ប្រទេសវេណេស៊ុយអេឡា ៖ អាជ្ញាធរទទួលបន្ទុកអន្តោប្រវេសន៍ប៉េរូ រាយការណ៍នាថ្ងៃទី៣វិច្ឆិកាថា ជនជាតិវេណេស៊ុយអេឡាប្រមាណជា៥៥០.០០០នាក់បានរត់ភៀសខ្លួនចូលប៉េរូចាប់តាំងពីខែមករាឆ្នាំ២០១៧មក មុនបញ្ចប់នាដំណាច់ខែតុលាលទ្ធភាពចូលដែនដីប្រទេសនេះដោយពុំចាំបាច់មានលិខិតឆ្លងដែន។
លោកស្រីROXANA DEL AGUILA នាយិកានៃទីភ្នាក់ងារទទួលបន្ទុកអន្តោប្រវេសន៍ប៉េរូ ថ្លែងទៅកាន់វិទ្យុ RPP ថា ជនជាតិវេណេស៊ុយអេឡាប្រមាណជា៥៥០.០០០នាក់អាចទទួលបានការស្នាក់អាស្រ័យនៅប៉េរូ។ លោកស្រីចង់និយាយយោងដល់ការអនុញ្ញាតឲ្យស្នាក់នៅបណ្ដោះអាសន្ន ដែលផ្ដល់ដល់ជនជាតិវេណេស៊ុយអេឡាទាំងនោះ ដែលរត់គេចចេញពីការខ្វះស្បៀងនិងការលំបាកនានា ដោយសារការដាំក្បាលចុះនៃសេដ្ឋកិច្ចរបស់ប្រទេស រួចទទួលឲ្យធ្វើការដោយស្របច្បាប់នៅប៉េរូ។
រដ្ឋាភិបាលប៉េរូបានកំណត់ត្រឹមថ្ងៃទី៣១តុលាជាថ្ងៃចុងក្រោយ ដែលជនជាតិវេណេស៊ុយអេឡាចូលប៉េរូ ដោយពុំចាំបាច់មានលិខិតឆ្លងដែន។ប៉ុន្តែចាប់ពីក្រោយកាលបរិច្ឆេទនោះទៅ ទាល់តែមានលិខិតឆ្លងដែនទើបអាចចូលស្នាក់នៅបណ្ដោះអាសន្នបាន។
លោកស្រីDEL AGUILA គូសបញ្ជាក់ថាចំនួនជនជាតិវេណេស៊ុយអេឡាដែលចូលមកក្នុងក្រុងតាមព្រំដែនTUMBESភាគខាងជើងប៉េរូ មានការកើនឡើងរយៈពេលប៉ុន្មានថ្ងៃចុងក្រោយនេះ ពិសេសក្នុងថ្ងៃទី៣១តុលាតែមួយគត់ដែលមានជនជាតិវេណេស៊ុយអេឡាចូលមកដល់៦៧០៨នាក់។នេះជាតួលេខខ្ពស់បំផុតមួយលើសកាលពីថ្ងៃទី១១សីហា ដែលមាន៥១៩០នាក់ដែលឆ្លងកាត់ព្រំដែន។
ក្រោយថ្ងៃទី៣១តុលាទៅពលរដ្ឋវេណេស៊ុយអេឡា ត្រូវបង្ហាញលិខិតឆ្លងដែនដើម្បីចូលមកក្នុងប្រទេសប៉េរូ ហើយទើបទទួលបានការអនុញ្ញាតឲ្យស្នាក់នៅបណ្ដោះអាសន្ន។ជាមួយការអនុញ្ញាតនោះ ដែលមានសុពលភាពរយៈពេលមួយឆ្នាំ ពលរដ្ឋវេណេស៊ុយអេឡា អាចទទួលបានសេវាកម្មសាធារណៈក៏ដូចជាសេវាកម្មសុខាភិបាលនិងអប់រំ។
យោងតាមផ្នែកអន្តោប្រវេសន៍ប៉េរូថាប័ណ្ណស្នាក់នៅបណ្ដោះអាសន្ន ត្រូវបានផ្ដល់រួចហើយដល់ជនជាតិវេណេស៊ុយឡា១២៥.០០០នាក់។
ការលើកគ្នារត់ភៀសខ្លួនរបស់ពលរដ្ឋវេណេស៊ុយឡា គេចចេញពីសភាពការណ៍យ៉ាប់យ៉ឺនបំផុតរបស់ប្រទេសពួកគេ ត្រូវបានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនចាត់ទុកថាជាការភៀសខ្លួន របស់មនុស្សយ៉ាងច្រើនបំផុតនៃប្រវត្តិសាស្ត្រអាមេរិកឡាទីន៕
ចែករំលែកព័តមាននេះ