ខេត្តកំពត ៖ តាមសេចក្តីរាយការណ៍ពីនគរបាលការិយាល័យចរាចរផ្លូវគោក នៃស្នងការដ្ឋាននគរបាល ខេត្តបានឲ្យដឹងថា មានករណីគ្រោះថ្នាក់ចរាចរដ៏រន្ធត់មួយបានកើតឡើង កាលពីវេលាម៉ោង៣ និង៩នាទី រសៀល ថ្ងៃទី៣០…
ខេត្តកំពត ៖ តាមសេចក្តីរាយការណ៍ពីនគរបាលការិយាល័យចរាចរផ្លូវគោក នៃស្នងការដ្ឋាននគរបាល ខេត្តបានឲ្យដឹងថា មានករណីគ្រោះថ្នាក់ចរាចរដ៏រន្ធត់មួយបានកើតឡើង កាលពីវេលាម៉ោង៣ និង៩នាទី រសៀល ថ្ងៃទី៣០ ខែកញ្ញា ឆ្នាំ២០១៨ រវាងរថយន្តនឹងម៉ូតូ២គ្រឿង បុកគ្នាយ៉ាងពេញទំហឹងក្នុងទិសដៅ បញ្ជ្រាសទិសគ្នា លើផ្លូវជាតិលេខ៣ ត្រង់ចំណុចភូមិវត្តពោធិ៍ ឃុំថ្មី ស្រុកទឹកឈូ ខេត្តកំពត។ ប្រភពដដែលបានឲ្យដឹងថា ក្នុងករណីគ្រោះថ្នាក់ចរាចរខាងលើ បណ្តាលឲ្យមនុស្ស៤នាក់រងរបួសធ្ងន់ ម៉ូតូ២គ្រឿងរងការខូចខាត និងរថយន្តម៉ាកហាយឡេនឌ័រមួយគ្រឿងក្រឡាប់ផ្ងារជើង រងការខូចខាត ជាមធ្យមផងដែរ។
១-ម៉ូតូដែលរងការខូចខាតម៉ាក ហុងដាឌ្រីម១២៥ ពណ៌ខ្មៅ ស៊េរី២០១៥ ពាក់ស្លាកលេខកំពត 1I-4784 បើកបរដោយឈ្មោះ វ៉ិត វង់ ភេទប្រុស អាយុ៥៧ឆ្នាំ ជាកសិករ រស់នៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត (រងរបួសធ្ងន់) អ្នករួមដំណើរម្នាក់ឈ្មោះ វ៉ិត វីត ភេទប្រុស អាយុ២៨ឆ្នាំ ជាកូន(រងរបួសធ្ងន់)។ ២-ម៉ូតូម៉ាក ហុងដាឌ្រីម១២៥ ពណ៌ខ្មៅ ស៊េរី២០១៨ គ្មានស្លាកលេខ បើកបរដោយ ឈ្មោះ វ៉ិត វី ភេទប្រុស អាយុ២១ឆ្នាំ (រងរបួសធ្ងន់) និងអ្នករួមដំណើរម្នាក់ ឈ្មោះ វ៉ិត វឹន ភេទប្រុស អាយុ១៩ឆ្នាំ(របួសធ្ងន់) អ្នករងរបួសទាំងអស់ រស់នៅភូមិឃុំជាមួយគ្នាខាងលើ ហើយត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពត។
ប្រភពបន្តថា ម៉ូតូទាំងពីរគ្រឿងមានទិសដៅ ពីលិចទៅកើត រីឯរថយន្តម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2AD-3862 (មានទិសដៅពីកើតទៅលិច) អ្នកបើកបរមិនស្គាល់អត្តសញ្ញាណ ក្រោយពីកើតហេតុបានរត់គេចខ្លួនបាត់ បន្សល់ទុករថយន្តនៅផ្ងារជើងបួនឡើងលើនៅកន្លែងកើតហេតុ។ យានយន្តទាំងបីគ្រឿងសមត្ថកិច្ចចរាចរ នគរបាលខេត្តបាននាំមករក្សាទុក នៅការិយាល័យចរាចរផ្លូវគោកនៃស្នងការដ្ឋានខេត្ត ដើម្បីដោះស្រាយតាមផ្លូវច្បាប់។
សមត្ថកិច្ចបានអះអាងប្រាប់អ្នកយកព័ត៌មាននៅចុងក្រោយនេះថា កត្តាគ្រោះថ្នាក់ចរាចរដែលកើតឡើងខាងលើនេះ បើតាមប្រភពពីជនរងគ្រោះបានប្រាប់សមត្ថកិច្ចថា បណ្តាលមកពីផ្លូវហុយខ្លាំងពេក ហើយផ្លូវមានជង្ហុកខ្លះផង ពេលនោះរថយន្តបើកក្នុងល្បឿនលឿន មើលម៉ូតូមិនឃើញទើបបណ្តាលឲ្យបុកយ៉ាងនេះ៕
ចែករំលែកព័តមាននេះ