ខេត្តព្រះវិហារ ៖ គ្រាប់មិនទាន់ផ្ទុះជាង១០០គ្រាប់ ត្រូវបានប្រទះឃើញដោយឆ្មាំប្រាសាទព្រះវិហារ ចម្ងាយប្រមាណ៧ម៉ែត្រ ក្បែរគោបុរៈទី៤ ខណៈទឹកភ្លៀងហូរច្រោះដី កាលពីថ្ងៃទី១២ ខែកញ្ញា ។សមត្
ថកិច្ចសន្និដ្ឋានថា គ្រាប់ទាំងនោះបានបន្សល់ទុកតាំងពីសម័យសង្គ្រាមក្នុងទសវត្សរ៍ឆ្នាំ១៩៨០ ព្រោះតំបន់ប្រាសាទព្រះវិហារកាន់កាប់ដោយកម្លាំងទ័ពខ្មែរក្រហម ។
លោកឧត្តមសេនីយ៍ត្រី ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្ត នៅរសៀលថ្ងៃទី១៣ កញ្ញា បានឲ្យដឹងថា គ្រាប់ទាំងអស់នេះមានចំនួន១២៧គ្រាប់ ជាប្រភេទ៦០មីល្លីម៉ែត្រ ត្រូវបានរកឃើញក្បែរគោបុរៈទី៤ ចម្ងាយពីប្រាសាទព្រះវិហារប្រមាណ៧ម៉ែត្រ និងចម្ងាយពីស្រះទឹកធំប្រហែល៣០ម៉ែត្រ ។
គ្រាប់មិនផ្ទុះទាំងអស់នេះ ត្រូវបានប្រទះឃើញដោយឆ្មាំប្រាសាទនៅលើប្រាសាទព្រះវិហារ ខណៈមានភ្លៀងធ្លាក់ជាប់ៗគ្នា ធ្វើឲ្យទឹកហូរច្រោះដីបន្តិចម្តងៗ លេចចេញនូវរូបរាងគ្រាប់មកតែម្តង ទើបអាជ្ញាធររាយការណ៍ទៅមជ្ឈមណ្ឌលសកម្មភាពកម្ចាត់មីន (CMAC) ឲ្យមកពិនិត្យនិងធ្វើការប្រមូលទុក ។
សូមបញ្ជាក់ថា មកដល់ពេលនេះគ្រាប់មិនទាន់ផ្ទុះទាំង១២៧គ្រាប់ ត្រូវបានក្រុមការងារCMAC ប្រមូលយកទៅរក្សាទុករួចរាល់ហើយ ដើម្បីការពារសុវត្ថិភាព ៕
ចែករំលែកព័តមាននេះ