រាជធានីភ្នំពេញ ៖ ស្ត្រីជាជនសង្ស័យម្នាក់ត្រូវបានកម្លាំងនគរបាលប៉ុស្តិ៍ច្បារអំពៅទី២ ធ្វើការឃាត់ខ្លួននៅចំណុចតូបលក់គ្រឿងអលង្ការមួយកន្លែង ស្ថិតក្នុងផ្សារច្បារអំពៅ ក្នុងសង្កាត់ច្បារអំពៅ២ ខណ្ឌច្បារអំពៅ កាលពីវេលាម៉ោង១៤និង៣០នាទីរសៀលថ្ងៃទី២២ ខែតុលា ឆ្នាំ២០១៨ ពាក់ព័ន្ធនឹងការបន្លំយកគ្រឿងអលង្ការ ។
ស្ត្រីជាជនសង្ស័យឈ្មោះម៉ាន ម៉ានរីយ៉ាន ភេទស្រី អាយុ៣៨ឆ្នាំ ជាខ្មែរអ៊ិស្លាម មុខរបរមិនពិតប្រាកដ ស្នាក់នៅផ្ទះលេខ២៦A ផ្លូវជាតិលេខ៥សង្កាត់ព្រែកព្នៅ ខណ្ឌព្រែកព្នៅ ។ ចំណែកជនរងគ្រោះឈ្មោះឡុង នីឡេង ភេទស្រី អាយុ៣១ឆ្នាំ មុខរបរលក់គ្រឿងអលង្ការ ។
តាមសម្តីរៀបរាប់របស់ជនរងគ្រោះអោយដឹងថា នៅវេលារសៀលថ្ងៃទី២០ ខែតុលា ឆ្នាំ២០១៨ ជនសង្ស័យបានដើរទៅទិញគ្រឿងអលង្ការនៅហាងរបស់ខ្លួន ដោយពេលនោះជនសង្ស័យ បានឲ្យជនរងគ្រោះយកខ្សែកមាស ម៉ូតច្រវាក់ឆាប១ខ្សែ ទម្ងន់១តម្លឹងមកមើល ។
ពេលកំពុងមើលនោះជនសង្ស័យបានយកខ្សែ.កមាសមកពាក់លើ.ក ពេលនោះជនរងគ្រោះភ្លេចខ្លួន ស្រាប់តែជនសង្ស័យក៏បន្លំដោះខ្សែកកាឡៃ ដែលពាក់ជាប់លើ.កស្រាប់ឲ្យទៅជនរងគ្រោះទុកវិញ រួចសុំមើលខ្សែកម៉ូតផ្សេងវិញ ។
ពេលនោះជនរងគ្រោះឆ្លើយថាចាំមួយភ្លែត តែបែរជាជនសង្ស័យឆ្លៀតឱកាសដើរចេញទៅក្រៅគេចខ្លួនបាត់ស្រមោលតែម្តង ។ ភ្លាមៗនោះ ជនរងគ្រោះហាក់មានការសង្ស័យក៏យកខ្សែ.កនោះមកពិនិត្យមើលម្តងទៀតទើបដឹងថាជាខ្សែ.កកាឡៃ ហើយក៏បាននាំគ្រួសារទៅកាន់ប៉ុស្តិ៍នគរបាលមូលដ្ឋានដើម្បីដាក់ពាក្យបណ្តឹង ។
នារសៀលថ្ងៃដដែល កម្លាំងនគរបាលមូលដ្ឋានបានចុះទៅពិនិត្យកាមេរ៉ាសុវត្ថិភានៅចំណុចផ្ទះកើតហេតុ ដើម្បីកំណត់ភិនភាគជនសង្ស័យ ក្នុងការងាយស្រួលតាមចាប់ខ្លួនយកមកផ្តន្ទាទោស ។ នាយប៉ុស្តិ៍នគរបាលច្បារអំពៅទី២ លោកទេព បូរ៉ា អោយដឹងថា មកទល់នឹងរសៀលថ្ងៃទី២២ ខែឆ្នាំដដែលនោះ កម្លាំងរបស់លោកបានចូលដើរល្បាតក្នុងផ្សារ ពិសេសចំណុចទូលក់គ្រឿងអលង្ការ ដើម្បីការពារសន្តិសុខសុវត្ថិភាពជូនបងប្អូនអាជីវករ ក្រែងកើតមាននូវអំពើប្លន់ជាដើម ។
ពេលកំពុងតែល្បាតនោះ ក៏ប្រទះឃើញស្ត្រីជាជនសង្ស័យដែលបានបន្លំយកគ្រឿងអលង្កាកាលពីថ្ងៃទី២០ តុលាកន្លងទៅនោះ សមត្ថកិច្ចសម្រេចធ្វើការឃាត់ខ្លួនបានភ្លាមៗតែម្តង ខណៈដែលស្ត្រីជាជនសង្ស័យខាងលើចូលមកប៉ុនប៉ងបន្លំគ្រឿងអលង្ការអាជីវករផ្សារច្បារអំពៅជាលើកទី២ម្តងទៀត ។
នៅចំពោះមុខសមត្ថកិច្ច ស្ត្រីជាជនសង្ស័យខាងលើបានឆ្លើយសារភាពថា មូលហេតុដែលខ្លួនបន្លំយកគ្រឿងអលង្ការនោះគឺដោយសារខ្លួនជំពាក់បំណុលគេច្រើនពេក ហើយខ្សែ.កមាសប្រភេទច្រវាក់ឆាបទម្ងន់១តម្លឹងដែលខ្លួនបានបន្លំយកនោះ គឺខ្លួនបានយកទៅលក់នៅផ្សារទួលសង្កែ ដោយលក់បានក្នុងតម្លៃ ១៤៣០ដុល្លារ ហើយលុយទាំងអស់នោះ ខ្លួនបានយកសងគេអស់ហើយ ។
សូមបញ្ជាក់ថា ក្នុងការឃាត់ខ្លួនជនសង្ស័យខាងលើនេះ សមត្ថកិច្ចដកហូតបាន ខ្សែកកាឡៃ១៧ខ្សែ, ខ្សែដៃកាឡៃ១ខ្សែ, ចិញ្ជៀនកាឡៃ៨វង់, ក្រវិលកាឡៃមានដាំត្បូងពណ៌ស២គូ, បណ្តោងខ្សែកកាឡៃមានដាំត្បូងពណ៌ស១, ទូរស័ព្ទដៃ២គ្រឿង ( ម៉ាក iPhone៦ ពណ៌ទឹកមាស, ម៉ាក iPhone៥ ពណ៌ផ្កាឈូក ), លុយដុល្លារ២ដុល្លារ, លុយខ្មែរ៦០០០រៀល, កាបូបក្រវាត់ចង្កេះពណ៌ខ្មៅ១ និងថង់ប្លាស្ទិចពណ៌ខ្មៅ១ ។
បច្ចុប្បន្ន ជនសង្ស័យ និងវត្ថុតាងត្រូវបញ្ចូនទៅកាន់អធិការដ្ឋាននគរបាលខណ្ឌច្បារអំពៅ រងចាំកសាងសំណុំរឿងចាត់ការតាមនីតិវិធីច្បាប់នៅពេលក្រោយ ៕
ចែករំលែកព័តមាននេះ