រាជធានីភ្នំពេញ ៖ តាមរយៈកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ (អ ស ប) ក្រសួងការពារជាតិ និងបញ្ជូនកងកម្លាំងវិស្វកម្មមួកខៀវ លេខ៥៩៤ ចំនួន ២១៦នាក់ រួមទាំងនារី១០នាក់ ចូលរួមបេសកកម្មរក្សាសន្តិភាពអង្គការសហប្រជាជាតិ នៅសាធារដ្ឋអាហ្វ្រិកកណ្តាល ក្រោមឆ័ត្រ UN ។
យោងតាមសេចក្តីប្រកាសព័ត៌មានរបស់ក្រសួងការពារជាតិបានឲ្យដឹង នៅថ្ងៃទី៣១ តុលា ឆ្នាំ២០១៨ ពិធីបញ្ជូនដំណើរកងវិស្វកម្ម ទៅសាធារណរដ្ឋអាហ្វ្រិកកណ្តាលនឹងប្រព្រឹត្តិទៅក្រោមអធីបតីភាព លោកនាយកឧត្តមសេនីយ៍ ប៉ុល សារឿន ទេសរដ្ឋមន្ត្រីទទួលបន្ទុកបេសកកម្មពិសេស នៅព្រឹកថ្ងៃទី២ ខែវិច្ឆិកា ឆ្នាំ២០១៨ នៅមូលដ្ឋានទ័ពអាកាសពោធិចិនតុង រាជធានីភ្នំពេញ ។ ដោយឡែកកម្មវិធីមាតុភូមិនិវត្តនៃកងវិស្វកម្មលេខ៩៥៤ ចំនួន២១៦នាក់ ក្នុងនោះមាននារីចំនួន១៤នាក់ ពីសាធារណរដ្ឋអាហ្វ្រិកកណ្តាល និងកងរាជអាវុហត្ថលេខ៦១៨ ចំនួន ៧៣នាក់ ក្នុងនោះរួមមាននារីចំនួន១៤នាក់ ពីសាធារណរដ្ឋស៊ូដង់ខាងត្បូងនឹងត្រូវរៀបចំឡើង ក្រោមអធិបតីភាពសម្តេចពិជ័យសេនា ទៀ បាញ់ ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិតំណាងសម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី៥ ខែវិច្ឆិកា ឆ្នាំ២០១៨ នៅ មូលដ្ឋានអាកាសពោចិនតុង ។
សូមជម្រាបថា កងវិស្វកម្មលេខ៥៩៤ គឺជាកងវិស្វកម្មលើកទី៥ហើយដែលត្រូវបញ្ជូនទៅចូលរួមបេសកកម្មរក្សាសន្តិភាព អ.ស.ប នៅសាធារណរដ្ឋអាហ្វ្រិកកណ្តាល ហើយកងនេះនឹងត្រូវប្តូរវេនជំនួសកងវិស្វកម្មលេខ៩៥៤ ដែលបានសម្រេចភារកិច្ចដោយជោគជ័យក្នុងបេសកកម្មរក្សាសន្តិភាព អ.ស.ប អាណត្តិ១ឆ្នាំ របស់ខ្លួននៅសាធារដ្ឋអាហ្វ្រិកកណ្តាល៕
ចែករំលែកព័តមាននេះ