រាជធានីភ្នំពេញ ៖ អគ្គនាយកកំពង់ផែស្វយ័តក្រុងព្រះសីហនុ បានអះអាងថា ឆ្នាំនេះ កំណើនទំនិញឆ្លងកាត់កំពង់ផែហាក់មានការកើនឡើងខ្ពស់ជាងឆ្នាំមុនៗ និងអាចចាត់ទុកថាឆ្នាំនេះ កំណើននៃអាជីវកម្មរបស់កំពង់ផែកើនឡើងជាប្រវត្តិសាស្ត្រ មានន័យថា ពីមុនៗមក មិនធ្លាប់មានកំណើនដូចឆ្នាំនេះឡើយ ។
លោក លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកកំពង់ផែស្វយ័តក្រុងព្រះសីហនុ បានឲ្យដឹងថា ក្នុងរយៈពេល៨ខែដើមឆ្នាំ២០១៨នេះ កំណើនទំនិញឆ្លងកាត់កំពង់ផែស្វយ័តក្រុងព្រះសីហនុ មានប្រមាណជាង២២% ដែលកំណើននេះចាត់ទុកថាជាកំណើនខ្ពស់មួយ និងកម្រមានសម្រាប់អាជីវកម្មរបស់កំពង់ផែក្នុងរយៈពេលប៉ុន្មានឆ្នាំចុងក្រោយនេះ ។ លោកមានប្រសាសន៍ថា ៖« ទំនិញឆ្លងកាត់កំពង់ផែក្នុងរយៈពេល៨ខែដើមឆ្នាំ២០១៨នេះ បើធៀបនឹងរយៈពេលដូចគ្នាកាលពីឆ្នាំ២០១៧ ឃើញថា មានកំណើនមួយខ្ពស់ ដែលមិនធ្លាប់មានពីមុនមកនោះទេ។ ជាក់ស្ដែងទំនិញឆ្លងកាត់មានកំណើនរហូតដល់ជាង២២% ដែលធម្មតាមានកំណើនត្រឹមតែប្រមាណ១២%ប៉ុណ្ណោះ»។
លោកបន្តថា សម្រាប់នាវាដែលចូលចតនៅកំពង់ផែក្នុងរយៈពេលដូចគ្នានេះដែរ មានកំណើនប្រមាណ៨% ក្នុងនោះចំណុះផ្ទុកបានកើនឡើងរហូតដល់១១% ដែលធ្វើឲ្យចំណូលពីកំពង់ផែនេះបានកើនឡើងប្រមាណ២១,៧%ដែរ ។ តាមរយៈតួលេខនេះបានបញ្ជាក់ថា នាវាដែលចូលចតនៅកំពង់ផែកាន់តែធំទៅៗហើយ និងបានបញ្ជាក់ថា សេដ្ឋកិច្ចប្រទេសកម្ពុជាក៏កំពុងតែរីកចម្រើនទៅមុខផងដែរ ។ លោកបន្ថែមថា ក្នុងរយៈពេលបីបួនឆ្នាំមុន ទំនិញចេញចូលដោយឆ្លងកាត់កំពង់ផែស្វយ័តមួយនេះមានមានខុសគ្នាឆ្ងាយណាស់ ក្នុងនោះទំនិញនាំចេញ ហាក់មានបរិមាណតិចជាងទំនិញនាំចូល ក៏ប៉ុន្តែនៅពេលបច្ចុប្បន្ននេះ ទំនិញនាំចេញ និងនាំចូល មានបរិមាណប្រហាក់ប្រហែលគ្នា ។
លោកបន្ដថា ៖« នេះបានបញ្ជាក់ឲ្យឃើញថា ការនាំចេញរបស់កម្ពុជាក្នុងរយៈពេលថ្មីៗនេះមានកំណើនខ្ពស់ ហើយទំនិញដែលកម្ពុជាបាននាំចេញមានដូចជា អង្ករ សម្លៀកបំពាក់ កៅស៊ូ ជាដើម ហើយនាំចូលមកវិញនូវ សម្ភារកាត់ដេរ សំណង់ និងមធ្យោបាយផ្សេងៗ ដូចជាយានយន្តទាំងរថយន្ត និងទោចក្រយានយន្ត »។
លោកបញ្ជាក់ថា កំណើនអាជីវកម្មរបស់កំពង់ផែស្វយ័តក្រុងព្រះសីហនុ ទទួលបានលទ្ធផលបែបនេះ បន្ទាប់ពីបានដាក់ឲ្យដំណើរការនូវកំពង់ផែទឹកជ្រៅមួយកាលពីពេលកន្លងទៅនេះ ដែលអាចអនុញ្ញាតឲ្យនាវាធំៗចូលចត ព្រមទាំងអាចផ្ទុកទំនិញបានច្រើនជាងមុនផងដែរ ។
លោកបញ្ជាក់បន្ថែមថា ៖« សម្រាប់គម្រោងកំពង់ផែទឹកជ្រៅមួយទៀត ដែលរាជរដ្ឋាភិបាលកម្ពុជា បានស្នើរាជរដ្ឋាភិបាលជប៉ុន ដើម្បីមកអភិវឌ្ឍន៍នោះ វានឹងផ្ដល់ប្រយោជន៍ខ្ពស់ក្នុងការចរាចរទំនិញចេញចូល និងអាចអនុញ្ញាតឲ្យនាវាធំៗឆ្លងកាត់បានកាន់តែច្រើន។ ម្យ៉ាងទៀត ការដឹកជញ្ជូនទំនិញតាមផ្លូវទឹកផ្ដល់ផលចំណេញច្រើនជាងការដឹកជញ្ជូនតាមផ្លូវអាកាស ហើយផលប្រយោជន៍ធំដែលបានពីកំពង់ផែនេះដែរ នឹងធ្វើឲ្យសេដ្ឋកិច្ចរបស់កម្ពុជា នឹងមានភាពប្រកួតប្រជែងកាន់តែខ្លាំងជាមួយបណ្ដាប្រទេសក្នុងតំបន់ » ៕
ចែករំលែកព័តមាននេះ