សហរដ្ឋអាមេរិក-អ៊ីរ៉ង់ ៖ ជាការវាយបកមួយចំពោះសហរដ្ឋអាមេរិក ដែលតុលាការយុត្តិធម៌អន្តរជាតិ CIJ កាលពីថ្ងៃទី៣ តុលា សម្រេចចេញបញ្ជាដល់អាមេរិកឲ្យផ្អាកទណ្ឌកម្មមួយចំនួនប្រឆាំងអ៊ីរ៉ង់ សំដៅលើបណ្ដាទ្រព្យសម្បត្តិសម្រាប់គោលដៅមនុស្សធម៌។
តុលាការ CIJ បានសម្រេចជាឯកច្ឆ័ន្ទថាសហរដ្ឋអាមេរិក តាមរយៈបណ្ដាមធ្យោបាយដែលខ្លួនជ្រើសរើស ត្រូវលុបចោលរាល់ការរាំងខ្ទប់ដោយបណ្ដាវិធានការ ប្រកាសកាលពីថ្ងៃទី៨ ឧសភា ២០១៨ ហើយឲ្យមានការនាំចេញដោយសេរីទៅកាន់អ៊ីរ៉ង់នូវឱសថ បណ្ដាបរិក្ខាពេទ្យ គ្រឿងឧបភោគបរិភោគនិងបណ្ដាផលិតផលកសិកម្ម ព្រមទាំងរបស់របរចាំបាច់ទាំងឡាយសម្រាប់សន្តិសុខអាកាសចរណ៍ស៊ីវិល។
នេះជាការប្រកាសរបស់ចៅក្រមលោក ABDULQAWI AHMED YUSUF ប្រធានតុលាការCIJ។ លោកបន្តថាទណ្ឌកម្មទាំងនេះអាចបំផ្លាញធ្ងន់ធ្ងរដល់សុខភាពនិងអាយុជីវិតរបស់មនុស្សដែលរស់នៅក្នុងដែនដីអ៊ីរ៉ង់។
ក្រសួងការបរទេសអ៊ីរ៉ង់បានស្វាគមន៍សាលក្រមនោះថាជាជ័យជម្នះមួយនិងជាសញ្ញាថ្មីដែលបញ្ជាក់យ៉ាងច្បាស់ថា អ៊ីរ៉ង់ការពារសិទ្ធិរបស់ខ្លួន។
ចំណែករដ្ឋមន្ត្រីការបរទេសអាមេរិក លោកMIKE POMPEOយល់ផ្ទុយពីនេះថា នោះជាបរាជ័យមួយសម្រាប់អ៊ីរ៉ង់ ព្រោះតុលាការក្រុងឡាអេ បដិសេធស្ទើររាល់ការទាមទាររបស់អ៊ីរ៉ង់ ដើម្បីឲ្យផ្អាកជាសាកលទណ្ឌកម្មអាមេរិក។ សហរដ្ឋអាមេរិកកាលពីថ្ងៃទី៣តុលា បានដកខ្លួនថយចេញពីកិច្ចព្រមព្រៀងអន្តរជាតិ២ ក្រោយពីអ៊ីរ៉ង់ និងប៉ាឡេស្ទីនដាក់ពាក្យប្ដឹងតុលាការ CIJ ប្រឆាំងបណ្ដាសេចក្ដីសម្រេចរបស់រដ្ឋការលោកត្រាំ៕
ចែករំលែកព័តមាននេះ