ខេត្តសៀមរាប ៖ កិច្ចប្រជុំអន្តរក្រសួងពិភាក្សាការងារស្វែងរកដំណោះស្រាយស្តារជួសជុល ថែទាំផ្លូវថ្នល់ដែលខូចខាតក្នុងខេត្តសៀមរាបនារសៀលថ្ងៃទី០៦ ខែវិច្ឆិកា ឆ្នាំ២០១៨ នៅសាលាខេត្តសៀមរាប ។
ក្រោមវត្តមានលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន ដោយមានវត្តមានរដ្ឋលេខាធិការ ក្រសួងអភិវឌ្ឍជនបទ ក្រសួងសាធារណៈការ និងដឹកជញ្ជូន អាជ្ញាធរជាតិអប្សរា អាជ្ញាធរខេត្តសៀមរាប និងថ្នាក់ដឹកនាំមន្ទីរស្ថាប័នពាក់ព័ន្ធ រួមទាំងអាជ្ញាធរក្រុងស្រុកទាំង១២ របស់ខេត្តសៀមរាបផងដែរ ។ កំណាត់ផ្លូវក្នុងក្រុងសៀមរាបចំនួន១១ខ្សែ ដែលខូចខាត និងកំពុងទទួលការទិទៀនរិះគន់ពីសំណាក់ប្រជាពលរដ្ឋ និងផ្លូវខ្នែងបែកចេញពីផ្លូវជាតិលេខ៦ ចំនួន៥២កន្លែងទៀតត្រូវបានកិច្ចប្រជុំអន្តរក្រសួងដែលពាក់ព័ន្ធសម្រេចជាគោលការណ៍ថា នឹងត្រូវជួសជុលកសាងឱ្យទៅជាផ្លូវកៅស៊ូទាំងអស់ ។
បើតាមសេចក្តីរាយការណ៍របស់លោក គឹម ប៉ុណ្ណា ប្រធានមន្ទីរសាធារណៈការ និងដឹកជញ្ជូនខេត្តសៀមរាបឱ្យដឹងថា ក្នុងរដូវវស្សាកន្លងមកបានជួយបបញ្ហាប្រឈមនានា និងទទួលបាន មតិរិះគន់ពីប្រជាពលរដ្ឋ ចំពោះការខូចខាតកំណាត់ផ្លូវជាច្រើនបានរិះគន់តាមគ្រប់បណ្តាញពត៌មាននានាមកលើរាជរដ្ឋាភិបាលតាមរយៈក្រសួង ឬស្ថាប័នដែលទទួលខុសត្រូវពិតមែន តែការរិះគន់មានភាពត្រឹមត្រូវលើកំណាត់ផ្លូវដែលបានខូចខាតទ្រុឌទ្រោមមែន តែពុំមានភាពច្បាស់លាស់ទៅលើដែនសមត្ថកិច្ចទទួលខុសត្រូវនៅឡើយទាំងនេះហើយ ដែលក្នុងនាមអ្នកទទួលខុសត្រូវបានធ្វើការឆ្លើយបកស្រាយជាហូរហែររៀងៗខ្លួនប្រកបដោយភាពទន់ភ្លន់ ស្មារតីទទួលខុសត្រូវរួមមិនជះ និងបាចទឹកដាក់គ្នា ។
តាមរយៈបទបង្ហាញកិច្ចប្រជុំបានកំណត់ថា នៅខេត្តសៀមរាបមានផ្លូវចំនួន១២ខ្សែ និងផ្លូវខ្នែងក្នុងក្រុងបំបែកពីផ្លូវជាតិលេខ៦ ចំនួន៥២ខ្នែងទៀត ដែលត្រូវការការស្តារ និងជួសជុលឡើងវិញជាប្រញ៉ាប់បំផុត ។ លោកទេសរដ្ឋមន្ត្រី ស៊ុន ចាន់ថុល សំណូមពរដល់អាជ្ញាធរខេត្ត និងក្រុមហ៊ុនម្ចាស់សណ្ឋាគារនានាកៀងគររកវិភាគទានថវិកា ដើម្បីជួសជុលផ្លូវក្នុងក្រុងសៀមរាបដែលរងការខូចខាតនាពេលកន្លងមក ។ លោកទេសរដ្ឋមន្ត្រីមានប្រសាសន៍ថា នៅក្នុងច្បាប់ផ្លូវថ្នល់ក្នុងព្រះរាជាណាចក្រកម្ពុជាយើងផ្លូវថ្នល់មួយចំនួនត្រូវបានកសាង ថែទាំ និងស្ថិតក្រោមការគ្រប់គ្រងរបស់ក្រសួងសាធារណការ និងដឹកជញ្ជូន មួយចំនួនក្រោមការសាងសង់ ថែទាំដោយក្រសួងអភិវឌ្ឍន៍ជនបទ និងមួយចំនួនក្រោមការកសាងថែទាំ និងជួសជុលដោយរដ្ឋបាលរាជធានីខេត្ត ។
ដោយឡែកខេត្តសៀមរាបផ្លូវមួយចំនួនជាបន្ទុកគ្រប់គ្រងថែទាំជួសជុលដោយអាជ្ញាធរអប្សរា លើកំណាត់ផ្លូវណាដែលស្ថិតក្នុងតំបន់ដែលអភិរក្សបេតិកភ័ណ្ឌជាតិក៏ដូចជា តំបន់រណបផ្សេងៗ ។ លោកបញ្ជាក់ថា យើងជិះទូកជាមួយគ្នា គឺទូករបស់រាជរដ្ឋាភិបាលយើងខ្ញុំមិនដែលជះទឹកដាក់គ្នាទេ យើងតែងតែពិភាក្សាគ្នារកដំណោះស្រាយ ដើម្បីដោះស្រាយបញ្ហាជូនបងប្អូនប្រជាពលរដ្ឋដែលលើកឡើងទាក់ទងទៅនឹងការខូចខាតផ្លូវថ្នល់ ។ លោកទេសរដ្ឋមន្ត្រីបញ្ជាក់ច្បាស់ទៀថា បងប្អូនប្រជាពលរដ្ឋរួមទាំងអ្នកទេសចរណ៍ធ្វើដំណើរមិនបានដឹងទេថា ផ្លូវណាជាការគ្រប់គ្រងថែទាំរបស់អាជ្ញាធរអប្សរាផ្លូវណាជាការគ្រប់គ្រងថែទាំរបស់អភិវឌ្ឍជនបទ ឬសាធារណៈការ និងដឹកជញ្ជូននោះទេ គឺពួកគាត់ច្រើនតែយល់ថា ជាផ្លូវដែលសាងសង់ គ្រប់គ្រងជួសជុលដោយក្រសួងសាធារណៈការឬថា ជាផ្លូវរបស់រាជរដ្ឋាភិបាលតែម្តង ។
លោកមានប្រសាសន៍ទៀតផងដែរ ចំពោះបញ្ហាផ្លូវចំនួន១១ខ្សែនៅក្នុងក្រុងសៀមរាបប្រវែងប្រមាណជា១២គ.ម ត្រូវតែជួសជុល និងស្តារជាបន្ទាន់ដោយសារផ្លូវទាំងនោះរងការខូចខាតជាច្រើនជាមួយគ្នានោះផ្លូវខ្នែងចំនួន៥២ខ្សែក៏ត្រូវរៀបចំឱ្យទៅជាផ្លូវកៅស៊ូដែរដែលត្រូវប្រើប្រាស់ថវិកាប៉ាន់ជាជំហានដំបូងប្រមាណជា១៥លានដុល្លារអាមេរិក ។
ជាមួយគ្នានោះក៏មានផ្លូវ៥ខ្សែ ជាផ្លូវគ្រួសក្រហម ស្ថិតក្នុងគម្រោងថែទាំជួសជុលរបស់ក្រសួងអភិវឌ្ឍណ៍ជនបទ និង២ខ្សែទៀតជាផ្លូវក្រាលគ្រួសក្រហមដែរ ស្ថិតក្នុងគម្រោងថែទាំរបស់មន្ទីរសាធារណៈការនិងដឹកជញ្ជូនខេត្តសៀមរាបក៏នឹងត្រូវជួសជុល និងប្រែក្លាយឱ្យទៅជាផ្លូវកៅស៊ូ DBST មានពីរស្រទាប់ស្តើងដែលមានអាយុកាល៥ឆ្នាំតែប៉ុណ្ណោះ លើសពីនេះវានឹងរងការខូចខាតទៅវិញផងដែរ ។ លោកមានប្រសាសន៍ជម្រាបជូនបងប្អូនប្រជាពលរដ្ឋផងដែរថា ដោយសារថវិកាមានកំណត់យើងធ្វើជាលក្ខណៈបណ្តោះអាសន្នយ៉ាងណាឱ្យផ្លូវនេះក្លាយជា ផ្លូវកៅស៊ូសិនថ្ងៃក្រោយនឹងអភិវឌ្ឍន៍ពីផ្លូវកៅស៊ូស្តើងទៅជាផ្លូវកៅស៊ូបេតុងវិញ ៕
ចែករំលែកព័តមាននេះ