ខេត្តស្វាយរៀង ៖ ផ្លូវលំ២ខ្សែប្រវែង១០គីឡូម៉ែត្រ កំពុងបាក់ស្រុតខូចក្លាយជារណ្តៅក្រហេងក្រហូងដូចថ្លុកក្របី ដែលរងការបំផ្លាញដោយពួកឈ្មួញដឹកដែកអេតចាយប្រើប្រាស់រថយន្តយីឌុបភ្លៅប្រាំ និងរថយន្តវ៉េអងធុនយក្សចំណុះ៤០តោនទៅ៦០តោន បានកំពុងធ្វើចរាចរណ៍ឆ្លងកាត់ទៅប្រទេសវៀតណាម ធ្វើឲ្យប្រជាពលរដ្ឋឃុំតាសួស និងឃុំក្រួស ស្រុកស្វាយជ្រំ ខឹងសម្បា និងព្រួយបារម្ភអំពីការបាក់ស្រុតខូចផ្លូវ២ខ្សែនេះ ធ្វើឲ្យពិបាកក្នុងការធ្វើដំណើរយ៉ាងខ្លាំង ។
បើតាមប្រជាពលរដ្ឋរស់នៅភូមិតាសួស ឃុំតាសួស ស្រុកស្វាយជ្រំ បានប្រាប់អ្នកសារព័ត៌មានយើងថា មានរថយន្តយីឌុបភ្លៅប្រាំ និងរថយន្តវ៉េអងធុនយក្សរាប់សិបគ្រឿងដឹកដែកអេតចាយក្នុង១គ្រឿងៗ ចាប់ពី៤០តោន ទៅ៦០តោន ក្នុងមួយយប់ៗចាប់ពី១០គ្រឿងទៅ២០គ្រឿងកំពុងបំផ្លាញផ្លូវ២ខ្សែ ប្រវែងជិត១០គីឡូម៉ែត្រ ចាប់ពីភូមិតាសួស ឃុំតាសួស ទៅកាន់ច្រករបៀង ក្រសាំងជ្រំ ភូមិក្រសាំងជ្រំ ឃុំក្រួស និង១ខ្សែប្រវែង៤០០០ម៉ែត្រ ចាប់ពីភូមិត្រោកដល់ច្រករបៀងតានូ ភូមិតានូ ឃុំក្រួស ស្រុកស្វាយជ្រំ ខូចស្ទើរទាំងស្រុងក្លាយជាថ្លុកក្របីទៅហើយ មិនដែលឃើញអាជ្ញាធរ ឬសមត្ថកិច្ចណាអើពើឡើយ ។
ប្រភពប្រជាពលរដ្ឋបន្តទៀតថា បើអាជ្ញាធរ និងសមត្ថកិច្ចគ្មានវិធានការទប់ស្កាត់ ហើយបណ្តែតបណ្តោយឲ្យឈ្មួញដឹកអេតចាយតាមរថយន្តធុនយក្សចំណុះ៤០តោនទៅ៦០តោនដូច្នេះ ពិតជាស្រុតខូចផ្លូវអស់ហើយ ។
ប្រភពប្រជាពលរដ្ឋឲ្យដឹងទៀតថា បើនៅច្រករបៀងតានូឈ្មួញបានធ្វើផែកាណូតដាក់ជញ្ជីងថ្លឹងអេតចាយ ថ្លឹងទាំងរថយន្តតែម្តង រួចប្រើប្រាស់រថយន្តស្ទួចដៃក្រចាប់ចាប់ដែកអេតចាយចេញពីក្នុងរថយន្តដាក់ចូលក្នុងកប៉ាល់វៀតណាមតែម្លងហើយគេធ្វើការរើអេតចាយទាំងយប់ សង្ស័យមានបង្កប់ឈើប្រណិតក៏មិនដឹង ៕
ចែករំលែកព័តមាននេះ