ចងចាំជានិច្ចថ្ងៃ៩ វិច្ឆិកា ជាទិវាប្រវត្តិសាស្ត្រមិនអាចបំភ្លេចបាន
- កំពត
ខេត្តកំពត ៖ ឯកឧត្តមបណ្ឌិត ប៉ែន ស៊ីម៉ន អ្នកតំណាងរាស្ត្រ និងជាប្រធានគណៈកម្មការទី១០ នៃរដ្ឋសភាបានមានប្រសាសន៍ថា ទិវានៃបុណ្យឯករាជ្យជាតិ០៩ វិច្ឆិកា…
ខេត្តកំពត ៖ ឯកឧត្តមបណ្ឌិត ប៉ែន ស៊ីម៉ន អ្នកតំណាងរាស្ត្រ និងជាប្រធានគណៈកម្មការទី១០ នៃរដ្ឋសភាបានមានប្រសាសន៍ថា ទិវានៃបុណ្យឯករាជ្យជាតិ០៩ វិច្ឆិកា គឺជាទិវាប្រវត្តិសាស្ត្រ ដែលយើងទាំងអស់គ្នាជាប្រជារាស្ត្រខ្មែរគ្រប់រូប តែងតែចងចាំ និងចរិកជាប់ជានិច្ចនៅក្នុងជីវិត ព្រោះ៩ វិច្ឆិកា បានរំឭកអំពីព្រះមហាករុណាទិគុណប្រកបដោយព្រហ្មវិហារធម៌ជ្រាលជ្រៅរបស់ព្រះករុណាព្រះបាទសម្ដេចព្រះនរោត្តមសីហនុ ព្រះបរមរតនកោដ្ឋ ក្រោមព្រះរាជកិច្ចបេសកកម្មដ៏ឧត្តុង្គឧត្តម ក្នុងការទាមទារឯរាជ្យជាតិពីអាណានិគមនិយមបារាំង នាឆ្នាំ១៩៥៣ដើម្បីបុព្វហេតុឯករាជ្យជាតិ បូរណភាពទឹកដី សេចក្ដីសុខសាន្ត និងការអភិវឌ្ឍ ។
មានប្រសាសន៍នាឱកាសអញ្ជើញជាអធិបតីក្នុងពិធីខួបអនុស្សាវរីយ៍លើទី៦៥ នៃទិវាបុណ្យឯករាជ្យជាតិ០៩ វិច្ឆិកា និងទិវាកំណើតនៃកងយោធពលខេមរភូមិន្ទបានប្រារព្ធធ្វើឡើងនារមណីយដ្ឋានស្រះឈូក កាលពីព្រឹកថ្ងៃទី០៧ ខែវិច្ចិកា ឆ្នាំ២០១៨ ។ ឯកឧត្ដមបណ្ឌិត ប៉ែន ស៊ីម៉ន បានបញ្ជាក់ថា ដោយផ្ដើមចេញពីមាគ៌ាដឹកនាំប្រកបដោយព្រះបញ្ញាញាណរបស់ព្រះមហាវិរក្សត្រព្រះវរាជបិតាឯករាជ្យជាតិខ្មែរជាទីគោរពសក្ការៈដ៏ខ្ពង់ខ្ពស់នេះហើយ ទើបបច្ចុប្បន្ននេះរាជរដ្ឋាភិបាលនៃព្រះរាជាណាចក្រកម្ពុជាយើង បាននឹងកំពុងបន្តព្រះរាជបេសកកម្មដ៏ឧត្តុង្គឧត្តមនេះ ក្នុងគោលមាគ៌ានយោបាយដ៏ត្រឹមត្រូវ ក្រោមការដឹកនាំ ប្រកបដោយគតិបណ្ឌិត របស់សម្ដេចតេជោហ៊ុន សែន បានធ្វើឲ្យកម្ពុជាយើងមានទាំងស្ថេរភាពនយោបាន សន្តិសុខ ដ៏ពេញលេញ និងមានការអភិវឌ្ឍរីកចម្រើនលើគ្រប់វិស័យនៅទូទាំងប្រទេស ។
ការរៀបចំឡើងទិវាដ៏មហាឡារិកថ្ងៃនេះក៏ជាក្នុងក្ដីគោលបំណង ដើម្បីសំដែងមនោសញ្ចេតនាអបអរចំពោះលទ្ធផលជាផ្លែផ្កាដ៏ត្រចះត្រចង់របស់ជាតិយើងផង និងក៏ជាការឆ្លុះបញ្ចាំងបង្ហាញអំពីសមិទ្ធផលទាំងឡាយដែលរាជរដ្ឋាភិបាលបានខិតខំ ដើម្បីស្ដារអភិវឌ្ឍប្រទេសជាតិយើងផងដែរ ។ ដូចនេះផ្ដើមចេញតាមរយៈនៃការអនុវត្តនូវយុទ្ធសាស្ត្រចតុកោណដំណាក់កាលទី៣ ក្រោមការដឹកនាំរបស់សម្ដេចតេជោហ៊ុន សែន ប្រទេសជាតិយើង បច្ចុប្បន្នឈានដល់ដំណាក់កាលមួយបានធ្វើឲ្យសេដ្ឋកិច្ច និងសង្គមជាតិមានការរីកចម្រើនលើគ្រប់វិស័យប្រកបដោយជោគជ័យគួរជាទីមោទនៈ ក្នុងក្ដីសង្ឃឹមនៃអនាគតរុងរឿងរបស់ប្រជារាស្ត្រកម្ពុជាយើង ។
ដោយឡែក រដ្ឋបាលខេត្តកំពតតែងតែបានអនុវត្តនូវគោលនយោបាយជាអទិភាពនានាជាច្រើនរបស់រាជរដ្ឋាភិបាលក្នុងការបង្កលក្ខណៈសម្បត្តិអំណោយផលដល់ការពង្រឹងសន្តិភាព ស្ថេរភាព សណ្ដាប់ធ្នាប់ក្នុងសង្គម និងលើកកម្ពស់សេដ្ឋកិច្ចជីវភាពប្រជាជនកាន់តែប្រសើរឡើងផងដែរ ៕
ចែករំលែកព័តមាននេះ