រាជធានីភ្នំពេញ ៖ បុរសម្នាក់ស្រវឹងស្រាបើករថយន្តបុកម៉ូតូពីក្រោយធ្វើឲ្យអ្នកបើកម៉ូតូសន្លប់ស្តូក រថយន្តបង្កព្យាយាមបើករត់ជាច្រើនគីឡូម៉ែត្រត្រូវបានសមត្ថកិច្ចចំនួន៣ខណ្ឌតាមដេញឃាត់បានភ្លាមៗ ព្រមទាំងអ្នកបើកបរផងដែរ បង្កអោយមានការភ្ញាក់ផ្អើលកាលពីវេលាម៉ោង ១០និង១៥នាទីយប់ថ្ងៃទី១៤ ខែតុលាឆ្នាំ២០១៨ នៅតាមបណ្ដោយផ្លូវជាតិលេខ៤ចំណុចកែងស្តុបទំនប់កប់ស្រូវ ដែលស្ថិតនៅភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AP-២១៩៦បើកបរដោយបុរសម្នាក់ ។ ចំណែកម៉ូតូរងគ្រោះម៉ាកហុងដាឌ្រីម ស៊េរី២០០៨ ពណ៌ខ្មៅ ពាក់ស្លាក កណ្តាល 1J-0825 បើកបរដោយបុរសម្នាក់ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា នៅមុនពេលកើតហេតុគេឃើញម៉ូតូរងគ្រោះម៉ាកហុងដាឌ្រីម ស៊េរីឆ្នាំ២០០៨ ពណ៌ខ្មៅ បើកបរដោយបុរសម្នាក់ ក្នុងទិសដៅពីលិចទៅកើត លុះបើកមកដល់ចំណុចកើតហេតុ ស្រាប់តែមានរថយន្តមួយគ្រឿង ម៉ាកហាយឡេនឌ័រ ពណ៌ទឹកប្រាក់ ដែលបើកបរដោយបុរសម្នាក់ធ្វើដំណើរក្នុងទិសដៅពីលិចទៅកើត ស្របជាមួយម៉ូតូរងគ្រោះ ។
ស្រាប់តែរថយន្តបានបានបើកបុកពីក្រោយម៉ូតូ ពេញទំហឹងបណ្តាលឲ្យអ្នកបើកបរម៉ូតូដួលបោកនឹងថ្នល់បែកក្បាលសន្លប់ស្តូកស្តឹងនៅកន្លែង ចំណែកឯរថយន្តបង្កខាងលើបាន ព្យាយាមបើករត់ តែត្រូវបានសមត្ថកិច្ចនគរបាលប៉ុស្តិ៍ចោមចៅ៣ទាក់ទងទៅកំលាំងនគរបាលខណ្ឌសែនសុខនឹងខណ្ឌទួលគោកដើម្បីឃាត់រថយន្តបង្កខាងលើបាននៅផ្លូវសហព័ន្ធរុស្ស៊ីទល់មុខច្រកចូលវត្ត នាគវ័ន្ត ស្ថិតនៅខណ្ឌទួលគោក រាជធានីភ្នំពេញ។
ប្រភពព័ត៌មានពីសមត្ថកិច្ចបានបន្តទៀតថា ពេលឃាត់រថយន្តបង្កខាងលើបានហើយ ខណ្ឌពោធិ៍សែនជ័យ សមត្ថកិច្ចនគរបាលខណ្ឌពោធិ៍សែនជ័យបាន បើករថយន្ត ត្រឡប់មកគោលដៅចាស់វិញដើម្បីដោះស្រាយជាមួយជនរងគ្រោះ។
ក្រោយពេលកើតហេតុភាគី រថយន្តបង្កខាងលើបានមកដោះស្រាយជាមួយតំណាងជនរងគ្រោះដែរ តែដោយសារជនរងគ្រោះរងរបួសធ្ងន់ពេកមិនទាន់បានដោះស្រាយភ្លាមៗនោះទេ ជំនាញចរាចរណ៍ខណ្ឌពោធិ៍សែនជ័យយករថយន្តនិងម៉ូតូយកទៅរក្សាទុកដើម្បីរង់ចាំការដោះស្រាយនៅថ្ងៃក្រោយ ៕
ចែករំលែកព័តមាននេះ