ស្នាក់នៅក្បែរនាងហ៊ានម្ល៉េះ! យកលាក់ក្នុងបន្ទប់ បែករឿងត្រឹមកាមេរ៉ា
- ភ្នំពេញ
រាជធានីភ្នំពេញ ៖ ម៉ូតូហុងដាឌ្រីមមួយគ្រឿង ខណៈដែលម្ចាស់ជានារីម្នាក់ចតទុកខាងមុខបន្ទប់ជួលនឹកថា មានសុវត្ថិភាពជុំវិញស្នាក់នៅក្បែរខាងសុទ្ធសឹងតែស្គាល់រាប់អានគ្នា តែផ្ទុយទៅវិញរកសឹងតែមិនជឿសោះ ត្រូវជនសង្ស័យលួចអូសយកទៅលាក់ទុកក្នុងបន្ទប់ បង្កឱ្យឆោឡោរត់ទៅប្តឹងប៉ូលិសបែកធ្លាយរឿងដោយសារកាំមេរ៉ាសុវត្ថិភាពឈានដល់ស្គាល់ភិនភាគ ដឹងច្បាស់ ហើយសមត្ថកិច្ចហៅឆែកបន្ទប់ក៏ប្រទះឃើញម៉ូតូឃាត់ខ្លួន២នាក់…
ជនសង្ស័យ២នាក់សមត្ថកិច្ចឃាត់នាំយកទៅសាកសួរ ១-ឈ្មោះ តាំង ប៉េងតុង ភេទប្រុស អាយុ២២ឆ្នាំ និង២-ឈ្មោះ សាយ ឌុន ភេទប្រុស អាយុ២៤ឆ្នាំ ស្នាក់នៅបន្ទប់ជួលលេខ១២ ក្បែរបន្ទប់នារីរងគ្រោះ ។ ចំណែកម៉ូតូដែលលួចអូសយកទៅលាក់ទុកម៉ាកហុងដាឌ្រីម ពណ៌ខ្មៅ ពាក់ស្លាកលេខ កំពង់ចាម 1L-0373 មានម្ចាស់ឈ្មោះ ផេង ស្រីមុំ ភេទស្រី អាយុ២១ឆ្នាំ មុខរបរជានិស្សិត ស្នាក់នៅបន្ទប់ជួលលេខ១៧ ។
តាមសម្តីនារីរងគ្រោះឲ្យដឹងថា មុនកើតហេតុ ក្រោយវិលមកពីរៀនថ្ងៃត្រង់វិញបានយកម៉ូតូចតទុកមុខបន្ទប់ជួល ហើយរវល់តែនិយាយគ្នាលេងក្នុងបន្ទប់មិនចាប់អារម្មណ៍ រហូតដល់រសៀលនេះចេញមកស្រាប់តែបាត់ម៉ូតូសួរគ្មានអ្នកណាដឹង ទើបឆោឡោរត់ទៅប្តឹងប៉ូលិសភ្លាមៗ ។
នារីរងគ្រោះបន្តថា លុះរហូតមកដល់ម៉ោង៦និង៣០នាទីល្ងាច បន្ទាប់ពីកម្លាំងសមត្ថកិច្ចចុះទៅសាកសួរពិនិត្យស្រាវជ្រាវដល់កន្លែងកើតហេតុ រហូតដល់ពិនិត្យឆែកតាមរយៈកាមេរ៉ាសុវត្ថិភាព ទើបដឹងឃើញស្គាល់ភិនភាពជនសង្ស័យជាមនុស្សស្នាក់នៅក្បែរខាងគ្នាសោះ សមត្ថកិច្ចហៅឆែកឆេរប្រទះឃើញម៉ូតូនារីរងគ្រោះលាក់ទុកក្នុងបន្ទប់លេខ១៧ ទើបឃាត់ខ្លួនមនុស្ស២នាក់ហៅទៅសាកសួរ ។
តាមប្រភពនៅកន្លែងកើតហេតុបានឲ្យដឹងថា បន្ទប់លេខ១៧ មនុស្សស្នាក់នៅ៣នាក់ តែម្នាក់ជិះម៉ូតូចេញទៅបាត់ ហើយបើមើលតាមរយៈកាម៉ារ៉ាគឺអ្នកចេញទៅបាត់នេះជាអ្នកលួចតែម្តងដោយអូសយកទៅលាក់ក្នុងបន្ទប់ ទើបជិះម៉ូតូខ្លួនឯងចេញទៅបាត់សង្ស័យដល់យប់ស្ងាត់ទើបមកយកម៉ូតូលួចបានចេញតាមក្រោយ ។
ទោះជាយ៉ាងណាក្តី អ្នកស្នាក់នៅក្បែរខាងគ្នារាល់ថ្ងៃទៅហើយ ម្តេចមិនស្គាល់ម៉ូតូជារបស់អ្នកណា សមត្ថកិច្ចឃាត់ខ្លួន២នាក់ខាងលើទៅសាកសួរនៅប៉ុស្តិ៍ និងបានឃាត់ខ្លួនបណ្តោះអាសន្នយកទៅអធិការដ្ឋាននគរបាលខណ្ឌសែនសុខតែម្តង ៕
ចែករំលែកព័តមាននេះ