រាជធានីភ្នំពេញ ៖ គណៈកម្មាធិការរដ្ឋធម្មនុញ្ញ និងច្បាប់សភាប្រជាជនចិនដែលទើបនឹង បង្កើត ដើម្បីឆ្នាំ២០១៨ កន្លងមកនេះបានធ្វើការសិក្សាស្វែងយល់ពីច្បាប់កម្ពុជាមុននឹងធ្វើការនិ យោគនៅកម្ពុជា ។
ការសិក្សានេះធ្វើឡើងរវាងលោក លី ហ្វី សមាជិកគណៈកម្មាធិការអចិន្ត្រៃយ៍សភាតំណាងប្រជាជនចិន និងជាប្រធានគណៈកម្មាធិការធម្មនុញ្ញ និងច្បាប់ជាមួយសម្តេច ហេង សំរិន ប្រធានរដ្ឋសភា ហើយនឹងពិភាក្សាជាមួយអ្នកកម្មការជំនាញរដ្ឋសភាកម្ពុជា ។ ក្នុងជំនួបជាមួយជាមួយលោក លី ហ្វី នាព្រឹកថ្ងៃទី៨ វិច្ឆិកា ឆ្នាំ២០១៨ នៅវិមានរដ្ឋសភាសម្តេចប្រធានរដ្ឋសភាបានចាត់ទុកដំណើរទស្សនកិច្ចរបស់លោក លី ហ្វី សមាជិកគណៈកម្មាធិការរដ្ឋធម្មនុញ្ញ និងច្បាប់នៃសភាតំណាងប្រជាជនចិនថា បានរួមចំណែកពូនជ្រុំ ទំនាក់ទំនង មិត្តភាព និងកិច្ចសហប្រតិបត្តិការកម្ពុជា- ចិន ឲ្យកាន់តែរឹងមាំខ្លាំងក្លាថែមទៀត ជាពិសេសរវាងសភាប្រទេសទាំងពីរ ដើម្បីស្វែងយល់ និងចែករំលែកបទពិសោធន៍អំពីការងារនីតិកម្ម ការកសាងច្បាប់ ។
សម្តេចបានសង្កត់ធ្ងន់ថា« កិច្ចសហប្រតិបត្តិការក្នុងភាពជាដៃគូរយុទ្ធសាស្ត្រគ្រប់ជ្រុងជ្រោយ» កំពុងទទួលបានផ្លែផ្កាលើគ្រប់វិស័យ ។ សម្តេចប្រធានរដ្ឋសភា និងភាគីគណៈប្រតិភូចិនក៏បានលើកឡើងថាទំនាក់ទំនងការទូតកម្ពុជា-ចិន បានឈានដល់ខួប៦០ឆ្នាំនៅឆ្នាំនេះហើយថ្នាក់ដឹកនាំស្ថាប័ននីតិប្បញ្ញត្តិ និងនីតិប្រតិបត្តិនៃប្រទេសទាំងពីរបានផ្លាស់ប្តូរដំណើរទស្សនកិច្ចគ្នាទៅវិញទៅមកជាបន្តបន្ទាប់ ។
ក្នុងនាមរដ្ឋសភាសម្តេច ហេង សំរិន បានវាយតម្លៃខ្ពស់ និងគាំទ្រពេញទំហឹងចំពោះគំនិតផ្តួចផ្តើមរបស់ប្រទេសចិនស្តីពីគោលនយោបាយខ្សែក្រវ៉ាត់មួយផ្លូវមួយ ។ សម្តេចមានប្រសាសន៍ថា គម្រោងសេដ្ឋកិច្ចសកលនេះបានដើរតួនាទីសំខាន់ក្នុងការអភិវឌ្ឍន៍សេដ្ឋកិច្ចសង្គមជួយទាក់ទាញវិនិយោគិន និងការអភិវឌ្ឍន៍វិស័យពាណិជ្ជកម្ម ឧស្សាហកម្ម ទេសចរណ៍ មកក្នុងប្រទេសកម្ពុជាបន្ថែមទៀត ។ ប៉ុន្មានឆ្នាំចុងក្រោយនេះការធ្វើពាណិជ្ជកម្មទ្វេភាគីពីចិនមកកម្ពុជា មានការរីកចម្រើនយ៉ាងខ្លាំង ។ ប្រទេសចិនក្លាយជាដៃគូរពាណិជ្ជកម្មដ៏សំខាន់ និងជាប្រទេសមានទុនវិនិយោគធំទី១នៅកម្ពុជា ។
ចំណែកកម្ពុជាវិញកាលពីថ្មីៗនេះធនាគារជាតិនៃកម្ពុជាបានប្រកាសដាក់ឲ្យប្រើប្រាស់ប្រាក់យន់ចិនក្នុងប្រព័ន្ធធនាគារកម្ពុជា ។ នេះជាយន្តការដើម្បីសម្របសម្រួលដល់ពាណិជ្ជកម្មទ្វេភាគី ការវិនិយោគ និងទេសចរណ៍ឲ្យកាន់តែមានប្រសិទ្ធភាព ។ លោកលី ហ្វី បានលើកឡើងថា គណៈកម្មាធិការរដ្ឋធម្មនុញ្ញ និងច្បាប់នៃសភាតំណាងប្រជាជនចិនទើបបង្កើតឡើងកាលពីខែមីនា ឆ្នាំ២០១៨នេះ ។ កម្ពុជាជាប្រទេសទី១ ដែលគណៈកម្មាធិការជ្រើសរើសមកបំពេញទស្សនកិច្ចក្នុងការសិក្សាស្វែងយល់ផ្លាស់ប្តូរបទពិសោធន៍គ្នាទៅវិញទៅមកលើកិច្ចការច្បាប់ ដែលនេះជាផ្នែកសំខាន់មួយក្នុងការជំរុញអ្នកវិនិយោគទុនចិនស្វែងយល់ពីច្បាប់របស់កម្ពុជា ហើយពួកគេនឹងមកបណ្តាក់ទុនកាន់ច្រើននៅកម្ពុជា ។
ទាក់ទងកិច្ចសហប្រតិបត្តិការរវាងសភាប្រទេសទាំងពីរសម្តេចប្រធានរដ្ឋសភាបានស្នើដល់គណៈប្រតិភូពិភាក្សាជាមួយលោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភាកម្ពុជា ក្នុងការធ្វើកិច្ចសហប្រតិបត្តិការស៊ីជម្រៅរវាងគណៈកម្មការជំនាញសភាទាំងពីរ ដើម្បីផលប្រយោជន៍ទាំងអស់គ្នា ៕
ចែករំលែកព័តមាននេះ