រាជធានីភ្នំពេញ ៖ ប្រព័ន្ធតាមដាន GPS បាននាំផ្លូវកម្លាំងនគរបាលប៉ុស្តិ៍ចោមចៅទី១ និង នគរបាលប៉ុស្តិ៍ភ្លើងឆេះរទេះ ទៅធ្វើការឆែកឆេររកឃើញម៉ូតូជាច្រើនគ្រឿង រួមជាមួយសម្ភារ ពាក់ព័ន្ធនឹងអំពើចោរកម្មមួយចំនួនទៀត…
រាជធានីភ្នំពេញ ៖ ប្រព័ន្ធតាមដាន GPS បាននាំផ្លូវកម្លាំងនគរបាលប៉ុស្តិ៍ចោមចៅទី១ និង នគរបាលប៉ុស្តិ៍ភ្លើងឆេះរទេះ ទៅធ្វើការឆែកឆេររកឃើញម៉ូតូជាច្រើនគ្រឿង រួមជាមួយសម្ភារ ពាក់ព័ន្ធនឹងអំពើចោរកម្មមួយចំនួនទៀត ដែលចោរលួចយកទៅលាក់ទុកនៅក្នុងបន្ទប់ផ្ទះជួល
២កន្លែង ។ ប៉ុន្តែគួរឲ្យសោកស្ដាយ ចោរបានគេចខ្លួនបាត់នៅតែស្ត្រីជាសង្សារម្នាក់ត្រូវនគរ
បាលឃាត់ខ្លួន នាំយកទៅសួរនាំរកអត្តសញ្ញាណមុខសញ្ញាចោរ ។
ប្រតិបត្តិការនេះ បានធ្វើឡើងកាលពីវេលាម៉ោង៣និង៣០នាទីរសៀលថ្ងៃទី២៩ ខែកញ្ញា នៅបន្ទប់អត់លេខ និងបន្ទប់លេខ១១២៣ ជាបន្ទប់ជួល ស្ថិតនៅចម្ងាយពីគ្នាប្រហែល២គីឡូម៉ែត្រក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
មន្ត្រីនគរបាលបានឲ្យដឹងថា ស្ត្រីជាសង្សាររបស់ជនសង្ស័យខាងលើ ដែលត្រូវបានឃាត់ខ្លួននាំទៅសាកសួរនោះឈ្មោះ ជឿន សុផា អាយុ១៩ឆ្នាំ ស្នាក់នៅបន្ទប់ជួលដែលជនសង្ស័យលាក់ទុកម៉ូតូដែលលួចបាន ។
ចំណែកមូលហេតុដែលឈានដល់ការចុះឆែកឆរបន្ទប់ជួលទាំ២ខាងលើ គឺដោយសារតែកាលពីម៉ោងប្រហែល១១ព្រឹកថ្ងៃនោះ មានម៉ូតូមួយគ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៥ ពាក់ផ្លាកលេខ ភ្នំពេញ ១DG-៥៣៨៦ ត្រូវបានចោរលួចកាច់សោ.កចេញពីសង្កាត់ភ្លើងឆេះរទេះ ដោយម៉ូតូនោះមានភ្ជាប់ប្រព័ន្ធតាមដានGPSទៀតផង ។ ក្រោយពេលដឹងថាបាត់ ម្ចាស់ម៉ូតូក៏បានប្ដឹងសុំឲ្យនគរបាលប៉ុស្តិ៍ភ្លើងឆេះរទេះជួយអន្តរាគមន៍ ។
ប្រភពដដែលបន្តថា ខណៈនោះនគរបាលសហការជាមួយម្ចាស់ម៉ូតូធ្វើការស្រាវជ្រាវភ្លាមៗ
ហើយរយៈតាមប្រព័ន្ធតាមដានGPSបានចង្អុលបង្ហាញទៅកាន់ប្លុកផ្ទះជួលខាងលើ ទើបកម្លាំងនគរបាលប៉ុស្តិ៍ភ្លើងឆេះរទេះ ចុះសហការជាមួយនគរបាលប៉ុស្តិ៍ចោមចៅទី១ ធ្វើការឆែកឆេរបន្ទប់ជួលគ្មានលេខមួយ នៅក្នុងភូមិទួលពង្រ ។
នៅក្នុងការឆែកឆេរនេះ បានប្រទះឃើញម៉ូតូដែលត្រូវចោរលួចកាច់សោ.កខាងលើ រួមនឹងម៉ូតូ២គ្រឿងផ្សេងទៀតដែលសុទ្ធតែមានស្នាមគាស់បំបែកសោទាំងអស់ រួមជាមួយឧបករណ៍ដាប់លេខតួ លេខម៉ាស៊ីន ព្រមទាំងផ្លាកលេខម៉ូតូ មួយចំនួន ហើយមានស្ត្រីម្នាក់ដែលអះអាងថាជាសង្សារជនសង្ស័យជាចោរកំពុងស្ថិតនៅក្នុងបន្ទប់នោះ ក៏បានឃាត់ខ្លួនដើម្បីសួរនាំផងដែរ ។
ប្រភពខាងលើបន្តថា ក្រោយពេលសាកសួរស្ត្រីរូបនេះនិយាយថា ម៉ូតូទាំងនោះគឺសង្សាររបស់នាងយកមកទុកក្នុងបន្ទប់នេះ តែនាងមិនបានដឹងថាសង្សារគឺជាចោរឡើយ ព្រោះប្រុសស្នេហ៍រូបនេះប្រាប់នាងថា រូបគេគឺជាអ្នករកស៊ីគួកជេទិញ-លក់ម៉ូតូ ហើយនាងក៏មិនបានចាប់អារម្មណ៍ថាជននោះកុហកនាងឡើយ ។
បន្ទាប់មក ស្ត្រីរូបនេះបាននាំនគរបាលប៉ុស្តិ៍ទាំង២ទៅធ្វើការឆែកនៅបន្ទប់ជួលមួយទៀតលេខ១១២៣ ដែលស្ថិតនៅចម្ងាយប្រមាណ២គីឡូម៉ែត្រពីគ្នា ដកហូតបានម៉ូតូចំនួន២គ្រឿងបន្ថែមទៀត ព្រមទាំងផ្លាកលេខ និងកាតគ្រីមួយកំភ្លូសផងដែរ ។
ក្នុងប្រតិបត្តិការនេះ នគរបាលដកហូតបានម៉ូតូហុងដាឌ្រីមសេ១២៥ចំនួន៤គ្រឿង ក្នុងនោះមាន ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខភ្នំពេញ ១DG-៦៨៨៣ ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខ ភ្នំពេញ ១DG-៥៣៨៦ ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ ភ្នំពេញ១HB-៤៩៦៨ និងស៊េរីឆ្នាំ២០១៤ ពណ៌ខ្មៅ ពាក់ផ្លាកលេខ ភ្នំពេញ១CO-០៥១០ និងម៉ូតូធំម៉ាកMS ១គ្រឿង ពាក់ផ្លាកលេខ ភ្នំពេញ១DM-០៩៩៦ ព្រមទាំងផ្លាកលេខម៉ូតូចំនួន៩បន្ទះ កាតគ្រីចំនួន៦សន្លឹក ដុំសោម៉ូតូ ឧបករណ៍សម្រាប់ដាប់លេខម៉ូតូ រួមនឹងសម្ភារ និងគ្រឿងបន្លាស់ម៉ូតូជាច្រើនទៀត ។
បន្ទាប់មក កម្លាំងសមត្ថកិច្ចបានធ្វើការស្រាវជ្រាវដើម្បីចាប់ខ្លួនចោរលួចដែលកំពុងរត់គេចខ្លួន តែនៅមិនទាន់ដឹងថាសមត្ថកិច្ចនឹងចាត់ការលើស្ត្រីជាសង្សារជនសង្ស័យបែបណានៅឡើយទេ ៕
ចែករំលែកព័តមាននេះ