ខេត្តស្វាយរៀង ៖ លោកម៉ែន វិបុល អភិបាលនៃគណអភិបាលខេត្តបានដាក់សំណើរឲ្យលោកនាយឧត្តមសេនីយ៍វង្ស ពិសេន អគ្គមេបញ្ជាការកងយោធពលខេមរភូមិន្ទចាត់ក្រុមការងារស្រាវជ្រាវ និងរុករកអដ្ឋិធាតុទាហានអាមេរិកមកពិនិត្យ និងទទួលទៅពិសោធន៍រកការពិតអំពីអដ្ឋិធាតុចំនួន១ ដែលប្រជាពលរដ្ឋបានរកឃើញ និងប្រគល់ជូនរដ្ឋបាលខេត្តស្វាយរៀង ដោយសង្ស័យថា ជាអដ្ឋិធាតុទាហានអាមេរិកកាំងស្លាប់សម័យសង្គ្រាម ។
ការស្នើសុំនេះកើតឡើងកាលពីថ្ងៃទី៣០ តុលា ២០១៨ នៅសាលាខេត្តស្វាយរៀង ។
សូមរំលឹកថា សម្ដេចតេជោហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី១២ ខែតុលា ឆ្នាំ២០១៨ បានយល់ព្រមបើកដំណើរការឡើងវិញនូវការរុករកអដ្ឋិធាតុទាហានរបស់សហរដ្ឋអាមេរិកដែលនៅបន្ដបាត់ខ្លួនក្នុងសម័យសង្គ្រាម (POW/MIA) ចំនួន៤៩នាក់ ក្រោយពីសម្រេចផ្អាកជាបណ្តោះអាសន្ន កាលពីថ្ងៃទី១២ ខែតុលា ឆ្នាំ២០១៧កន្លងទៅ ។
បើយោងតាមលិខិតរបស់លោកម៉ែន វិបុល អភិបាលខេត្តស្វាយរៀងផ្ញើជូនលោកនាយឧត្តមសេនីយ៍វង្សពិសេនអគ្គមេបញ្ជាការកងយោធពលខេមរភូមិន្ទ នៅថ្ងៃទី៣០ ខែតុលានេះ បានបញ្ជាក់ថា«រដ្ឋបាលខេត្តស្វាយរៀងស្នើសុំលោកនាយឧត្តមសេនីយ៍វង្សពិសេនអគ្គមេបញ្ជាការកងយោធពលខេមរភូមិន្ទ មេត្តាចាត់ក្រុមការងារស្រាវជ្រាវ និងរុករកអដ្ឋិធាតុកងទ័ពអាមេរិកមកពិនិត្យ និងវាយតម្លៃបឋមអំពីអត្តសញ្ញាណអដ្ឋិធាតុខាងលើដែលកំពុងរក្សាទុកនៅសាលាខេត្តស្វាយរៀង ។
សូមបញ្ជាក់ថា តាមរយៈលោកសយ សុភាព អគ្គនាយកមជ្ឈមណ្ឌលព័ត៌មានដើមអម្ពិល អ្នកស្រីសយ សុខុម អាយុ៣៥ឆ្នាំ រស់នៅភូមិក្បាលថ្នល់ ឃុំត្នោតស្រុកកំពង់រោទិ៍ ខេត្តស្វាយរៀង ដែលមានទីតាំងនៅជិតព្រំដែនវៀតណាម បានប្រគល់ក្រឡ ដែលមានអដ្ឋិធាតុ (ឆ្អឹង) ចំនួន១ជូនអាជ្ញាធរខេត្តស្វាយរៀង កាលពីថ្ងៃទី២៨ ខែតុលា ឆ្នាំ២០១៨។ ក្រឡកែវនេះ គឺបិទគំរបជិតមិនអាចបើកបានឡើយដោយមានឆ្លាក់អក្សរឡាតាំងនៅផ្នែកខាងក្នុងគំរបថា «HAMBURG.CECATCKE» ។ ពេលនេះគេមិនទាន់ដឹងច្បាស់ថា អដ្ឋិធាតុនេះ គឺជាឆ្អឹងទាហានអាមេរិក ឬឆ្អឹងអ្វីនៅឡើយទេ គឺត្រូវឆ្លងកាត់ធ្វើកោសល្យវិច្ច័យសិន ។
សូមជម្រាបថា កាលពី២ឆ្នាំមុន គ្រួសារកសិករសយ សុខុម បានជីកដីនៅក្រោយភូមិ ដើម្បីយកអាចម៍ដីមកលើកភូមិឲ្យខ្ពស់ ដើម្បីសង់ផ្ទះក៏ប្រទះឃើញក្រឡនេះ រួចហើយយកមកលាងទឹក និងដាក់នៅលើហឹងដុតធូបសូមសេចក្ដីសុខ បន្ទាប់មកទើបនៅថ្ងៃអាទិត្យ ទី២៨ ខែតុលា ឆ្នាំ២០១៨នេះ គ្រួសាររបស់អ្នកស្រីបានយកមកប្រគល់ជូនអាជ្ញាធរខេត្តស្វាយរៀង ដោយសង្ស័យថា ក្រែងជាអដ្ឋិធាតុទាហានអាមេរិកកាំងត្រូវប្រគល់ឲ្យយកទៅប្រទេសដើមវិញ ៕
ចែករំលែកព័តមាននេះ