រាជធានីភ្នំពេញ ៖ លោក ពេជ្រ វិជ្ជាធរ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី២ តុលា បានប្រកាសសាលក្រមផ្ដន្ទាទោសលើសំណុំរឿងឧកញ៉ា ស៊ីឡាឡយ…
រាជធានីភ្នំពេញ ៖ លោក ពេជ្រ វិជ្ជាធរ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី២ តុលា បានប្រកាសសាលក្រមផ្ដន្ទាទោសលើសំណុំរឿងឧកញ៉ា ស៊ីឡាឡយ និងខ្មែរកាត់ឡាវម្នាក់ ដែលជាអ្នក ដឹកជញ្ជូនគ្រឿងញៀនជាង៥៤គីឡូក្រាម ពីប្រទេសឡាវក្នុងគោលបំណងយកមកលក់និងចែកចាយលើទីផ្សារងងឹតក្នុងព្រះរាជាណាចក្រកម្ពុជា ដោយដាក់ពន្ធនាគារអស់មួយជីវិត ក្រោមការចោទប្រកាន់ពីបទដឹកជញ្ជូន រក្សាទុកនិងជួញដូរសារធាតុញៀនដោយខុសច្បាប់ តាមមាត្រា៤០ នៃច្បាប់ប្រឆាំងគ្រឿងញៀនកម្ពុជា ។
ជនជាប់ចោទមាន២នាក់ តែឧកញ៉ា សុី ឡាឡយ បានស្លាប់ទៅហើយនៅក្នុងមន្ទីរពេទ្យ ខណៈពេលឃុំខ្លួនបណ្ដោះអាសន្ន ដូច្នេះក៏ត្រូវបានរំលត់បណ្ដឹងអាជ្ញា ។ នៅសល់តែម្នាក់ដេកគុកមួយជីវិត ។
អតីតឧកញ៉ា សុី ឡាឡយ ជាម្ចាស់គ្រឿងញៀនជាង៥៤គីឡូក្រាម ដែលជាប់ការស៊ើបអង្កេតនៅក្នុងពន្ធនាគារព្រៃស បានទទួលមរណភាពកាលពីល្ងាចថ្ងៃទី២២ សីហា ២០១៨ នៅមន្ទីរពេទ្យមិត្តភាពខ្មែរ.សូវៀត ដោយសារជំងឺ ។
គួររំលឹកថា កាលពីថ្ងៃទី១៨ ឧសភា ២០១៧ សមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ ក្រោមការដឹកនាំដោយលោកឧត្តមសេនីយ៍ឯក ឡឹក វណ្ណៈ នាយកមន្ទីរ ក្រោមការចង្អុលបង្ហាញពីសំណាក់នាយឧត្តសេនីយ៍ ម៉ក់ ជីតូ អគ្គស្នងការរងនគរបាលជាតិទទួលបន្ទុកការ ងារប្រយុទ្ធប្រឆាំងគ្រឿងញៀនបានបង្រា្កប និងស្ទាក់ចាប់ខ្លួនឈ្មួញគ្រឿងញៀន១ក្រុម ក្នុងនោះមានមេខ្លោងធំម្នាក់នៅក្នុងស្រុកខ្មែរ គឺឧកញ៉ា សុី ឡាឡយ ភេទប្រុស អាយុ៤៣ឆ្នាំ និងម្នាក់ឈ្មោះ លួន សុផា ភេទប្រុស អាយុ៣០ឆ្នាំ ជាជនជាតិខ្មែរកាត់ឡាវ ស្ថិតនៅចំណុចតាមដងផ្លូវមួយកន្លែងចេញពីប្រទេសឡាវ ចូលមកខេត្តស្ទឹងត្រែង ដែលពួកគេមានបំណងនាំគ្រឿងញៀនជាង៥៤គីឡូក្រាម នោះមកកាន់រាជធានីភ្នំពេញ ។
ក្រោយចាប់ខ្លួនមេខ្លោងនិងជនជាតិខ្មែរឡាវម្នាក់នោះ នៅថ្ងៃទី១៦ សីហា កម្លាំងសមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃ សហការជាមួយនគរបាលខេត្តស្ទឹងត្រែង បានចុះអនុវត្តន៍ដីកាបង្គាប់ឲ្យនាំខ្លួន ចេញដោយចៅក្រមសាលាដំបូងរាជធានីភ្នំពេញលោក ធាម ច័ន្ទពិសិដ្ឋ ចុះថ្ងៃទី២៥ កក្កដា ឈានដល់ការឃាត់ខ្លួនជនសង្ស័យម្នាក់ទៀតឈ្មោះ ថង វ៉ាង ពីបទជួញដូរ និងរក្សាទុកដោយខុសច្បាប់នូវសារធាតុញៀន ។
ជនសង្ស័យឈ្មោះ ថង វ៉ាង មុខរបរជានាយកក្រុមហ៊ុនដឹកជញ្ជូន ថង វ៉ាង ដែលបានជាប់ពាក់ព័ន្ធក្នុងការដឹកជញ្ជូនគ្រឿងញៀនពីខេត្តស្ទឹងត្រែង យកមកឲ្យឧកញ៉ា សុី ឡាឡយ នៅរាជធានីភ្នំពេញ ។ សាលក្រមក្នុងសំណុំរឿងឧកញ៉ា សុី ឡាឡយ ជួញដូរគ្រឿងញៀនជាង៥៤គីឡូក្រាមនេះបានសម្រេចផ្តន្ទាទោសលើជនជាប់ចោទ២នាក់ ដាក់គុកអស់មួយជីវិត ប៉ុន្តែមេខ្លោងឧកញ៉ា«សីុ ឡាឡយ»បានស្លាប់ទៅហើយមុនពេលកាត់ទោស ៕
ចែករំលែកព័តមាននេះ