ប្រទេសថៃ ៖ ថ្នាំញៀនប្រភេទយ៉ាម៉ាចំនួន១០លានគ្រាប់ បានត្រូវសមត្ថកិច្ចរឹបអូសយក
ទៅរក្សាទុក ដើម្បីស្រាវជ្រាវរកសាវតារម្ចាស់ ខណៈប្រជាពលរដ្ឋដែលចេញទៅរកត្រីក្នុងព្រៃប្រទះឃើញគេលាក់ទុកនៅចម្ងាយពីស្ថានីយតម្រួតប្រមាណ១០០ ម៉ែត្រ ។
យោងតាមរបាយការណ៍ដែលទទួលបាន គឺកាលពីថ្ងៃទី១៤ ខែតុលា វេលាម៉ោង២រសៀលមានប្រជាពលរដ្ឋរស់នៅប្របមាត់ស្ទឹងម៉ែឡាវ បានចេញទៅរកត្រីដល់ក្នុងព្រៃមួយ ក្នុងភូមិ៣ ឃុំដុងម៉ាក់ដាក់ ស្រុកម៉ែឡាវ ខេត្តឈៀងរ៉ៃ ចម្ងាយពីស្ថានីយតម្រួតប្រហែល១០០ម៉ែត្រ និងចេញពីផ្លូវជាតិប្រហែល៨០ម៉ែត្រ បានប្រទះឃើញមានការុងជីជាច្រើនការុងដែលជនមិនស្គាល់មុខលាក់ទុកនៅក្នុងព្រៃ ។
បន្ទាប់ពីប្រទះឃើញ ក៏រាយការណ៍ទៅសមត្ថកិច្ច ទើបមានការចុះទៅពិនិត្យឃើញការុងជីទាំងអស់មានចំនួន៥០ ដែលក្នុង១ការុងៗមានថ្នាំញៀនប្រភេទយ៉ាម៉ាចំនួន២សែនគ្រាប់សរុបទាំងអស់មានចំនួន១០លានគ្រាប់ ។
ពាក់ព័ន្ធនឹងថ្នាំញៀនទាំងនេះ សមត្ថកិច្ចសន្និដ្ឋានថា ជនសង្ស័យអាចដឹកតាមរថយន្តធុនធំ ព្រោះនៅកន្លែងប្រទះឃើញមានស្នាមកង់រថយន្ត ហើយការលាក់ទុកនេះទំនងជា
ជនសង្ស័យមិនទាន់ហ៊ាននាំចេញដោយសារនៅចម្ងាយតែប្រមាណ១០០ម៉ែត្រពីស្ថានីយតម្រួត ដូច្នេះគេត្រូវបង្ខំចិត្តលាក់ទុកសិន តែក៏ត្រូវបែកការណ៍ ៕
ចែករំលែកព័តមាននេះ