ខេត្តសៀមរាប ៖ រដ្ឋបាលខេត្តសម្រេចប្រសិទ្ធិនាមផ្លូវមួយខ្សែពីចំណុចកែងមន្ទីរពេទ្យគន្ធបុប្ផា(មន្ទីរពេទ្យកុមារ)ដល់ទីស្នាក់ការអាជ្ញាធរជាតិអប្សរាដាក់ឈ្មោះឱ្យថា «វិថីសម្ដេចវិបុលបញ្ញា សុខ អាន» ហើយផ្លូវនេះស្ថិតនៅតាមបណ្តោយផ្លូវ៦០ម៉ែត្រ ក្នុងក្រុងសៀមរាប ។
ដើម្បីជាការតបស្នងដឹងគុណដ៏ថ្លៃថ្លារបស់សម្ដេចវិបុលបញ្ញា សុខ អាន ក្នុងបុព្វហេតុលើវិស័យបេតិកភណ្ឌក៏ដូចជាចូលរួមក្នុងកម្មវិធីនយោបាយនានារបស់រាជរដ្ឋាភិបាលកម្ពុជាកន្លងមក រដ្ឋបាលខេត្តបានសម្រេចប្រសិទ្ធិនាមផ្លូវមួយខ្សែឈ្មោះ «វិថីសម្ដេចវិបុលបញ្ញា សុខ អាន»តាមសំណើរបស់អាជ្ញាធរអប្សរា ។
កន្លងមកពលរដ្ឋទូទៅតែងតែហៅថា ផ្លូវ៦០ម៉ែត្រ ព្រោះយោងតាមទំហំផ្លូវដែលមានទទឺងប្រវែង៦០ម៉ែត្រទើបតែថ្មីៗនេះអាជ្ញាធរជាតិអប្សរាក៏បានដាក់សំណើរមករដ្ឋបាលខេត្តសៀមរាបដោយប្រសិទ្ធិនាមផ្លូវនេះជាវិថីសម្ដេចវិបុលបញ្ញា សុខ អាន ។
វិថីសម្ដេចវិបុលបញ្ញា សុខ អាន បានបម្រើផលប្រយោជន៍ដល់ប្រជាជន និងភ្ញៀវទេសចរណ៍ទាំងអស់បានឆ្លងកាត់ និងដឹកជញ្ជូនទំនិញអស់រយៈពេល១៦ឆ្នាំមកហើយផងដែរ ៕
ចែករំលែកព័តមាននេះ