ភ្នំពេញ៖បុរសម្នាក់បានស្លាប់ភ្លាមៗនៅកន្លែងកើតហេតុ ពេលជិះម៉ូតូម្នាកឯងត្រូវរថយន្តមិនស្គាល់ម៉ាកបុកទាំងកំរោល ក្រោយកើតហេតុរថយន្តបានបើកគេចបាត់ដោយសុវត្ថិភាព ។ ហេតុការណ៍នេះបានកើតឡើងកាលពីម៉ោង៩និង៤០នាទីយប់ថ្ងៃទី២២ ខែកញ្ញា ឆ្នាំ២០១៨ នៅចំណុចផ្លូវ៥២៨ កែងផ្លូវ៣១៧ ក្នុងសង្កាត់បឹងកកទី១ ខណ្ឌទួលគោក។
សមត្ថកិច្ចបានប្រាប់ឱ្យដឹងថា ជនរងគ្រោះដែលស្លាប់ឈ្មោះ ហ៊ឹម រិទ្ធី ភេទប្រុស អាយុ២៧ឆ្នាំ ជាបុគ្គលិកក្រុមហ៊ុនឯកជន ស្នាក់នៅក្នុងសង្កាត់ទួលសង្កែទី១ ខណ្ឌឬស្សីកែវ និងស្រុកកំណើតនៅភូមិពោនឃុំ សង្កែ ស្រុករំដួល ខេត្តស្វាយរៀង។
ប្រភពបានឱ្យដឹងថា មុនកើតហេតុ គេបានឃើញជនរងគ្រោះខាងលើជិះម៉ូតូមួយគ្រឿងម៉ាកឌ្រឹមសង់ ធុនសេ១២៥ ពណ៍ខ្មៅ ពាក់ស្លាកលេខ ស្វាយរៀង ១G-៩៧៨៥ ធ្វើដំណើរតែម្នាក់ឯង ក្នុងទិសដៅពីលិចទៅកើត លុះមកចំណុចផ្លូវ៣១៧កន្លែងកើតហេតុ ស្របពេលមេឃកំពុងធ្លាក់ភ្លៀងខ្លាំង ស្រាប់តែមានរថយន្តមិនចាំម៉ាកបើកមកពីជើងទៅត្បូងធ្វើដំណើរតាមផ្លូវ៥២៨ មកបុកម៉ូតូទាំងកំរោល បណ្តាលឱ្យអ្នកបើកបរម៉ូតូដួលបាក់កស្លាប់ភ្លាមៗនៅកន្លែងកើតហេតុ ក្រោយពីកើតហេតុរថយន្តបានបើកគេចបាត់ដោយសុវត្ថិភាព។
ក្នុងករណីគ្រោះថ្នាក់ចរាចរណ៍ខាងលើនេះសមត្ថកិច្ចជំនាញចុះវាស់វែង ហើយបានប្រគល់សពទៅឱ្យសាច់
ញាតិយកទៅធ្វើបុណ្យនៅស្រុកកំណើត ដោយឡែកម៉ូតូជនរងគ្រោះក៏បានប្រគល់ឱ្យសាច់ញាតិវិញផងដែរ៕
ចែករំលែកព័តមាននេះ