ប្រទេសអារ៉ាប៊ីសាអ៊ូឌីត ៖ ខណៈដែលប្រធានាធិបតីតួកគី លោករីស៊ីបតៃយីបអ័រដូហ្គានសន្យាពីការលាតត្រដាងរាល់ការពិតនាថ្ងៃទី២៣ តុលា អំពីការបាត់ខ្លួនអ្នកកាសែតប្រឆាំងអារ៉ាប៊ីសាអ៊ូឌីត លោក JAMAL KHASHOGGI ទូរទស្សន៍អាមេរិក CNN បានលាតត្រដាងវីដេអូមួយបង្ហាញភ្នាក់ងារអារ៉ាប៊ីសាអ៊ូឌីតម្នាក់យកសម្លៀកបំពាក់អ្នកកាសែតរូបនេះស្លៀកពាក់ ក្នុងបំណងប្រហែលជា ចង់បិទបាំងការស្លាប់របស់គេ។
តួកគីអះអាងនាថ្ងៃទី២២ តុលាថា ការសម្លាប់អ្នកកាសែតរូបនោះជាអ្នករួមសហការជាមួយកាសែតវ៉ាស៊ិនតោនប៉ុស្តិ៍ ត្រូវបានរៀបចំផែនការយ៉ាងព្រៃផ្សៃបំផុតទុកមុន ហើយសន្យាថា គ្មានអ្វីលាក់បាំងបានក្នុងរឿងនោះឡើយ។ ក្នុងសន្និសីទសារព័ត៌មានមួយ នាក្រុងអង់ការ៉ាលោក OMER CELIK អ្នកនាំពាក្យរបស់គណបក្សកាន់អំណាចតួកគី ថ្លែងថា យើងប្រឈមមុខនឹងសភាពការណ៍មួយដែលមានផែនការយ៉ាងសាហាវ ព្រមទាំងការខិតខំប្រឹងប្រែងដើម្បីបិទបាំងការធ្វើឃាតនោះ។
ប៉ូលិសតួកគីនាថ្ងៃទី២២ តុលា បានធ្វើរបាំងសន្តិសុខនៅជុំវិញចំណាតរថយន្តក្រោមដីមួយ ជាកន្លែងរកឃើញរថយន្ត១គ្រឿងរបស់ស្ថានកុងស៊ុលអារ៉ាប៊ីសាអ៊ូឌីតនៅក្រុងអ៊ីស្តង់ប៊ុល៕
ចែករំលែកព័តមាននេះ