ទីក្រុងបាងកក ៖ យោងតាមការសិក្សារបស់ក្រសួងពាណិជ្ជកម្មថៃបានឲ្យដឹងថា ការដាក់ពន្ធលើផលិតផលចិនប្រមាណ២០០ប៊ីលានដុល្លារបន្ថែមក្នុងពេលថ្មីៗនេះ នឹងជួយដល់ការនាំចេញថៃដោយផ្តល់ឱកាសក្នុងការជំនួសផលិតផលចិនក្នុងទីផ្សារអាមេរិក ។
អ្នកស្រី Pimchanok Vonkorpon ប្រធានការិយាល័យគោលនយោបាយ និងយុទ្ធសាស្ត្រ ពាណិជ្ជកម្មក្រោមក្រសួងពាណិជ្ជកម្ម បាននិយាយថា ការបង្កើនពន្ធអាមេរិកលើផលិតផលចិន ចំនួន៥.៧៤៥ប្រភេទផ្តល់ជាសក្តានុពលដល់ប្រទេសថៃក្នុងការនាំចេញផលិតផលជំនួសបន្ថែម ។
អ្នកស្រីបានបន្តថា ផលិតផលដែលមានសក្តានុពលរួមមាន គ្រាប់ធុញ្ញជាតិនិងគ្រាប់ស្វាយចន្ទី, សន្លឹកជ័រនិងដុំជ័រ, អង្ករពណ៌, ផ្លែឈើ និងបន្លែស្រស់និងកំប៉ុងដូចជា ចេក, ដូង, ស្វាយ, និងម្នាស់ ។ ចំណែកគ្រឿងសមុទ្រក្លាសេ ដូចជា ធូណា និងផលិតផលសត្វផ្សេងៗដូចជាទឹកឃ្មុំជាដើម ។
ផលិតផលដែលមានសក្តានុពលផ្សេងទៀតមានដូចជា គ្រឿងទេស និងភេសជ្ជៈ, ភេសជ្ជៈមិនមានជាតិអាល់កុល, គ្រឿងគីមី និងគ្រាប់ជ័រ រួមទាំងយានយន្ត និងគ្រឿងយានយន្តផងដែរ ។
គួរបញ្ជាក់ដែរថា កាលពីថ្ងៃចន្ទកន្លងមក លោកប្រធានាធិបតីដូណាល់ ត្រាំ (Donald Trump) បានប្រកាសពីការដាក់ពន្ធលើផលិតផលចិនប្រមាណ២០០ប៊ីលានដុល្លារបន្ថែមទៀតដែលរួមមានផលិតផលជាច្រើនដូចជា រ៉ែសម្រាប់ផលិត, ទឹកបន្លែ និងកាបូបស្បែកជាដើម ។
អ្នកស្រីPimchanokបាននិយាយថា ប្រទេសចិនអាចនឹងចេញវិធានការឆ្លើយតបនឹងពន្ធនេះក្នុងពេលឆាប់ៗ ហើយការិយាល័យខាងលើនឹងតាមដានយ៉ាងដិតដល់ និងវាយតម្លៃឥទ្ធិពលលើការនាំចេញរបស់ប្រទេសថៃ ។
អ្នកស្រីបានឲ្យដឹងទៀតថា ជម្លោះពាណិជ្ជកម្មរវាងសេដ្ឋកិច្ចធំៗទាំងពីរនេះនឹងមិនបញ្ចប់ក្នុងពេលឆាប់ៗទេ ហើយអាចនឹងកាន់តែធ្ងន់ធ្ងរ និងស្មុគស្មាញជាងមុនថែមទៀត។
អ្នកស្រីបានបន្ថែមថា ប្រទេសថៃគួរតែផ្តោតសំខាន់លើការពង្រីកដៃគូពាណិជ្ជកម្មនិងសន្តិសុខជាតិដែលជាប់ពាក់ពិនយ៉ាងជិតដិតជាមួយនឹងគោលនយោបាយពាណិជ្ជកម្ម។
គួររំឭកថា លោកប្រធានាធិបតីដូណាល់ ត្រាំ (Donald Trump) បាននិយាយកាលពីថ្ងៃចន្ទសប្ដាហ៍នេះថា លោកនឹងដាក់ពន្ធ១០%ទៅលើផលិតផលនាំចូលពីចិនដល់ទៅ២០០ប៊ីលានដុល្លារ ប៉ុន្តែលោកអនុគ្រោះដល់នាឡិកា Smartwatch របស់Apple និង Fitbit រួមទាំងផលិតផលដទៃទៀតដូចជា មួកការពារ និងកៅអីក្មេងសម្រាប់ដាក់ក្នុងរថយន្តជាដើម ។
ក្នុងសេចក្តីថ្លែងការណ៍ខាងលើ លោកត្រាំបានព្រមានថា ប្រសិនបើប្រទេសចិនចេញវិធានការឆ្លើយតបប្រឆាំងនឹងកសិករ ឬឧស្សាហកម្មអាមេរិក « ពួកយើងនឹងអនុម័តដំណាក់កាលពីបីភ្លាមៗ ដែលជាពន្ធលើផលិតផលនាំចូលពីចិនប្រមាណ២៦៧ប៊ីលានដុល្លារបន្ថែមទៀត »។
ពន្ធទាំងនេះនឹងចាប់ផ្តើមមានប្រសិទ្ធភាពនៅថ្ងៃទី២៤ខែកញ្ញាខាងមុខនេះ ប៉ុន្តែអត្រាពន្ធនឹងកើនដល់២៥%នៅចុងឆ្នាំ២០១៨ ដែលអនុញ្ញាតឲ្យក្រុមហ៊ុនអាមេរិកមានពេលវេលាប្តូរអ្នកផ្គត់ផ្គង់ទៅកាន់ប្រទេសដទៃវិញ ។
អ្នកព្យាករណ៍បានព្រមានថា ការធ្ងន់ធ្ងរឡើងនៃជម្លោះរវាងសេដ្ឋកិច្ចធំជាងគេទាំងពីរលើពិភពលោកនេះ អាចនឹងកាត់បន្ថយការលូតលាស់សេដ្ឋកិច្ចពិភពលោកប្រមាណ០,៥% រហូតដល់ឆ្នាំ២០២០ ប្រសិនបើពន្ធដែលបានគំរាមនេះពិតជាត្រូវបានអនុម័តមែន៕
ចែករំលែកព័តមាននេះ