ប្រទេសចិន ៖ យោងតាមក្រសួងការពារជាតិចិនថា កងទ័ពចិន ម៉ាឡេស៊ី និងថៃមានគម្រោងធ្វើសមយុទ្ធយោធារួមមួយនៅម៉ាឡេស៊ីនាខែតុលានេះ។
ក្នុងសេចក្ដីប្រកាសមួយក្រសួងការពារជាតិចិននិយាយថា សមយុទ្ធយោធារួមនេះមានឈ្មោះថា «សន្តិភាព និងមិត្តភាព២០១៨» នឹងប្រព្រឹត្តទៅពីថ្ងៃទី២០ ទៅ២៩ ខែតុលា ក្នុងរដ្ឋ២របស់ម៉ាឡេស៊ី និងក្នុងតំបន់សមុទ្រ។ សរុបទាហានចិន៦៩២នាក់ នឹងចូលរួមក្នុងសមយុទ្ធនោះ បន្ថែមនាវាចម្បាំង៣គ្រឿង ឧទ្ថម្ភាគចក្រ២គ្រឿង យន្តហោះដឹកជញ្ជូនយោធាធុន IL-76 ចំនួន៣គ្រឿងព្រមទាំងរថយន្ត៤គ្រឿង។
សេចក្ដីប្រកាសបន្តថា សមយុទ្ធនោះសំដៅបង្ហាញថែមទៀតពីឆន្ទៈរួមរបស់កងទ័ពនៃប្រទេសទាំង៣ ថែរក្សាសន្តិភាព និងស្ថេរភាពក្នុងតំបន់សមុទ្រចិនខាងត្បូង ពង្រឹងការផ្លាស់ប្ដូរគ្នានិងកិច្ចសហប្រតិបត្តិការ ព្រមទាំងកែលម្អសមត្ថភាពឆ្លើយតបរួមគ្នាចំពោះការគំរាមកំហែងផ្សេងៗដល់សន្តិសុខ ហើយពុំសំដៅប្រឆាំងប្រណាមួយឡើយ៕
ចែករំលែកព័តមាននេះ