ខេត្តព្រៃវែង ៖ ផ្ទះក្បឿង១ខ្នងទំហំ៨ម៉ែត្រគុណនឹង១២ម៉ែត្រត្រូវបានអគ្គីភ័យឆាបឆេះយ៉ាងសន្ធោសន្ធៅបណ្តាលអោយមានការភ្ញាក់ផ្អើលទាំងព្រលឹម ប៉ុន្តែមិនបានបណ្តាលអោយមានគ្រោះដល់ម្ចាស់ផ្ទះ ឬអ្នកជិតខាងណាឡើយ ។
អគ្គីភ័យនេះបានកើតឡើងកាលពីវេលាម៉ោង៧និង៤០នាទីព្រឹក ថ្ងៃទី១៨ កញ្ញា នៅចំណុចភូមិព្រាលទី១ ឃុំថ្មពូន ស្រុកកញ្ជ្រៀច ខេត្តព្រៃវែង ផ្ទះដែលត្រូវភ្លើងឆេះនេះមានម្ចាស់ឈ្មោះ អាន រ៉ុន និងប្រពន្ធឈ្មោះ ណូយ ថេង មានមុខរបរជាជាងផ្សាដែកនៅរាជធានីភ្នំពេញ ។
ប្រភពព័ត៌មានពីអ្នកភូមិដែលនៅក្បែផ្ទះកើតហេតុបានអោយដឹងថា ផ្ទះនេះមានតែលោកតាចាស់ម្នាក់ដែលត្រូវជាឪពុកម្ចាស់ផ្ទះរស់នៅចាំផ្ទះតែម្នាក់ឯងប៉ុណ្ណោះ ចំណែកប្តីប្រពន្ធម្ចាស់ផ្ទះបាននាំគ្នាទៅរកស៊ីនៅភ្នំពេញអស់ហើយយូរៗទើបមកលេងផ្ទះម្តង ហើយថ្ងៃកើតហេតុនោះលោកតាគាត់នៅផ្ទះមិនបានទៅណាទេ តែសំណាងល្អពេលមានភ្លើងឆាបឆេះភ្លាម លោកតាបានរត់ចេញទៅក្រៅរួចទើបមិនបណ្តាលអោយមានគ្រោះថ្នាក់ ។
ដោយឡែកលោកវរសេនីយ៍ឯក សៅ ចាន់ថា អធិការនគរបាលស្រុកកញ្ជ្រៀចបានអោយដឹងថា នៅពេលដែលទទួលបានព័ត៌មានពីប្រជាពលរដ្ឋភ្លាមលោកក៏បាននាំយករថយន្តពន្លត់អគ្គីភ័យមកជួយបាញ់ទឹកពន្លត់ភ្លាម ប៉ុន្តែអ្នកស្រុករាយការណ៌មកសមត្ថកិច្ចយឺតពេលពេក ព្រោះពេលមកដល់ភ្លើងបានឆេះផ្ទះពេញបន្ទុកទៅហើយ ដូច្នេះហើយទើបមិនអាចជួយស្រោចស្រង់ផ្ទះនេះបាន គឺបានត្រឹមទប់ស្កាត់មិនអោយភ្លើងឆ្លងរាលដាលទៅផ្ទះអ្នកជិតខាងប៉ុណ្ណោះ ។
លោកអធិការបានបញ្ជាក់ថា ក្នុងហេតុការណ៌អគ្គីភ័យនេះសមត្ថកិច្ចបានប្រើទឹកបាញ់ពន្លត់អស់ចំនួន៥រថយន្តទើបភ្លើងរលត់ជាស្ថាពរ ។ ចំណែកមូលហេតុនៃការឆាបឆេះនេះសមត្ថកិច្ចបានសន្និដ្ឋានថា គឺបណ្តាលមកពីផ្ទុះស្សេចរន្តភ្លើងនៅក្នុងផ្ទះ ។
ទ្រព្យសម្បត្តិក្នុងផ្ទះរួមទាំងផ្ទះត្រូវភ្លើងឆេះអស់ទាំងស្រុងដែលសរុបការខូចខាតគិតជាទឹកប្រាក់សរុបប្រមាណជា១២៨.០០០.០០០ រៀល ៕
ចែករំលែកព័តមាននេះ