រាជធានីភ្នំពេញ ៖ គម្រោងអភិវឌ្ឍន៍មួយដែលមានទំហំទឹកប្រាក់ប្រមាណ២៥០លានដុល្លារនៅខេត្តសៀមរាប នឹងចាប់ផ្ដើមនៅពេលដ៏ខ្លីខាងមុខ ស្របពេលអ្នកអភិវឌ្ឍន៍គម្រោងនោះបានរៀបចំរួចជាស្រេចនៅទីតាំង និងផែនការរបស់ខ្លួន ។ ការអភិវឌ្ឍន៍គម្រោងមួយនេះ នឹងជំរុញឲ្យវិស័យទេសចរណ៍ក្នុងខេត្តសៀមរាបកាន់តែមានសន្ទុះខ្លាំងឡើងថែមមួយកម្រិតទៀត ។…
រាជធានីភ្នំពេញ ៖ គម្រោងអភិវឌ្ឍន៍មួយដែលមានទំហំទឹកប្រាក់ប្រមាណ២៥០លានដុល្លារនៅខេត្តសៀមរាប នឹងចាប់ផ្ដើមនៅពេលដ៏ខ្លីខាងមុខ ស្របពេលអ្នកអភិវឌ្ឍន៍គម្រោងនោះបានរៀបចំរួចជាស្រេចនៅទីតាំង និងផែនការរបស់ខ្លួន ។ ការអភិវឌ្ឍន៍គម្រោងមួយនេះ នឹងជំរុញឲ្យវិស័យទេសចរណ៍ក្នុងខេត្តសៀមរាបកាន់តែមានសន្ទុះខ្លាំងឡើងថែមមួយកម្រិតទៀត ។
បើតាមលោក Rory Hunter នាយកប្រតិបត្តិ និងជាសហស្ថាបនិកនៃគម្រោងអភិវឌ្ឍន៍កោះសង្សារ បានឲ្យដឹងនៅក្នុងសន្និសីទមួយនៅសណ្ឋាគារ Roosewood កាលពីព្រឹកថ្ងៃទី១៦ តុលា ថា ការអភិវឌ្ឍគម្រោងនៅខេត្តសៀមរាបនេះ អាចចាត់ទុកថាជាគម្រោងធំមួយនៅកម្ពុជា ដែលវានឹងទាក់ទាញដល់បណ្ដាវិនិយោគិនធំៗមកពីក្រៅប្រទេស និងអាចជួយជំរុញសកម្មភាពវិនិយោគក្នុងប្រទេសនេះកាន់តែខ្លាំងឡើងថែមទៀត ។ លោកបញ្ជាក់ថា ៖« គម្រោងមួយនេះ នឹងបង្ហាញពិភពលោកបានដឹងពីភាពអស្ចារ្យរបស់ប្រទេសកម្ពុជា ជាពិសេសវិស័យទេសចរណ៍ផ្ទាល់តែម្ដង » ។
លោកស្រី អាន សុធីតា នាយិកាក្រុមហ៊ុនវាយតម្លៃនិងភ្នាក់ងារអចលនទ្រព្យ CBRE Cambodia បានឲ្យដឹងថា តាមពិតទៅ គម្រោងអភិវឌ្ឍន៍នេះ បានចាប់ផ្ដើមសិក្សាអស់រយៈពេល៤ឆ្នាំហើយ ដើម្បីយកគម្រោងដែលបានសិក្សាច្បាស់លាស់នោះទៅបង្ហាញអ្នកអភិវឌ្ឍន៍ពិតៗ ។ លោកស្រីបន្ដថា ៖« ពួកយើងបានកំណត់ថាអ្នកចូលរួមជាមួយពួកយើង ត្រូវតែជាអ្នកអភិវឌ្ឍន៍ពិតៗ និងនិយាយឲ្យចំទៅ គឺជាអ្នកមានលុយដើម្បីអភិវឌ្ឍន៍ផ្ទាល់ខ្លួនតែម្ដង » ។ លោកស្រីបញ្ជាក់ថា មិនយូរទៀតនោះទេ គម្រោងអភិវឌ្ឍន៍នៅក្នុងខេត្តសៀមរាបមួយនេះ នឹងចាប់ផ្ដើមដំណើរការបណ្ដើរៗ។ បើតាមការប៉ាន់ប្រមាណអាចមួយឆ្នាំទៀត នឹងចាប់ផ្ដើម ប៉ុន្តែវានឹងបញ្ចប់នៅពេលណានោះ អាស្រ័យលើម្ចាស់អភិវឌ្ឍន៍ផ្ទាល់ថា តើគាត់អភិវឌ្ឍន៍អ្វី ជាសណ្ឋាគារ រីសត ឬវីឡា និងត្រូវការពេលវេលាប៉ុនណាដើម្បីសាងសង់ ។
គួរបញ្ជាក់ថា សៀមរាបគឺជាគោលដៅអភិវឌ្ឍន៍សំខាន់មួយក្នុងចំណោមប៉ូលសេដ្ឋកិច្ចទាំង៣របស់កម្ពុជា បន្ទាប់ពីរាជធានីភ្នំពេញ និងខេត្តព្រះសីហនុ ។ ការអភិវឌ្ឍន៍ខេត្តសៀមរាបនាពេលបច្ចុប្បន្ន ត្រូវបានគេមើលឃើញថាកំពុងមានសន្ទុះខ្លាំង ដោយសារតែវាតំបន់ទេសចរណ៍ដ៏ទាក់ទាញមួយ ហើយអាកាសយានដ្ឋានអន្តរជាតិក្នុងខេត្តសៀមរាប ក៏មានការមមាញឹកផងដែរ ៕
ចែករំលែកព័តមាននេះ