រាជធានីភ្នំពេញ ៖ សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញដឹកនាំគណៈប្រតិភូជាន់ខ្ពស់អញ្ជើញទៅចូលរួមក្នុងកិច្ចប្រជុំកំពូលអាស៊ាន លើកទី៣៣ និងកិច្ចប្រជុំពាក់ព័ន្ធនៅប្រទេសសិង្ហបុរីរយៈពេល៣ថ្ងៃ (១៣-១៥) វិច្ឆិកា ឆ្នាំ២០១៨…
រាជធានីភ្នំពេញ ៖ សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញដឹកនាំគណៈប្រតិភូជាន់ខ្ពស់អញ្ជើញទៅចូលរួមក្នុងកិច្ចប្រជុំកំពូលអាស៊ាន លើកទី៣៣ និងកិច្ចប្រជុំពាក់ព័ន្ធនៅប្រទេសសិង្ហបុរីរយៈពេល៣ថ្ងៃ (១៣-១៥) វិច្ឆិកា ឆ្នាំ២០១៨ ។
កិច្ចប្រជុំកំពូលអាស៊ានលើកទី៣៣ និងកិច្ចប្រជុំកំពូលពាក់ព័ន្ធនេះ គឺប្រព្រឹត្តទៅក្រោមមូលបទ «ភាពរឹងមាំ និងនវានុវត្តន៍របស់អាស៊ាន» ។ ការអញ្ជើញរបស់សម្តេចតេជោនាយករដ្ឋមន្ត្រីក្នុងកិច្ចប្រជុំកំពូលអាស៊ាននេះធ្វើឡើងតបតាមការអញ្ជើញរបស់លោក លី សៀនឡុង (Lee Hsien Loong) នាយករដ្ឋមន្ត្រីនៃសាធារណរដ្ឋសិង្ហបុរី ។
ក្រៅពីចូលរួមកិច្ចប្រជុំកំពូលអាស៊ានហើយនោះសម្តេចតេជោ ហ៊ុន សែន នឹងអញ្ជើញចូលរួមកិច្ចប្រជុំកំពូលពាក់ព័ន្ធជាច្រើនផ្សេងទៀតដូចជា កិច្ចប្រជុំកំពូលក្រៅផ្លូវការអាស៊ាន-អូស្ត្រាលី អមដោយអាហារពេលព្រឹក កិច្ចប្រជុំកំពូលអាស៊ាន-ចិន លើកទី២១ កិច្ចប្រជុំកំពូលអាស៊ាន -សាធារណរដ្ឋកូរ៉េលើកទី២០ កិច្ចប្រជុំកំពូលអាស៊ាន-រុស្ស៊ី លើកទី៣ កិច្ចប្រជុំកំពូលអាស៊ាន-ជប៉ុន លើកទី២១ កិច្ចប្រជុំកំពូលក្រៅផ្លូវការអាស៊ាន-ឥណ្ឌា អមដោយអាហារពេលព្រឹក កិច្ចប្រជុំកំពូលអាស៊ាន-សហរដ្ឋអាមេរិក លើកទី៦ កិច្ចប្រជុំកំពូលអាស៊ានបូក៣ លើកទី២១ កិច្ចប្រជុំកំពូលអាស៊ីបូព៌ាលើកទី១៣ (ពេញអង្គ) កិច្ចប្រជុំកំពូលអាស៊ីបូព៌ា (ចង្អៀត) អមដោយអាហារថ្ងៃត្រង់ និងកិច្ចប្រជុំថ្នាក់ដឹកនាំនៃភាពជាដៃគូសេដ្ឋកិច្ចទូលំទូលាយក្នុងតំបន់លើកទី២ ។
ស្របពេលអញ្ជើញចូលរួមកិច្ចប្រជុំកំពូលនេះសម្តេចតេជោនាយករដ្ឋមន្ត្រីនឹងអញ្ជើញចូលរួមក្នុងប្រជុំ និងកម្មវិធីមួយចំនួនទៀតដូចជា កិច្ចប្រជុំជាមួយក្រុមប្រឹក្សាពិគ្រោះយោបល់ធុរកិច្ចអាស៊ាន កម្មវិធីអាហារការងារថ្ងៃត្រង់ រៀបចំដោយលោក លី សៀនឡុង សម្រាប់ថ្នាក់ដឹកនាំអាស៊ាន ពិធីលៀងសាយភោជន៍ (Gala Dinner) រៀបចំដោយប្រធានកិច្ចប្រជុំសម្រាប់ថ្នាក់ដឹកនាំអាស៊ាន និងជំនួបទ្វេភាគីជាមួយប្រមុខគណៈប្រតិភូនៃប្រទេសមួយចំនួនផងដែរ ៕
ចែករំលែកព័តមាននេះ