ខេត្តបាត់ដំបង ៖ ប្រគល់ប័ណ្ណបេឡាជាតិសន្តិសុខសង្គមជូនសមាជិកសមាគមអតីតយុទ្ធជនកម្ពុជា ខេត្តបាត់ដំបង ចំនួន៨០១៧នាក់ នៅវេលាម៉ោង០៨និង០០នាទីព្រឹកថ្ងៃទី២៨ ខែកញ្ញា ឆ្នាំ២០១៨ ។
លោក គន់ គីម ទេសរដ្ឋមន្ត្រីអគ្គលេខាធិការនៃគណៈកម្មាធិការកណ្តាលសមាគមអតីតយុទ្ធជនកម្ពុជា និងអស់លោកជាប្រតិភូអមដំណើរជាអធិបតីក្នុងពិធីសំណេះសំណាលសាកសួរសុខទុក្ខ និងប្រគល់ប័ណ្ណបេឡាជាតិសន្តិសុខសង្គម (ប.ស.ស) ជូនសមាជិកសមាគមអតីតយុទ្ធជនកម្ពុជាខេត្តបាត់ដំបង ។
លោកឧត្តមសេនីយ៍ទោ អ៊ុក ឃ្នួច មេបញ្ជាការរង យោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបងជាប្រធាន ស.អ.ក ខេត្ត , លោកឧត្តមសេនីយ៍ទោ ឯក សំអូន មេបញ្ជាការរង នាយសេនាធិការ យោធភូមិភាគទី៥ , លោក ប៊ុត គឹមស៊ាន អភិបាលរងខេត្តបាត់ដំបង, លោកឧត្តមសេនីយ៍ទោ នី កន ទីប្រឹក្សាក្រសួងការពារជាតិ អនុប្រធាន ស.អ.ក ខេត្ត, លោកមេបញ្ជាការ កងរាជអាវុធហត្ថខេត្ត អនុប្រធាន ស.អ.ក ខេត្ត, លោកឧត្តមសេនីយ៍ត្រី ទៀប រី ស្នងការរងនៃស្នងការដ្ឋាននគរបាលខេត្តសមាជិកគណៈគម្មាធិការ ស.អ.ក ខេត្ត, លោក ឡុង ផលគុណ ប្រធានមន្ទីរធនធានទឹក និងឧតុនិយមអនុប្រធាន ស.អ.ក ខេត្ត , លោក ឆាយ ម៉ាទីណាល់ នាយករដ្ឋបាលសាលាខេត្តបាត់ដំបង អនុប្រធាន ស.អ.ក ខេត្ត, លោក គឹម តេង ប្រធានមន្ទីរសង្គមកិច្ចខេត្ត អនុប្រធានប្រចាំការ ស.អ.ក ខេត្ត , ឯកឧត្តម កែវ ហន ក្រុមការងារចលនាមន្ត្រីរាជការចូលនិវត្ត និងអតីតយុទ្ធជនខេត្ត, ឯកឧត្តម អស់លោកប្រធានមន្ទីរ ស្ថាប័នជុំវិញខេត្ត, លោកអភិបាលក្រុង-ស្រុកទាំង១៤ , លោកប្រធាន អនុប្រធាន ស.អ.ក ក្រុង-ស្រុកទាំង១៤, ក្រុមការងារ ស.អ.ក ខេត្ត-ក្រុង, លោកប្រធាន អនុប្រធានសាខាសង្កាត់ អាជ្ញាធរដែនដីសរុបចំនួន១៥៥នាក់ នៅមជ្ឈមណ្ឌលសុភមង្គល ស្ថិតនៅភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង ។
ពិធីសំណេះសំណាលសាកសួរសុខទុក្ខ និងប្រគល់ប័ណ្ណបេឡាជាតិសន្តិសុខសង្គម (ប.ស.ស) តំណាងទូទាំងខេត្ត ជូនសមាជិកសមាគមអតីតយុទ្ធជនកម្ពុជា ខេត្តបាត់ដំបង ចំនួន៨០១៧នាក់ ក្នុងនោះសមាជិក អតីតជនយុទ្ធជនដែលចូលរួមទាំងអស់ម្នាក់ៗទទួលបានថវិកាចំនួន ២០.០០០រៀល ហើយបានប្រកាសជួយព្យាបាលវះកាត់ភ្នែក ដល់ជនពិការម្នាក់ និងឧបត្ថម្ភថវិកាចំនួន២០០ដុល្លារ ជាអំណោយរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាប្រធានសមាគមអតីតជនយុទ្ធជនកម្ពុជា និងសម្តេចគត្តិព្រឹទ្ធបណ្ឌិត ប៊ុនរ៉ានី ហ៊ុន សែន ។
ក្នុងឱកាសនោះលោកទេសរដ្ឋមន្ត្រីអគ្គលេខាធិការ បានសំណេះសំណាលផ្តាំផ្ញើសួរសុខទុក្ខពីសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជជាណាចក្រកម្ពុជាថ្នាក់ដឹកនាំគ្រប់លំដាប់ថ្នាក់ និងបានថ្លែងអំណរគុណដល់បងប្អូនអតីតយុទ្ធជនទាំងអស់ ដែលបានបោះឆ្នោតគាំទ្រសម្តេចអគ្គមហាសេនាបតីតេជោ ហ៊ុន សែន ធ្វើជានាយករដ្ឋមន្ត្រី ដើម្បីរក្សាសុខសន្តិភាព និងការអភិវឌ្ឍបន្តទៀត ។
បន្ទាប់មកប្រកាសផ្តល់ជូនផ្ទះចំនួន១០០ខ្នង ដល់សមាគម អតីតយុទ្ធជនកម្ពុជាខេត្តបាត់ដំបងជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគត្តិព្រឹទ្ធបណ្ឌិត ប៊ុនរ៉ានី ហ៊ុន សែន ដើម្បីជួយបំពេញតម្រូវការ ជួយបងប្អូនយើងក្នុងការជួបការលំបាកកន្លងមក និងបន្តជួយជាបន្តទៅទៀតដែលយើងទាំងអស់គ្នាកំពុងតែនៅរួមរស់ជាមួយគ្នានេះ ៕
ចែករំលែកព័តមាននេះ