សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៣តុលាបានទទួលនៅឯសេតវិមាន គ្រូប្រដៅសាសនាអាមេរិក លោក ANDREW BRUNSONក្រោយការដោះលែងរូបលោក ដែលលោកត្រាំចាត់ទុកថា នោះជាជំហានធំមួយដើម្បីកែលម្អទំនាក់ទំនងដែលតានតឹងខ្លាំងជាមួយក្រុងអង់ការ៉ា បន្ទាប់ពីវិបត្តិធ្ងន់ធ្ងរបំផុតមួយរវាងប្រទេសទាំង២មក។
ក្នុងការិយាល័យពងក្រពើ អង្គុយក្បែរគ្រូប្រដៅសាសនាជាអតីតអ្នកទោសរូបនេះ លោកត្រាំបានថ្លែងអំណរគុណដល់សមភាគីតួកគី លោករីស៊ីបតៃយីបអ័រដូហ្គាន ដែលជួយឲ្យសម្រេចបានការដោះលែងនេះ។
ទោះបីជាលោកអះអាងជាថ្មីថាពុំមានកិច្ចព្រមព្រៀងណាមួយជាមួយអាជ្ញាធរតួកគីដើម្បីឲ្យទទួលបានការដោះលែងនោះក្ដី ក៏លោកត្រាំបានសន្យាធ្វើការសិក្សា ពីអនាគតនៃទណ្ឌកម្មទាំងឡាយដែលបានដាក់នាឱកាសនៃការគាបសង្កត់លើតួកគី។មុននេះបន្តិចតាមTWITTERលោកត្រាំវាយតម្លៃថា ការដោះលែងនេះអាចនាំទៅរកទំនាក់ទំនងល្អឡើងវិញរហូតដល់ប្រសើរបំផុតទៀតផង។
ចំណែកប្រធានាធិបតីតួកគីវិញបានឆ្លើយតបវិញ ដោយអំពាវនាវឲ្យមានកិច្ចសហប្រតិបត្តិការល្អមួយ បន្ទាប់ពីលោកបានលើកពីឯករាជ្យភាពនៃតុលាការរបស់ប្រទេសលោកមក។
មកដល់ក្រុងវ៉ាស៊ិនតោនកាលពីថ្ងៃទី១៣តុលា បន្ទាប់ពីជាប់ឃុំឃាំងរយៈពេលយូរនិងបន្ទាប់ពីឈប់សំចតនៅប្រទេសអាល្លឺម៉ង់ លោកBRUNSONបានសម្ដែងការអរគុណខ្លាំងបំផុតចំពោះលោកត្រាំនិងរដ្ឋាភិបាលរបស់លោកព្រមទាំងសមាជិកសភាអាមេរិកជាច្រើនរូប ដែលរួមកម្លាំងគ្នាជួយលោកឲ្យរួចពីការឃុំឃាំង។
តុលាការក្រុងALIAGAតំបន់IZMIRតួកគី កាលពីថ្ងៃទី១២តុលា បានកាត់ទោសគ្រូប្រដៅសាសនារូបនេះ ដាក់គុក៣ឆ្នាំនិង១ខែពីបទជួយទ្រទ្រង់ដល់បណ្ដាអង្គការភេរវកម្ម ពួកបំបែកខ្លួននិយមនៃគណបក្សពលករឃើតឌីស្ថាននិងបណ្ដាញរបស់លោក FETHULLAH GULENដែលក្រុងអង់ការ៉ាចោទថា ជាអ្នករៀបចំធ្វើរដ្ឋប្រហារពុំសម្រេចកាលពីឆ្នាំ២០១៦។ការចោទប្រកាន់ទាំងនេះ ត្រូវបានគ្រូប្រដៅសាសនាអាមេរិកអាយុ៥០ឆ្នាំរូបនេះបដិសេធទាំងស្រុង។
ទោះជាមានការកាត់ទោសបែបនេះក្ដី តុលាការតួកគីបានដោះលែងរូបលោកភ្លាមៗដោយគូសបញ្ជាក់ជាពិសេសថា លោកបានឆ្លងកាត់ការជាប់ឃុំឃាំងក្នុងពន្ធនាគាររយៈពេល១ឆ្នាំកន្លះនិងជាប់ឃុំឃាំងក្នុងផ្ទះជាង២ខែរួចមកហើយ៕
ចែករំលែកព័តមាននេះ