ខេត្តបន្ទាយមានជ័យ ៖ ដើម្បីសន្តិសុខ សណ្តាប់ធ្នាប់ និងសុវត្ថិភាពសង្គម ពិសេសគឺនៅពេលខាងមុខនេះខេត្តបន្ទាយមានជ័យនឹងប្រារព្ធពិធីបុណ្យអុំទូក បណ្តែតប្រទីប អកអំបុក សំពះព្រះខែ និងការតាំងពិព័រណ៍ភូមិ១ផលិតផល១ រួមទាំងមានការប្រឡងជម្រៀង កីឡាប្រដាល់ ដែលឆ្នាំខេះ ខេត្តបន្ទាយមានជ័យ មានគ្រោងកម្មវិធីធំជាងឆ្នាំៗ ។
បើពឹងលើសមត្ថកិច្ច នគរបាល ឬកងរាជអាវុធហត្ថ មិនគ្រប់គ្រាន់ និងគ្រប់ជ្រុងជ្រោយនោះទេ ទាល់តែមានការចូលរួមពីបងប្អូន អ្នករត់ម៉ូតូឌុប ក៏ដូចជាគ្រប់អាជីវករ និងគ្រប់មហាជន ។ នេះគឺជាការថ្លែងរបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ក្នុងឱកាសកោះអញ្ជើញបងប្អូនអ្នករត់ម៉ូតូឌុបជិត១០០នាក់ មកពីសង្កាត់ទាំង៤ក្នុងក្រុងសិរីសោភ័ណ គឺសង្កាត់ព្រះពន្លា អូរអំបិល ទឹកថ្លា និង សង្កាត់កំពង់ស្វាយ នៅថ្ងៃទី១០ ខែវិច្ឆិកា ឆ្នាំ២០១៨ នៅសាលប្រជុំស្នងការនគរបាលខេត្តបន្ទាយមានជ័យ ។
ជាមួយគ្នានោះផងដែរ លោកឧត្តមសេនីយ៍ស្នងការបានថ្លែងអំណរគុណជាមួយបងប្អូនដែលបានចូលរួមជាមួយសមត្ថកិច្ចកន្លងមកបានល្អប្រសើរក្នុងនោះក៏សូមបងប្អូនបន្តការចូលរួមសហការបន្ថែមទៀត ដើម្បីរួមគ្នារក្សាបាននូវសន្តិសុខ សណ្តាប់ធ្នាប់ សុវត្ថិភាព ក្នុងខេត្តយើង ៕
ចែករំលែកព័តមាននេះ