រាជធានីភ្នំពេញ ៖ ជនសង្ស័យពីរនាក់ត្រូវបានប្រជាពលរដ្ឋចាប់បានប្រគល់ឲ្យសមត្ថកិច្ចបន្ទាប់ពីធ្វើសកម្ម ភាពឆក់ទូរស័ព្ទដៃមិនបានសម្រេច បង្កការភ្ញាក់ផ្អើលកើតឡើងកាលពីវេលាម៉ោង៧និង១០នាទីយប់ ថ្ងៃទី២១ ខែតុលា ឆ្នាំ២០១៨ ត្រង់ចំណុចខាងមុខកើតសាលាវ៉េសស្ទើន ប្រមាណ៥០០ម៉ែត្រ…
រាជធានីភ្នំពេញ ៖ ជនសង្ស័យពីរនាក់ត្រូវបានប្រជាពលរដ្ឋចាប់បានប្រគល់ឲ្យសមត្ថកិច្ចបន្ទាប់ពីធ្វើសកម្ម
ភាពឆក់ទូរស័ព្ទដៃមិនបានសម្រេច បង្កការភ្ញាក់ផ្អើលកើតឡើងកាលពីវេលាម៉ោង៧និង១០នាទីយប់ ថ្ងៃទី២១ ខែតុលា ឆ្នាំ២០១៨ ត្រង់ចំណុចខាងមុខកើតសាលាវ៉េសស្ទើន ប្រមាណ៥០០ម៉ែត្រ តាមបណ្ដោយផ្លូវ៥៦៦ ស្ថិតក្នុងសង្កាត់បឹងកក់ទី២ ខណ្ឌទួលគោក។
ជនសង្ស័យទាំង២នាក់ខាងលើ ម្នាក់ឈ្មោះ ឌី ដារត្ន ភេទប្រុស អាយុ២០ឆ្នាំ មុខរបរពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ និងម្នាក់ឈ្មោះម៉ៅ បញ្ញា អាយុ១៦ឆ្នាំ មុខរបរមិនពិតប្រាកដ ស្នាក់នៅសង្កាត់ព្រែកឯង ខណ្ឌច្បារអំពៅ។
តាមសម្តីពីស្ត្រីរងគ្រោះឈ្មោះ សោ ភ័ណ្ឌ អាយុ៣២ឆ្នាំ បានរៀបរាប់ប្រាប់ឲ្យដឹងថា នៅមុនពេលកើតហេតុ គាត់និងកូនស្រីរួមទាំងក្មួយប្រុសតូចៗចំនួន២នាក់ បានជិះម៉ូតូកង់បីឥណ្ឌាមួយគ្រឿងម៉ាកបាចា ពណ៌ស ដែលបើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ៥៦៦ ក្នុងទិសដៅពីលិចទៅកើត ដោយជិះចេញពីផ្ទះនៅម្តុំកាំខូស៊ីតធីបំណងជិះទៅញ៉ាំសាច់អាំងនៅម្តុំផ្សារទួលគោក។
ប្រភពដដែលបានបន្តថា លុះមកដល់ចំណុចកើតហេតុ ក៏ស្រាប់តែលេចមុខជនសង្ស័យចំនួនពីរនាក់ ជិះម៉ូតូមួយគ្រឿងម៉ាកហុងដាស្គូភី ស៊េរីឆ្នាំ២០១៩ ពណ៌ស គ្មានស្លាកលេខ ជិះមកពីក្រោយហើយបានធ្វើសកម្មភាពឆក់ទូរស័ព្ទដៃមួយគ្រឿងម៉ាកសាំសុង អេហ្វាយ ពីជនរងគ្រោះដែលកំពុងតែកាន់លេង តែមិនបានសម្រេច។
ភ្លាមៗនោះអ្នកបើកម៉ូតូកង់បីខាងលើឃើញដូចក៏បើកម៉ូតូកង់បីកៀរម៉ូតូរបស់ជនសង្ស័យបណ្តាលឲ្យម៉ូតូរបស់ជនសង្ស័យដួលបង្កជាការភ្ញាក់ផ្អើលដល់ប្រជាពលរដ្ឋដែលនៅក្បែរនោះចេញមកជួយចាប់បាន រួចក៏ប្រគល់ទៅអោយសមត្ថកិច្ចមូលដ្ឋានយកទៅសួរនាំ។
ក្រោយពេលកើតហេតុ ជនសង្ស័យទាំងពីរនាក់ខាងលើរួមទាំងវត្ថុតាងត្រូវបានសមត្ថកិច្ចនាំខ្លួនយកទៅសាកសួរនាំនៅប៉ុស្តិ៍នគរបាលរដ្ឋបាលបឹងកក់ទី២ដើម្បីកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌទួលគោករង់ចាំធ្វើការចាត់ការទៅតាមនីតិវិធី ៕
ចែករំលែកព័តមាននេះ