ខេត្តបន្ទាយមានជ័យ ៖ នគរបាលការិយាល័យព្រហ្មទណ្ឌកម្រិតធ្ងន់ខេត្ត បានបង្ហាញមុខឃាតករវាយសម្លាប់ប្រពន្ធទី៣របស់ខ្លួនព្រោះតែភ្លើងប្រចណ្ឌ មុនពេលនាំខ្លួនទៅសាលាដំបូងខេត្ត នាព្រឹកថ្ងៃទី៣០ កញ្ញា បន្ទាប់ពីតាមប្រមាញ់ដល់ខេត្តពោធិ៍សាត់កាលពីយប់ថ្ងៃទី២៨ ខែកញ្ញា កន្លងមក ។
លោកវរសេនីយ៍ទោ ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឲ្យដឹងថា បុរសរូបនេះ ឈ្មោះ ទុង ថា អាយុ៤៦ឆ្នាំ ចំណែកស្ត្រីរងគ្រោះជាប្រពន្ធឈ្មោះ ធ្លោក
ថាញ់ អាយុ៤៣ឆ្នាំ ប្តីប្រពន្ធនេះរស់នៅភូមិត្រសេកជ្រំ ឃុំម៉ាឡៃ ស្រុកម៉ាឡៃ ។ ក្រោយពីវាយសម្លាប់ប្រពន្ធរួចហើយ បុរសជាប្តីបានរត់គេចទៅលាក់ខ្លួននៅក្នុងស្រុកភ្នំក្រវាញ ខេត្តពោធិ៍សាត់ ។
លោកនាយការិយាល័យបញ្ជាក់ថា ក្រោយពីទទួលបានព័ត៌មានពីករណីឃាតកម្មនេះ លោក
ឧត្តមសេនីយ៍ទោ អាត់ ខែម ស្នងការនគរបាលខេត្ត បានដាក់ចេញនូវបទបញ្ជាឲ្យតាមប្រមាញ់ជនល្មើសយកមកផ្តន្ទាទោសឲ្យខាងតែបាន ទើបកម្លាំងនគរបាលព្រហ្មទណ្ឌ និងនគរបាលស្រុកម៉ាឡៃ ដឹកនាំបញ្ជាដោយលោកឧត្តមសេនីយ៍ត្រីសិទ្ធ ឡោះ ស្នងការរងនគរបាលខេត្ត ទទួលផែននគរបាលព្រហ្មទណ្ឌ និងមានការសម្របសម្រួលពន្លាតដែនដីពីលោក មាស ច័ន្ទពិសិដ្ឋ ព្រះ
រាជអាជ្ញាអមសាលាដំបូងខេត្ត បានសហការជាមួយនគរបាលខេត្តពោធិ៍សាត់ ចាប់ឃាត់ខ្លួនបុរសជាប្តីបាន នាវេលាម៉ោង៧យប់ថ្ងៃទី២៨ ខែកញ្ញា ។
លោកវរសេនីយ៍ទោ ភឿង ម៉ាន់សឹង្ហ បញ្ជាក់ថា ប្តីប្រពន្ធនេះគ្មានកូនទេនិងជាមនុស្សញៀនស្រាដូចគ្នា ហើយពេលប្តីស្រវឹងតែងតែប្រើអំពើហិង្សាវាយដំប្រពន្ធ ។ ជាក់ស្តែង កាលពីថ្ងៃទី២៤ ខែកញ្ញា បុរសជាប្តីដែលស្រវឹងបានយកភ្លើងបារីអុជភ្លៅប្រពន្ធ និងវាយមុខប្រពន្ធបណ្តាលឲ្យជាំភ្នែក តែពេលសមត្ថកិច្ចទៅសួរនាំស្ត្រីជាប្រពន្ធបានលាក់លៀមសមត្ថកិច្ច ។
លុះនៅយប់ថ្ងៃទី២៧ ខែកញ្ញា ប្តីប្រពន្ធនេះស្រវឹងស្រាក៏ឈ្លោះប្រកែកគ្នា តែដោយសារជារឿងដដែលៗទើបគ្មានអ្នកណាចាប់អារម្មណ៍ ។ លុះដល់វេលាម៉ោង៤ទៀបភ្លឺថ្ងៃទី២៨ ខែកញ្ញា ទើបដឹងថាស្ត្រីជាប្រពន្ធស្លាប់ ឯប្តីក៏បាត់ខ្លួនទើបមានការភ្ញាក់ផ្អើលឡើង ។
ក្រោយពេលត្រូវចាប់ខ្លួន បុរសជាប្តីសារភាពថា នៅវេលាម៉ោង៤ទៀបភ្លឺថ្ងៃទី២៨ ខែកញ្ញា ខ្លួនបានវាយប្រពន្ធទី៣រហូតស្លាប់មែនក៏ព្រោះតែភ្លើងប្រចណ្ឌជាមួយនឹងអ្នកជិតខាង ហើយពេលខ្លួនហៅប្រពន្ធមកដេកជាមួយប្រពន្ធមិនព្រម ក៏ខឹងយកញញួរមកវាយដើមទ្រូង និងយកខ្នើយខ្ទប់ច្រមុះ ។ ក្រោយពេលនាងស្លាប់ ខ្លួនក៏រត់គេចទៅផ្ទះឪពុកធំ នៅភូមិអូរឫស្សី ឃុំបាក់ចិញ្ចៀន ស្រុកភ្នំក្រវាញញ ខេត្តពោធិ៍សាត់ ក៏ត្រូវសមត្ថកិច្ចចាប់ឃាត់ខ្លួនតែម្តង ។
ចំពោះរឿងដែលចោទថា ធ្លាប់សម្លាប់មនុស្សនៅខេត្តព្រៃវែងកាលពីអំឡុងឆ្នាំ១៩៩៤នោះ មិនមែនទេ គឺមិត្តភក្តិម្នាក់ជាអ្នកសម្លាប់ គ្រាន់តែករណីនោះបានកើតឡើងនៅផ្ទះរបស់ខ្លួន ដោយសារជម្លោះពេលផឹកស៊ីរវាងមិត្ត និងមិត្តរបស់គេ ។ ចាប់តាំងពីនោះមក ដោយភ័យខ្លាចមានរឿងរ៉ាវដល់រូបគេ ទើបរត់គេចខ្លួនមកស្រុកម៉ាឡៃ ដែលមានរយៈជាង២០ឆ្នាំហើយ ៕
ចែករំលែកព័តមាននេះ