រាជធានីភ្នំពេញ ៖ ចោរប្លន់ម្នាក់បានប្រើកាំបិតចុងស្រួច ចូលទៅភ្ជង់កនារីជាបុគ្គលិកម្នាក់នៅក្នុងហាង Net 24ម៉ោង ដែលបង្កប់ល្បែងស៊ីសងមួយកន្លែងយីហោ AV2 ដោយប្រមូលយកលុយបានជាង៣ពាន់ដុល្លារ រួចរត់គេចខ្លួនបាត់ស្រមោល ។
ហេតុការណ៍នេះ ធ្វើឱ្យមានការភ្ញាក់ផ្អើលដល់សមត្ថកិច្ចខណ្ឌចំការមន ចុះទៅដល់កន្លែងកើតហេតុ កាលពីវេលាម៉ោង៩និង៣០នាទីព្រឹកថ្ងៃទី២៦ ខែកញ្ញា ដែលហាងអុីនធើរណេតខាងលើ ស្ថិតនៅចំណុចកែងរវាងផ្លូវលេខ២៧៦និងផ្លូវលេខ១១៣ សង្កាត់បឹងកេងកងទី២ ខណ្ឌចំការមន ។
នារីឈ្មោះ រុន គឹមលាង អាយុ២៩ឆ្នាំ ជាបុគ្គលិកបម្រើការងារនៅហាងអុីនធើរណេតយីហោ AV2 និយាយថា មុនកើតហេតុវេលាម៉ោងប្រមាណជា៨ទៅ៩ព្រឹក មានបុរសជាភ្ញៀវម្នាក់អាយុប្រមាណជាង២០ឆ្នាំ បានចូលមកលេងនៅក្នុងកន្លែង Net 24ម៉ោង ដែលជាកន្លែងធ្វើការរបស់នាង ។
ជននោះ ចូលទៅអង្គុយលេងប្រហែលជាងកន្លះម៉ោង ចាញ់អស់ជាង១.២០០ដុល្លារ ក៏ដើរចេញទៅក្រៅបាត់ទៅ ។ នាងរៀបរាប់ទៀតថា លុះបន្តិចក្រោយមកក៏ឃើញបុរសម្នាក់នោះត្រឡប់មកកវិញ តែមិនបានមកអង្គុយនៅកន្លែងលេងទេ គឺដើរចូលទៅក្នុងបន្ទប់ទឹកទៅវិញ ។
ពេលរូបគេចេញពីក្នុងបន្ទប់ទឹកមកវិញ ហើយរូបនាងកំពុងអង្គុយនៅកន្លែងគិតលុយនោះ ស្រាប់តែជននេះយកកាំបិតចុងស្រួចមួយមកភ្ជង់ករបស់នាង ហើយគំរាមចាក់សម្លាប់ដោយសួររកកន្លែងទុកលុយ ។ ដោយការភ័យខ្លាច រូបនាងក៏បានប្រាប់ពីកន្លែងទុកលុយ ហើយចោរនោះបានយកកូនសោទៅចាក់ទូប្រមូលយកលុយអស់ជាង៣ពាន់ដុល្លារ រួចដើរចេញក្រៅ និងរត់គេចខ្លួនបាត់ស្រមោលទៅ ។
នាង រុន គឹមលាង បញ្ជាក់ទៀតថា ជនដែលយកកាំបិតមកភ្ជង់កនាងប្លន់យកលុយអស់ជាង៣ពាន់ដុល្លារនេះ រូបនាងមិនដែលស្គាល់ទេកាលពីពេលមុនមក គឺទើបតែឃើញរូបគេចូលមកលេងកាលពីថ្ងៃទី២៥ ខែកញ្ញាម្តង ឈ្នះបាន៣០០ទៅ៤០០ដុល្លារ និងព្រឹកថ្ងៃទី២៦ ខែកញ្ញា ឃើញចូលមកលេងម្តងទៀតចាញ់អស់ជាង១.២០០ដុល្លារ ស្រាប់តែយកកាំបិតមកភ្ជង់កប្លន់យកលុយបានជាង៣ពាន់ដុល្លារ និងធ្វើឱ្យមានការភ្ញាក់ផ្អើលតែម្តង ។
គួរកត់សម្គាល់ថា នៅក្នុងភូមិសាស្ត្រខណ្ឌចំការមន មានទីតាំង Net 24ម៉ោង ដែលបង្កប់ល្បែងស៊ីសងតាមអនឡាញប្រភេទនេះច្រើនស្អេកស្កះ តែមិនដែលឃើញមានអាជ្ញាធរមូលដ្ឋានណាម្នាក់ចុះបង្ក្រាបឡើយ ហើយករណីលួច ប្លន់ និងអំពើចោរកម្មផ្សេងៗ ក៏កំពុងតែកើតមានច្រើនដែរ ។
ក្រោយពេលកើតហេតុ គេឃើញកម្លាំងសម្ថកិច្ចខណ្ឌចំការមនជាច្រើននាក់ចុះទៅដល់និងហៅនារីជាបុគ្គលិកខាងលើ ទៅប៉ុស្តិ៍នគរបាលបឹងកេងកងទី២ ដើម្បីធ្វើការសាកសួរ និងស្រាវជ្រាវតាមចាប់ខ្លួនចោរប្លន់ ៕
ចែករំលែកព័តមាននេះ