សហរដ្ឋអាមេរិក ៖ ពួកអ្នកពន្លត់ភ្លើងកាលីហ្វ័រនីញ៉ា កាលពីថ្ងៃទី១០ វិច្ឆិកា នៅតែតស៊ូជានិច្ចប្រឆាំងភ្លើងឆេះព្រៃដ៏អាក្រក់ដែលសម្លាប់មនុស្សយ៉ាងតិច២៣នាក់ ក្រោយការរកឃើញសាកសពមនុស្ស១៤នាក់ទៀត ហើយផ្ទះជាច្រើនពាន់ខ្នងរងការបំផ្លាញ ខណៈក្ដីសង្ឃឹមថា អាចគ្រប់គ្រងគ្រោះមហន្តរាយនោះបាន…
សហរដ្ឋអាមេរិក ៖ ពួកអ្នកពន្លត់ភ្លើងកាលីហ្វ័រនីញ៉ា កាលពីថ្ងៃទី១០ វិច្ឆិកា នៅតែតស៊ូជានិច្ចប្រឆាំងភ្លើងឆេះព្រៃដ៏អាក្រក់ដែលសម្លាប់មនុស្សយ៉ាងតិច២៣នាក់ ក្រោយការរកឃើញសាកសពមនុស្ស១៤នាក់ទៀត ហើយផ្ទះជាច្រើនពាន់ខ្នងរងការបំផ្លាញ ខណៈក្ដីសង្ឃឹមថា អាចគ្រប់គ្រងគ្រោះមហន្តរាយនោះបាន រយៈពេលប៉ុន្មានថ្ងៃខាងមុខនៅតែគ្មាន។
មនុស្សជាង២៥០.000នាក់ទទួលបញ្ជាឲ្យជម្លៀសចេញ ពីតំបន់មួយយ៉ាងធំជិតរដ្ឋធានីនៃរដ្ឋនោះ នាភាគខាងលិចសហរដ្ឋអាមេរិក។ រហូតមកទល់ពេលនេះសាកសពមនុស្សយ៉ាងតិច២៣នាក់ត្រូវបានរកឃើញ ក្នុងទីក្រុង PARADISE តំបន់ BUTTE ភាគខាងជើងទីក្រុង SACRAMENTO។ ចាប់តាំងពីព្រឹកថ្ងៃទី៨ វិច្ឆិកាមក អគារជាង៦៧០០ភាគច្រើនជាផ្ទះត្រូវភ្លើងលេបត្របាក់ ដែលនោះជាគ្រោះមហន្តរាយភ្លើងឆេះព្រៃដ៏អាក្រក់បំផុត ដែលរដ្ឋកាលីហ្វ័រនីញ៉ាពុំធ្លាប់ជួបប្រទះ។
ជាច្រើនសិបគីឡូម៉ែត្រជុំវិញក្រុង PARADISE ផ្ទៃមេឃក្លាយជាងងឹតដោយសារផ្សែងយ៉ាងក្រាស់ហុយចេញខ្មៅខ្មួល ទាំងព្រះអាទិត្យពិបាកមើលឃើញផងដែរ។ ប្រជាជននាំគ្នារត់ភៀសខ្លួនចេញ រួចតាមដងផ្លូវឆ្ពោះទៅកណ្ដាលក្រុងនេះ គេប្រទះឃើញខ្មោចរថយន្តរងភ្លើងឆេះបំផ្លាញរាយប៉ាយ ចំណែកបង្គោលភ្លើងរោលដោយផ្សែង។ ក្នុងចំណោមអ្នកពន្លត់ភ្លើង៣២០០នាក់ដែលដាក់ពង្រាយ ៣នាក់រងរបួស។ អាជ្ញាធរនិយាយថាយ៉ាងហោចណាស់ គេត្រូវការពេលវេលា ៣សប្ដាហ៍ដែរទើបអាចទប់ទល់ភ្លើងឆេះព្រៃដ៏ធំនោះបាន៕ វីដេអូដកស្រង់ចេញពី ៖ euronews (en français)
ចែករំលែកព័តមាននេះ