រាជធានីភ្នំពេញ ៖ បុរសជាកម្មករសំណង់ម្នាក់បានស្លាប់បាត់បង់ជីវិតយ៉ាងអណោវអធ័ម ខណៈដែលរូបគេចប់ម៉ោងធ្វើការហើយជិះម៉ូតូទៅរកទិញបាយហូបក៏ត្រូវបានរថយន្តស៊េរីទំនើបម៉ាក LEXUS 470 មួយគ្រឿងបើកថយក្រោយចេញពីភោជនីយ៍ដ្ឋាន សេវេនប្រាយ ឃីង មកបុកផ្ទុបនឹងខឿនផ្លូវម្ខាងទៀតយ៉ាងពេញទំហឹង ។
ហេតុការណ៍នេះដែរបានកើតឡើងកាលពីវេលាម៉ោង ១១និង៣០នាទីព្រឹក ថ្ងៃទី២៧ ខែតុលា ឆ្នាំ២០១៨ នៅខាងមុខភោជនីយ៍ដ្ឋាន សេវេនប្រាយ ឃីង (ក្បែរវត្តភ្នំ) ផ្លូវលេខ១០៨ ក្នុងសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសរងគ្រោះមានឈ្មោះ ច័ន្ទ មេសារ អាយុ២២ឆ្នាំ មុខរបរកម្មករសំណង់ មានទីលំនៅក្នុងភូមិក្រាំងក្រូច ឃុំស្គុះ ស្រុកសំរោងទង ខេត្តកំពង់ស្ពឺ ។
មុនពេលកើតហេតុ ក្រោយពីចប់ម៉ោងធ្វើការនៅក្នុងការដ្ឋានសំណង់មួយកន្លែងបុរសរងគ្រោះបានជិះម៉ូតូម៉ាកវីវ៉ា ពណ៌ខ្មៅ ពាក់ផ្លាកលេខ ភ្នំពេញ 1AJ-៧៤០៥ មួយគ្រឿងទៅរកទិញបាយហូប ។
លុះបុរសរងគ្រោះជិះម៉ូតូមកដល់ចំណុចកើតហេតុខាងលើក៏ស្រាប់តែមានរថយន្តម៉ាកឡិចស៊ីស៤៧០ ពណ៌ខ្មៅ ពាក់ផ្លាកលេខ ភ្នំពេញ ២G-៤៥៥៥ មួយគ្រឿង បើកថយក្រោយក្នុងល្បឿនយ៉ាងលឿនថយក្រោយចេញពីភោជនីយ៍ដ្ឋាន សេវេនប្រាយ ឃីង មកបុកម៉ូតូ និង ជនរងគ្រោះទៅផ្ទុបនឹងខឿនផ្លូវម្ខាងបណ្តាលអោយស្លាប់បាត់បង់ជីវិតនៅនឹងកន្លែងតែម្តង ។
ភ្លាមនោះគេក៏បានឃើញបុរសម្នាក់បានបើកេថយន្តម៉ាកឡិចស៊ីស៤៧០មួយគ្រឿងនោះទៅចតនៅលើចំណតខាងមុខហាងវិញយ៉ាងត្រឹមត្រូវរួចចុះរត់គេចខ្លួនបាត់ស្រមោល ។ ភ្លាមនោះកម្លាំងមានមានសម្ថកិច្ចមូលដ្ឋានក៏បានចុះមកដល់កន្កែងកើតហេតុ ធ្វើការស្រាវជ្រាវរកម្ចាស់រថយន្តបង្កទើបដឹងថា រថយន្តស៊េរីទំនើបម៉ាក LEXUS 470 បង្កជារថយន្តរបស់ថៅកែហាងសេវេនប្រាយឃីង ខាងលើដែលត្រូវបានបុរសជាបុគ្គលិកម្នាក់បើកថយក្រោយទៅបុកគេស្លាប់រួចហើយរត់គេខខ្លួនបាត់នោះ ។
ក្រោយពេលកើតហេតុសាកសពរបស់បុរសរងគ្រោះជាកម្មករសំណង់ខាងលើត្រូវបានប្រគល់អោយក្រុមគ្រួសារយកទៅធ្វើបុណ្យនៅឯស្រុកកំណើត ចំណែកឯរថយន្តម៉ាក LEXUS 470 បង្ក និងម៉ូតូរបស់ជនរងគ្រោះ ត្រូវបានបញ្ជូនយកទៅរក្សារទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាជាបន្តទៅទៀត ៕
ចែករំលែកព័តមាននេះ