រាជធានីភ្នំពេញ ៖ បុរសម្នាក់ និងស្ត្រីម្នាក់បានរងរបួសធ្ងន់ បន្ទាប់ពីជិះម៉ូតូឌុបគ្នាឆ្លងកាត់ផ្លូវដែក ដោយខ្វះការប្រុងប្រយ័ត្ន ស្របពេលដែករថភ្លើងបើកមកដល់ក៏កៀរ បណ្តាលឲ្យខ្ទាតមនុស្សជាង៥០ម៉ែត្រ ហើយត្រូវបានរថយន្តរបស់គ្លីនិកឯកជនដឹកយកទៅសង្គ្រោះ កាលពីវេលាម៉ោង៦និង៣០នាទីយប់ថ្ងៃទី៣ ខែវិច្ឆិកា ឆ្នាំ២០១៨ ស្ថិតនៅតាមផ្លូវរថភ្លើង ក្រុម១ ភូមិរោងចក្រ សង្កាត់គោកឃ្លាង ខណ្ឌសែនសុខ ។
ទាំង២នាក់ខាងលើម្នាក់ឈ្មោះ អូន សុខញ៉ាញ់ ភេទប្រុស អាយុ៣៩ឆ្នាំ មុខរបររត់ម៉ូតូឌុប ជាអ្នកបើកបរម៉ូតូ ស្នាក់នៅផ្ទះលេខ៤៧ ផ្លូវ៣៣៦ សង្កាត់បឹងសាឡាង ខណ្ឌទួលគោក បានរងរបួសធ្ងន់ ចំណែកម្នាក់ទៀតជារួមដំណើរជាមួយឈ្មោះ សូរ ចាន់លក្ខិណា អាយុ៣៩ឆ្នាំ មុខរបរលក់ដូរ ស្នាក់នៅផ្ទះលេខ១៩៣ ផ្លូវ២៧១ សង្កាត់បឹងសាឡាង ខណ្ឌទួលគោក បានរងរបួសធ្ងន់។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ គេឃើញជនរងគ្រោះទាំង២នាក់ ជិះម៉ូតូ មួយគ្រឿងម៉ាកហុងដា ធុនសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ កណ្តាល ១H-៩៩៩០ បើកបរក្នុងទិសដៅពីជើងទៅត្បូងឆ្លងកាត់ផ្លូវរថភ្លើង ដោយមិនបានមើលឆ្វេងស្តាំ ស្របពេលដែលរថភ្លើង បើកពីលិចទៅកើតមកដល់ក៏កៀរតែម្តង បណ្តាលឱ្យខ្ទាតមនុស្សជាង៥០ម៉ែត្រ រងរបួសធ្ងន់ទាំង២នាក់ ។
ក្រោយកើតហេតុ ជនរងគ្រោះទាំង២នាក់ត្រូវបានរថយន្តសង្គ្រោះរបស់គ្លីនិកឯកជនដឹកយកទៅសង្គ្រោះ ចំណែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌសែនសុខ។ដោយឡែក រថភ្លើងបន្តដំណើរ ចូលទៅស្ថានីយ៍បាត់ ។
ក្នុងករណីរថភ្លើងបុកខាងលើនេះគេមិនដឹងថា តើខាងក្រុមហ៊ុនជួយចេញថ្លៃព្យាបាលមកឱ្យអ្នករបួស ឬក៍យ៉ាងណានៅឡើយទេ ។ ទាក់ទិនករណីខាងលើ ប្រជាពលរដ្ឋបានលើកឡើងថា កន្លងមកអោយតែរថភ្លើងបុកមិនថាស្លាប់ ឬរបួសនោះទេ អោយតែបុកហើយរថភ្លើងបើកចេញទៅធ្វើមិនដឹងតែរហូតម្តង ៕
ចែករំលែកព័តមាននេះ