ប្រភពពី Shanghaiist បានឲ្យដឹងថា ក្មេងប្រុសអាយុ៨ឆ្នាំម្នាក់ បានឡើងទៅលើអគារជាន់ទី៣៣ រួចហើយស្រែកថា «ខ្ញុំមិនចង់ទៅសាលារៀនទេ» ។ ដោយរូបគេឈរនៅទីនោះ ប្រុងនឹងសម្លាប់ខ្លួន ហើយត្រូវបានកម្មករសំណង់ម្នាក់ឃើញ ។
រឿងរ៉ាវនេះ កើតឡើងនៅកាលពីដើមសប្តាហ៍មុន ។ ដោយគ្រាន់តែឃើញក្មេងប្រុសម្នាក់នោះ ប្រុងលោតសម្លាប់ខ្លួនភ្លាម កម្មករសំណង់ម្នាក់នោះក៏បានទូរស័ព្ទហៅក្រុមជួយសង្គ្រោះ១១៩ភ្លាម ។ នៅក្នុងវីឌីអូដែលគេថតបានសកម្មភាពក្រុមជួយសង្គ្រោះបានដើរយឺតៗទៅកាន់ក្មេងប្រុសកំពុងយំ ហើយនិយាយលួងរហូតទាល់តែចាប់ដៃបាន។
ពួកគេក៏បានចង់ខ្សែជាប់នឹងចង្កេះ ហើយស្ទូចឡើងលើឲ្យផុតដោយសុវត្ថិភាព ។ ក្រោយមកក្រុមជួយសង្គ្រោះបានប្រាប់ក្រុមសារព័ត៌មានថា ក្មេងប្រុសអាយុ៨ឆ្នាំញ័រញាក់យ៉ាងខ្លាំង នៅពេលពួកគេទៅចាប់ ហើយនិយាយតិចៗថា «មិនចង់ទៅសាលារៀនទេ» ។
ក្មេងៗនៅចិនត្រូវបានគេស្គាល់ថា ទទួលរងសម្ពាធយ៉ាងខ្លាំងទៅលើការរៀនសូត្រ ។ ពួកគេត្រូវតែរៀនឲ្យបានពូកែ ទើបអាចចូលទៅមហាវិទ្យាល័យបាន ។ ពេលខ្លះ ដោយសារតែស្ត្រេសពេក ខ្លះក៏បានបែកគំនិតប្រុងនឹងគិតខ្លី ។
កាលពីដើមឆ្នាំ ក្មេងស្រីអាយុ១២ឆ្នាំ នៅខេត្ត Jiangxi បានលោតចុះពីបង្អួចជាន់ទី១៥ ដោយសារតែមិនអាចធ្វើកិច្ចការផ្ទះដាក់ពីសាលាមិនទាន់ហើយ។ តែសំណាងល្អ នាងត្រូវបានគេទ្រដោយប្រើប្រាស់ពូកខ្យល់ពីខាងក្រោម ៕
ចែករំលែកព័តមាននេះ