ខេត្តបន្ទាយមានជ័យ ៖ ឃាត់ខ្លួនស្ត្រីម្នាក់ និងដកហូតគ្រឿងញៀនខេទឹកកក២ថង់ធំ និងយ៉ាម៉ាចំនួន៩៩៦គ្រាប់ ត្រូវបានកម្លាំងកងរាជអាវុធហត្ថកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១៨ ខែតុលា ឆ្នាំ២០១៨។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា ជនសង្ស័យដែលត្រូវឃាត់ខ្លួនឈ្មោះ សៀន សុផា ភេទស្រី អាយុ៣៥ឆ្នាំ រស់នៅភូមិក្បាលស្ពានសង្កាត់ព្រះពន្លា ក្រុងសិរីសោភ័ណ។
លោកបានបញ្ជាក់ថា នៅពេលឃាត់ខ្លួនស្រីជនសង្ស័យគឺកម្លាំងកងរាជអាវុធហត្ថខេត្តបន្ទាយមានជ័យបានធ្វើការស្រាវជ្រាវបានដឹងមុខសញ្ញាហើយដោយអនុវត្តដីកាបង្គាប់អោយចាប់ខ្លួនលេខ១៨៣ របស់លោក ម៉ម ច័ន្ទវណ្ណះ ចៅក្រមជំនុំជម្រះសាលាដំបូងខេត្តបន្ទាយមានជ័យនិងសម្របសម្រួលដោយលោក សេង គីមឡាក់ ព្រះរាជអាជ្ញារងអមសាលាដំបូងខេត្តបន្ទាយមានជ័យ។
លោកវរសេនីយ៍ឯក ស ប៊ុនសឿង បានបញ្ជាក់ថា ដោយមានការណែនាំពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានអោយកម្លាំងកងរាជអាវុធហត្ថខេត្តបន្ទាយមានជ័យចុះប្រតិបត្តិការបង្ក្រាបឃាត់ខ្លួនជនសង្ស័យម្នាក់រឹបអូសមានគ្រឿងញៀនប្រភេទមេតំហ្វេតាមីនមានខេទឹកកកចំនួន២ថង់ធំ និងថ្នាំញៀនប្រភេទយ៉ាម៉ាចំនួន៩៩៦គ្រាប់ និងវត្ថុតាងមួយចំនួនទៀតនៅវេលាម៉ោង១ថ្ងៃទី១៧ ខែតុលា ឆ្នាំ២០១៨ នៅចំណុចនៅភូមិក្បាលស្ពាន សង្កាត់ព្រះពន្លា ក្រុងសិរីសោ
ភ័ណ។
បច្ចុប្បន្ន ជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់៕
ចែករំលែកព័តមាននេះ