សហរដ្ឋអាមេរិក ៖ ថ្លែងទៅកាន់សារព័ត៌មាននាថ្ងៃទី២២ ខែតុលា ប្រធានាធិបតីអាមេរិកលោកដូណាល់ត្រាំ លើកពីការគំរាមជំរុញឡើងវិញការប្រណាំងប្រជែងគ្រឿងសព្វាវុធនុយក្លេអ៊ែរ។
កាលពីថ្ងៃទី២០ តុលា លោកត្រាំប្រកាសថា សហរដ្ឋអាមេរិកនឹងចាកចេញពីសន្ធិសញ្ញាមួយដែលមានអាយុកាល ច្រើនទសវត្សមកហើយគឺសន្ធិសញ្ញាហាមឃាត់អាវុធនុយក្លេអ៊ែររយៈមធ្យមហៅកាត់ថា INF រួចនឹងផ្ដោតលើការប្រើប្រាស់និងការពង្រីកអាវុធនុយក្លេអ៊ែររយៈមធ្យម។ លោកថា រុស្ស៊ីបានរំលោភបំពានលើកិច្ចព្រព្រៀងនេះ ចាប់តាំងពីច្រើនឆ្នាំមកហើយ។
សន្ធិសញ្ញានោះចុះហត្ថលេខាកាលពីឆ្នាំ១៩៨៧ ដោយលោករ៉ូណាល់ រីហ្គេន និងលោកមីខាអ៊ីលហ្គ័របាឆូវ។ នាថ្ងៃទី២២ តុលា លោកត្រាំបានបន្ថែមលើការសម្រេចរបស់លោក ចាកចេញពីសន្ធិសញ្ញានេះដោយពន្យល់ថា នយោបាយរបស់អាមេរិកខាងគ្រឿងសព្វាវុធនុយក្លេអ៊ែរនឹងមានការវិវត្តន៍។ បើដរាបណាប្រទេសឯទៀតៗពុំងាកមករកហេតុផលសមស្របទេ នោះយើងនឹងបន្តពង្រីកអាវុធនុយក្លេអ៊េររបស់យើង។
លោកហាក់វាយប្រហារចំៗលើរុស្ស៊ី ព្រមទាំងសត្រូវធំនាពេលនេះរបស់ខ្លួនគឹចិនដែរ។ លោកថា នេះជាការគំរាមមួយសម្រាប់បណ្ដាអ្នកដែលចង់ប្រឆាំងយើង។ នោះបញ្ចូលចិន និងរុស្ស៊ី ព្រមទាំងអ្នកណាក៏ដោយដែលចង់លេងល្បែងនេះ។ ពួកអ្នកពុំអាចលេងល្បែងនេះជាមួយខ្ញុំឡើយ។
រុស្ស៊ីបានបញ្ចេញប្រតិកម្មតបវិញកាលពីចុងសប្ដាហ៍ដោយនិយាយថា សហរដ្ឋអាមេរិកបង្ហាញខ្លួនជាអ្នកគ្មានការទទួលខុសត្រូវខ្លាំងបំផុត ព្រមទាំងបដិសេធថា ខ្លួនពុំបានរំលោភបំពានលើសន្ធិសញ្ញា INF នោះទេ។ ទោះបីយ៉ាងណាអាមេរិកចោទប្រកាន់រុស្ស៊ីចាប់តាំងពីច្រើនឆ្នាំមកហើយថា បានផលិតបណ្ដាមីស៊ីលដែលអាចបាញ់ចេញពីដី ហើយអាចរត់បានចម្ងាយលើសពី៥០០គីឡូម៉ែត្រដែលផ្ទុយពីសន្ធិសញ្ញា។
ពួកអ្នកសិក្សាយុទ្ធសាស្ត្រនិយាយថា ការដកខ្លួនថយរបស់អាមេរិកពីសន្ធិសញ្ញា INFញ៉ាំងឲ្យពលរដ្ឋអឺរ៉ុបប្រមាណជា៧០០លាននាក់ ប្រឈមមុខនឹងការគំរាមថ្មីនៃសង្គ្រាម។ ពួកគេគូសបញ្ជាក់ថា ការដកខ្លួនថយនោះ ជាការលេងល្បែងអាក្រក់មួយ ព្រោះវាប៉ះពាល់ដល់សន្តិសុខពិភពលោក៕
ចែករំលែកព័តមាននេះ