តុលាការសម្រេចឃុំខ្លួនជនសង្ស័យ៣នាក់ដាក់ពន្ធនាគារពីបទ…
- កណ្តាល
ខេត្តកណ្តាល ៖ លោក គឹម ម៉េង ចៅក្រមស៊ើបសួរសាលាដំបូងខេត្តកណ្តាល នៅថ្ងៃទី៣១ តុលា ២០១៨ បានសម្រេចចេញដីកាឃុំខ្លួនជនសង្ស័យចំនួន៣នាក់ពាក់ពន្ធ័ករណីប្រើអំពើហិង្សា…
ខេត្តកណ្តាល ៖ លោក គឹម ម៉េង ចៅក្រមស៊ើបសួរសាលាដំបូងខេត្តកណ្តាល នៅថ្ងៃទី៣១ តុលា ២០១៨ បានសម្រេចចេញដីកាឃុំខ្លួនជនសង្ស័យចំនួន៣នាក់ពាក់ពន្ធ័ករណីប្រើអំពើហិង្សា ដោយយកចបជីកវាយទៅលើបុរសម្នាក់ បណ្តាលអោយរបួសធ្ងន់ ។
ជនសង្ស័យទាំង៣នាក់ត្រូវបានដាក់ពន្ធនាគារបណ្តោះអាសន្នពីបទ «ហិង្សាដោយចេតនាមានស្ថានទម្ងន់ទោស» ដែលប្រព្រឹត្តនៅភូមិអាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល កាលពីវេលាម៉ោង៧នាទីយប់ថ្ងៃទី៣០ តុលា ២០១៨ តាមមាត្រា២១៨ នៃក្រមព្រហ្មទណ្ឌ។
ជនត្រូវចោទទាំង៣នាក់ខាងលើរួមមាន ១-ឈ្មោះទូច ឆវន្ត័ ភេទប្រុស អាយុ៣៤ឆ្នាំ មុខរបរនេសាទ ២-ឈ្មោះហែល សារ៉ង ភេទប្រុស អាយុ៣២ឆ្នាំ មុខរបរនេសាទ និង៣-ឈ្មោះនឿន ចាន់ណុល ភេទប្រុស អាយុ២៨ឆ្នាំ អ្នកទាំងបីមានទីលំនៅភូមិ អាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
ចំណែកជនរងគ្រោះឈ្មោះ ធី ចុំ ភេទប្រុស អាយុ៣២ឆ្នាំ មុខរបរទិញ-លក់ដី មានទីលំនៅភូមិសង្កាត់កើតហេតុ វត្ថុតាងដែលសមត្ថកិច្ចចាប់យកមានចបជីកប្រវែង១២០សង់ទីម៉ែត្រចំនួន១។
លោកអធិការបានបញ្ជាក់ថា មុនពេលកើតហេតុ ជនរងគ្រោះបានទៅដាក់សៃយ៉ឺន (ឧបករណ៍នេសាទត្រី) នៅក្នុងបឹង ហើយក៏មានគេកាប់សៃយ៉ឺនរបស់គាត់ ទើបគាត់ខឹងក៏បានជេបញ្ចោររកអ្នកកាប់សៃយ៉ឺនរបស់គាត់។
លុះមកដល់វេលាកើតហេតុខាងលើ ជនរងគ្រោះបានជិះម៉ូតូមករកជីកអន្លង់ត្រីកាត់មុខផ្ទះជនសង្ស័យទាំង៣នាក់ខាងលើកំពុងអង្គុយផឹក ក៏ទាស់ពាក្យសំដីគ្នា ហើយជនរងគ្រោះក៏បានយកចបជីកដេញវាយក្រុមជនសង្ស័យ ទើបក្រុមជនសង្ស័យនាំគ្នាប្រតាយប្រតប់ដណ្តើមចបជីក បណ្តាលជនរងគ្រោះមុតចបជីកមានរបួសត្រង់ក្បាលមួយកន្លែងហូរឈាមពេញខ្លួនតែម្តង៕
ចែករំលែកព័តមាននេះ