រាជធានីភ្នំពេញ ៖ មានការផ្ទុះអាវុធជាច្រើនគ្រាប់ បង្កឱ្យភ្ញាក់ផ្អើលដល់អ្នកភូមិរត់ចែកជើងគ្នា បម្រុងត្រៀមបង្វេចរត់ព្រោះស្មានតែសង្គ្រាមកើតឡើង តាមពិតជាការផ្ទុះអាវុធរឿងទំនាស់ពាក្យសម្តីគ្នាក្នុងហាងនំបុ័ងទៅវិញ ។ ទោះបីជាបែបណា អ្នកក្លាហានមានអាវុធផ្ទុះបែរជារងរបួសដោយផ្លែកាំបិតរបស់ភាគីម្ខាងទៀត ។
ហេតុការណ៍ខាងលើ កើតឡើងកាលពីវេលាម៉ោង៧និង២០នាទីយប់ថ្ងៃទី២២ ខែកញ្ញា នៅហាងនំបុ័ងខ្មែរអង្គរ ក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ ។ បុរសក្លាហានប្រើប្រាស់អាវុធបាញ់ក្នុងហេតុការណ៍នេះឈ្មោះ អុឹម សុថា អាយុ៤៨ឆ្នាំ ជាមន្ត្រីយោធា មានទីលំនៅក្បែរកន្លែងកើតហេតុ រងរបួសដៃឆ្វេងហូរឈាមសស្រាក់ ចំណែកភាគីម្ខាងទៀត ជាកម្មករនៅហាងនំបុ័ងខាងលើ បាននាំគ្នារត់
គេចខ្លួនបាត់អស់ ។
តាមប្រភពព័ត៌មានពីស្ត្រីឈ្មោះ ពិម សុខៈអាយុ៣៥ឆ្នាំ បានឲ្យដឹងថា មុនកើតហេតុបុរសដែលមានកាំភ្លើង ក្រោយពីផឹកស្រវឹងនៅក្នុងភូមិស្រឿងៗ បានដើរទៅរកទិញនំសែនព្រះខែ ហើយត្រូវបានក្រុមកម្មករក្នុងហាងប្រាប់ថាមានតែមិនដឹងតម្លៃចាំសួរថៅកែសិន ។ ប៉ុន្តែបែរជាបុរសរូបនេះខឹង និងក្លាយជាទំនាស់ពាក្យ
សម្តីក៏ត្រឡប់ទៅយកកាំភ្លើងម៉ាករូឡូពីផ្ទះ មកដល់មុខហាងនំបុ័ងបាញ់ឡើងលើ១គ្រាប់ ។ ចំណែកខាងកម្មករវិញ បានយកកាំបិតកាប់បុរសក្លាហាននេះបណ្តាលឲ្យរងរបួសដៃ ក៏កើតជាការផ្ទុះអាវុធជាច្រើនគ្រាប់ទៀត បណ្តាលឲ្យរឿងតូចកាន់តែក្លាយទៅជារឿងធំ ផ្អើលដល់សមត្ថកិច្ចខណ្ឌពោធិ៍សែនជ័យ ទាំងនគរបាលនិងអាវុធហត្ថទៅដល់កន្លែងកើតហេតុ តែភាគីខាងកម្មករបានរត់គេចខ្លួនបាត់អស់ ។
បើតាមប្រភពមួយផ្សេងទៀតបានឲ្យដឹងថា មុនកើតហេតុ បុរសជាយោធារូបនេះបានដើរទៅរកទិញនំសែនព្រះខែនៅហាងខាងលើគាប់ជួនឃើញកម្មករក្នុងហាងឈ្លោះប្រកែកគ្នាក៏ចូលទៅឃាត់ ។ ផ្ទុយទៅវិញ បែរជាកើតទំនាស់ពាក្យសម្តីជាមួយក្រុមកម្មករ រហូតទ្រាំមិនបានក៏ទៅយកកាំភ្លើងពីផ្ទះមកបាញ់គំរាមមួយគ្រាប់ ឯក្រុមកម្មករដែលប្រដាប់ដោយកាំបិតក៏ស្ទុះចូលកាប់ បណ្តាលឲ្យរងរបួសទើបបុរសរូបនេះបាញ់
ឡើងលើបន្ថែមទៀតដើម្បីការពារខ្លួន ។
នៅកន្លែងកើតហេតុ សមត្ថកិច្ចរកឃើញសម្បកគ្រាប់ចំនួន៥ និងគ្រាប់នៅជាប់ក្នុងកាំភ្លើងមួយគ្រាប់ទៀត។
ក្រោយពីមានហេតុការណ៍ផ្ទុះអាវុធ បណ្តាលឲ្យអ្នកមានអាវុធរងរបួស ហើយភាគីម្ខាងទៀតរត់បាត់នោះ សមត្ថកិច្ចអាវុធហត្ថបានហៅថៅកែហាងនំបុ័ងខាងលើទៅសាកសួរនៅបញ្ជាការដ្ឋានអាវុធហត្ថខណ្ឌពោធិ៍សែនជ័យ ចំណែកបុរសក្លាហានដែលរងរបួសដៃត្រូវបានសមត្ថកិច្ចនាំឲ្យទៅគ្រូពេទ្យព្យាបាលសិន ។ បច្ចុប្បន្ន សមត្ថកិច្ចកំពុងសាកសួរនិងស្រាវជ្រាវជុំវិញរឿងហេតុខាង លើ និងមិនទាន់ដឹងថាខាងណាខុស ខាងណាត្រូវនៅឡើយទេ ៕
ចែករំលែកព័តមាននេះ