មន្ត្រីអាជ្ញាធរមីនស្នើសុំភាគីចិនបញ្ជូនក្រុមជំនាញមីនមកហ្វឹកហ្វឺនដល់មន្ត្រីមីនកម្ពុជា
- ភ្នំពេញ
រាជធានីភ្នំពេញ ៖ មន្ត្រីអាជ្ញាធរមីនកម្ពុជាបានស្នើសុំភាគីចិនបញ្ជូនអ្នកជំនាញដោះមីនមកជួយបណ្តុះបណ្តាលមន្ត្រីមីនកម្ពុជា និងថ្នាក់តំបន់ ។ ការស្នើសុំនេះកំឡុងពេលទស្សនកិច្ចផ្លូវការលើផ្នែកហ្វឹកហ្វឺនមីនរបស់គណៈប្រតិភូកម្ពុជានៃអាជ្ញាធរមីនទៅកាន់ប្រទេសចិនកាលពីពេលថ្មីៗនេះដែលកម្ពុជាធ្វើជាម្ចាស់ផ្ទះដោយមានសិក្ខាកាមអន្តរជាតិ មកពីបណ្តាប្រទេសក្នុងតំបន់ និងអាស៊ានចូលរួមផងដែរ ។ លោកនាយឧត្តមសេនីយ៍…
លោកនាយឧត្តមសេនីយ៍ សែម សុវណ្ណនី អនុប្រធានទី២អាជ្ញាធរមីន និងជាអគ្គនាយកមជ្ឈមណ្ឌលជាតិរក្សាសន្តិភាពបានថ្លែងប្រាប់អ្នកសារព័ត៌មាននៅថ្ងៃទី១៦ ខែតុលា ឆ្នាំ២០១៨ នៅមជ្ឈមណ្ឌលជាតិរក្សាសន្តិភាពថា«ក្នុងដំណើទស្សនៈកិច្ចផ្លូវការរបស់ប្រតិភូអាជ្ញាធរមីន និងមជ្ឈមណ្ឌលជាតិរក្សាសន្តិភាព ចុងសប្តាហ៍មុននេះនៅឯប្រទេសចិនគឺខាងកម្ពុជាបានស្នើសុំភាគីចិនបញ្ជូនក្រុមជំនាញផ្នែកបោសសំអាតមីនមកធ្វើបទឧទេ្ទសនាមក្នុងវគ្គហ្វឹកហ្វឺនគ្រប់គ្រងចំការមីន ដែលមានសិក្ខាកាមមកពីបណ្តាប្រទេសក្នុងតំបន់ និងអាស៊ាន ដែលកម្ពុជាធ្វើជាម្ចាស់ផ្ទះរៀបចំដោយមជ្ឈមណ្ឌលជាតិ នៅដើមឆ្នាំ២០១៩ ។ លោកថា ក្នុងវគ្គហ្វឹកហ្វឺននេះ កម្ពុជាក៏បានអញ្ជើញសិក្ខាកាមចិន២រូបមកចូលរួមក្នុងវគ្គហ្វឹកហ្វឺននេះផងដែរ» ។
លោក សែម សុវណ្ណនី អោយដឹងទៀតថា ខាងភាគីចិនបានឯកភាពទទួលយកសំណើនេះ ដូច្នេះកម្ពុជានឹងផ្ញើលិខិតអញ្ជើញជាផ្លូវការដោយត្រង់តែម្តង ទៅក្រសួងការពារចិនតាមរយៈស្ថានទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា និងស្នើសុំអញ្ជើញប្រតិភូចិន មកទស្សនកិច្ចនៅមជ្ឈមណ្ឌលជាតិក្នុងឆ្នាំ២០១៩ ខាងមុខនេះផងដែរ ។
លោកបញ្ជាក់បន្ថែមថា ភាគីចិនមានឆន្ទៈក្នុងការបន្តគាំទ្រប្រចាំឆ្នាំដល់គម្រោងបង្កើតសមត្ថភាព ដល់សិក្ខាកាមកម្ពុជាក្នុងប្រទេសកម្ពុជា និងផ្តល់អាហារូបករណ៍ដល់សិក្ខាកាមមកសិក្សានៅសាធារណរដ្ឋប្រជាមានិតចិនផងដែរ ។
ទាក់ទិនទៅនឹងវគ្គហ្វឹកហ្វឺនផ្នែកគ្រប់គ្រងចំការមីន កម្ពុជាបានបើកវគ្គកាលពីលើកទី១ម្តងរួចមកហើយ ក្នុងឆ្នាំ២០១៧កន្លងទៅ ដែលមានសិក្ខាកាមមកពីប្រទេសក្នុងតំបន់ និងអាស៊ាន ដែលមានសិក្ខាកាមជាង៣០នាក់ចូលរួមផងដែរ ៕
ចែករំលែកព័តមាននេះ