ខេត្តបាត់ដំបង ៖ បុរសម្នាក់ត្រូវសមត្ថកិច្ចចាប់ខ្លួនកាលពីវេលាម៉ោង១០និង២០នាទីព្រឹក ថ្ងៃទី២២ កញ្ញានេះ នៅចំណុចមុខផ្សាររាត្រី ភូមិដូងឃុំបឹងរាំង ស្រុកកំរៀង ក្រោយពីប្រព្រឹត្តអំពើប្លន់ ហើយរត់គេចខ្លួនអស់រយៈពេលជាងមួយឆ្នាំ…
ខេត្តបាត់ដំបង ៖ បុរសម្នាក់ត្រូវសមត្ថកិច្ចចាប់ខ្លួនកាលពីវេលាម៉ោង១០និង២០នាទីព្រឹក ថ្ងៃទី២២ កញ្ញានេះ នៅចំណុចមុខផ្សាររាត្រី ភូមិដូងឃុំបឹងរាំង ស្រុកកំរៀង ក្រោយពីប្រព្រឹត្តអំពើប្លន់ ហើយរត់គេចខ្លួនអស់រយៈពេលជាងមួយឆ្នាំ ។
លោក គឹម ពន្លក អធិការនគរបាលស្រុកកំរៀងបានឲ្យដឹងថា ជនសង្ស័យម្នាក់ឈ្មោះ គុណ វីរៈ ហៅរ៉ាក់ ភេទប្រុស អាយុ២៩ឆ្នាំ រស់នៅភូមិដូង ឃុំបឹងរាំង ស្រុកកំរៀង ។ ជននេះត្រូវបានចាប់ខ្លួនតាមដីការបស់តុលាការដែលពាក់ព័ន្ធក្នុងអំពើប្លន់យកម៉ូតូដែលបានប្រព្រឹត្ត កាលពីថ្ងៃទី០៧ ខែឧសភា ឆ្នាំ២០១៧ នៅចំណុចភូមិអូរអន្លក់ ឃុំតាសែន ស្រុកកំរៀង ។ លោកអធិការបានបញ្ជាក់ថា ក្រោយកើតហេតុជននេះបានរត់គេចខ្លួនរហូតមកបង្ហាញមុខនៅក្នុងផ្សារាត្រី ចំណុចខាងលើ ទើបកម្លាំងរបស់លោកចាប់ខ្លួនតែម្ដង ។
បើតាមសមត្ថកិច្ចបានរំលឹកអំពីសំណុំរឿងនេះថា ជនដៃដល់ឈ្មោះ គុណ វីរៈ ហៅរ៉ាក់ និងម្ចាស់ម៉ូតូដែលជាជនរងគ្រោះជាមនុស្សស្គាល់គ្នា ។ នៅថ្ងៃកើតហេតុពួកគេបានផឹកស៊ីជុំគ្នាតែក្រោយបញ្ចប់ការផឹកស៊ីក៏នាំគ្នាជិះម៉ូតូឌុបគ្នាទៅផ្ទះ ។
សមត្ថកិច្ចបានបញ្ជាក់ថា ពេលឌុបគ្នាតាមផ្លូវក៏ឈប់នោម ពេលនោះជនដៃដល់រូបនេះបានដកកាំបិតអារ.កជនរងគ្រោះ (ម្ចាស់ម៉ូតូ) បណ្ដាលឲ្យដួលប្រកាន់ពេញថ្នល់ ហើយជនដៃដល់បានប្លន់យកម៉ូតូជនរងគ្រោះជិះគេចខ្លួនបាត់រហូតតែម្ដង ។
លោកឧត្តមសេនីយត្រី ជេត វណ្ណនី ស្នងការរងខេត្តបានឲ្យដឹងដែរថា ពេលត្រូវជនដៃដល់អារ.កប្លន់យកម៉ូតូ ជនរងគ្រោះមានស្នាមរបួសធ្ងន់ធ្ងរត្រង់បំពង់.ក តែមិនស្លាប់ទេ ហើយសមត្ថកិច្ចនិងសាច់ញាតិបានបញ្ជូនទៅកាន់មន្ទីរពេទ្យទាន់ពេលវេលា ។ លោកស្នងការរងបានបញ្ជាក់ថា ក្រោយអារ.កប្លន់យកបានម៉ូតូជននេះបានរត់គេចខ្លួន ហើយកម្លាំងជំនាញបានតាមស៊ើបសង្កេតស្វែងរកជនរហូតមក ។ លុះភ្លេចខ្លួនជននេះក៏ត្រឡប់ចូលស្រុកវិញ ទើបត្រូវកម្លាំងជំនាញចាប់ខ្លួន តាមដីកាតុលាការតែម្ដង ៕
ចែករំលែកព័តមាននេះ