពរបស់កម្ពុជា(ទាហានមួកខៀវ) ដែលបំពេញការងារនៅតំបន់នេះ មិនមានគ្រោះថ្នាក់ដោយហេតុការណ៍ខាងលើនោះទេ។
ក្រសួងការពារជាតិបានលើកឡើងថា រហូតមកដល់ពេលនេះ ជនរងគ្រោះជនជាតិខ្មែរ ត្រូវបានបញ្ជូនទៅព្យាបាលនៅមន្ទីរពេទ្យកម្រិត២ របស់ចិននៅប្រទេសម៉ាលី។ ចំណែកឯអ្នករបួសស្រាលត្រូវបានបញ្ជូនទៅព្យាបាលនៅ មន្ទីរពេទ្យក្បែរនោះ៕
ចែករំលែកព័តមាននេះ